1 Persiame gwangpei, Cyrus hegwang teikelu mmi kerai bekum, RAMPAUBE sam Jeremiah dage ranggai kebeu de teicang lu kerane, RAMPAUBE Persia gwangpei Cyrus lung teigai beu. Cine pa aja ge pe hegwangram leune gage kaigai, nah kerau gage peu bamlu, de rang eh: 2 "Persia gwangpei Cyrus ainzwa rangzeu: Tinggim Tinggwang, RAMPAUBE, kideu hegwangramdung pelane acu peu dida, nah pa ne acu Judah deuceu ga kebam, Jerusalem gage pe ziemne ki ge tei kerane nlum beuda. 3 Nnui kakga caube ne pe minadung pelane gade no? Peu pe Tinggwang de peda la lulo, nah Judah ga kebam Jerusalem dega peu pecu nghang lulo, nah peu pecu RAMPAUBE, Israel Tinggwang ki tei lulo. Pa au Jerusalem ga kebam Tinggwang deda. 4 Nah heni kehei leuga bang kelume pa lungh kebam gade, peu pe minadung lungh kebamme de pecu rangkanggeu nah kecak, nah mabamdung nah kauruinedung le ngha beulu, nah Jerusalem ga kebam Tinggwang ki de ziemne suiyi makai de si eh."

5 Pecai Judah penai Benjamin leuh ga pepeu keteumedung, nah cingkumedung, nah Levimedung, nah Tinggwang ne helung tei kebeume pelane de si eh, Jerusalem ga kebam RAMPAUBE ki de tei kerane mteilu. 6 Nah penuide twagwa kebamme pelane rangkanggeu lidung, kecak, mabamdung, nah kauruinedung le, nah pemi kehung mapeudung le penuide ngha beu, mta pwa kepeudung de si mene. 7 Nah hegwangpei Cyrus RAMPAUBE ki lidung hegwangpei Nebuchadnezzar ne Jerusalem gade pwampet kelude pwa mpetlu nah cidungde pe rabedung ki gage kaidi.✝ 8 Nah Persiame gwangpei, Cyrus cidungde mabam keteube Mithredath ba gage kai beudi. Nah pa cidungde Judah reu kedibe, Sheshbazzar de peimpet beudi. 9 Nah cidungde aipau kieege: kecak lidung 30, rangkanggeu lidung 1,000, kieceunadung 29, 10 kecak kwakceunadung 30, rangkanggeu kwakceunadung 410, nah keda lidung 1,000. 11 Kecak nah rangkanggeu lidung pelane ge 5,400. Sheshbazzar aidungde pelane langgi kedimedung Babylon gade Jerusalem ga kemiedau pung nghang lu.