1 Babylon gade cailigwang kelucai kei hena bekei canglu nah Israelmedung penui namdidung ga bam. Nah minadung ket tei eh Jerusalem ga gwang ngkwalu. 2 Cidau Jozadak napei Jeshua cuhlu, nah pe siname cingkume, nah Zerubbabel Shealtiel napei, nah pe sinamedung, nah penui Israel Tinggwang recabam de teilu, Tinggwang minabe Moses zai ga ge rau pwa kebam de nzwa eh cipau gage keru recadung teigai beulu kerane.* 3 Langgi kedi gade cailigwang kelume recabam de pe bangdwa bam de gage teilu, penui cika lungh kebamme* de hing liede. Pecai penui cikage RAMPAUBE de keru reca tei gaibeu, tingcang nah tinghegi keru recadung. 4 Pecai penui Moses gu hezai ga raupwa kelade nzwa eh Paiki Ngyi de mneilu, tingba ramsang keru recade teilu, langgnai ge teimai kesiade mzui eh. 5 Nah aipaucai keru recadung tei jüja bam di, nah keicidung* ziemne, nah RAMPAUBE ziemne teimci kelu kedet kelu tingdung pelane ziemne, nah suiyi makai RAMPAUBE de kepeu keheibe ziemne.* 6 Penui kei hena ga tingbazie raitube benai gade RAMPAUBE dage keru recadung de teigai cuhdi, RAMPAUBE kerecaki teilu mereu liede.

7 Nah penui tsupangme de nah tsingta keteime de rangkanggeu peu, nah taktyei, kesak, nah maca keu Sidonme nah Tyrme de peu, Lebanon gade Joppa jaaidi ga cedar tsingbangdung teugwang kerane, penuide Persia gwangpei Cyrus ne pe sam peu kegaide mzui eh.

8 Nah penui Jerusalem ga Tinggwang ki ga gwangkelu mmi pe kenabe kum, keina bekei dau, Shealtiel napei Zerubbabel, nah Jozadak napei Jeshua, nah penui siname kedame cingkume nah Levime, nah hebaang tei kela gade Jerusalem ga gwang kelu pelane heta tei ndeu lu, nah penui Levime mmi ngkai nah pe nreu lebieme de RAMPAUBE ki heta ketei ga pierengei kera nlumgai beudi.* 9 Nah Jeshua, pe napeidung nah pe siname, Kadmiel nah pe napeidung, Judah napeidung, Tinggwang kerecaki ga heta tei kebamme de pie kerengeime tei kerane ket teilu, Henadad napeidung, penui napeidung nah penui siname Levime de si eh. * 10 Nah ki keteime RAMPAUBE kerecaki bangdwa de teincuh lu. Nah cingkume penui nia kailwe teluidung teu eh saplu, nah Levime, Asaph napeime, ntwaidung pwalwe saplu, Israel gwangpei David zai dungde teu eh RAMPAUBE de twa kerane. 11 Cidau penui lei teidi, RAMPAUBE de twa nah teikeherei delie eh: "Pa au yilie, kedanemene pe samkakkelu samsang de Israelme da bammui kelane!" Mina pelane RAMPAUBE de twa eh sahbak degai, kedanemene RAMPAUBE ki bangdwa de tei ncuh kelune. 12 Dede cingkume nah Levime kekiee ge kakga, nah pautsa peu keteume, kecingme kerecaki raitude kengaume, sahbak eh hap bamdi, penui miakngau gade kerecaki aide pe bangdwa de tei ncuh kegaidau. Dede mina kekiee ge suiyi kwa sahbak eh sahgai. 13 Cine minadung suiyi kwa sah kebamde nah minadung kehap kwade ci ntsamlu tadi, kedanemene minadung sah kegaide mdu sütdi nah makwa de kemdei gade de siu kedine.