1 Pecai cika kelunghme Josiah napei Jehoahaz de kedetlu, nah pecu peu pe pei bam leu eh Jerusalem ga hegwang teilu. 2 Jehoahaz* pa mmi ngkaiehkecum dige pa hegwang teilu, nah pa Jerusalem ga keicum ge hegwang tei. 3 Egypt gwangpei pecu Jerusalem gade keu mpetdi, nah Judah de peu rangkanggeu talent haige nah kecak talent ge su. 4 Egypt gwangpei, Jehoahaz sinabe Eliakim de peu Judah nah Jerusalem reu hegwang teilu (nah Eliakim zi msiak ntsampwa Jehoiakim teidi). Pecai Necho Eliakim sinabe Jehoahaz de Egypt ga ngngwa gwangdi.

5 Jehoiakim mmi ngkaiehmengei dige pa hegwang teilu, nah pa Jerusalem ga mmi kereiehket hegwang tei. Pa RAMPAUBE pe Tinggwang miakdwa gade kemau teidi. 6 Pecai Babylon gwangpei Nebuchadnezzar, pecu gwaketang lütlwe pecu tuihlu delwe kanglu, Babylon ga ngngwa gwang kerane. 7 Nebuchadnezzar RAMPAUBE ki gade hema kesa pwalu delwe Babylon ga pung gwang, nah pe hegwangki Babylon ga teugwang kailu. 8 Jehoiakim tei kegwang kedadung cai, pa tei kegai kemneeu tadung, nah pe kesia ngau kelu, ainie, cidungde Judah nah Israel gwangpeidung hakwak gage raupwala. Pecai pe napei, Jehoiachin, pe bam leu eh hegwang teilu.

9 Jehoiachin mmi heset dige pa hegwang teilu; pa keicum eh ziangrei ge Jerusalem ga hegwangtei. Pa RAMPAUBE miakdwa gade kemau teidi 10 Heriakting gwang ge, Hegwangpei Nebuchadnezzar minadung de langgai nah pecu Babylon ga ngngwa gwang, RAMPAUBE ki gade mabam pemi kehungdung de si eh, nah pe kibaume pei Zedekiah de peu Judah nah Jerusalem reu hegwang teilu.✝

11 Zedekiah mmi ngkaiehket dige pa hegwang teilu; pa Jerusalem ga mmi kereiehket hegwang tei. 12 Pa RAMPAUBE pe Tinggwang miakdwa gade kemau teidi. Caihakecibe Jeremiah, RAMPAUBE sam rang kelabe dwa de pa pecu tei henah luma. 13 Zedekiah de Hegwangpei Nebuchadnezzar liede ngngwa reniadi, peu pecu masanglu zie lie Tinggwang zi gade pe dage sampet kegaibe de. Dede Zedekiah RAMPAUBE, Israel Tinggwang da nreu gwang raudi nah pe lung takdi. 14 Cipaureude, cingkume muiteume leune nah minadung kette samsanglu tadi, delwe penui heleuh kedame kemneeu zaidung nzuidi. Penui RAMPAUBE ki, pa Jerusalem gade teimci kelude tei heradi.

15 RAMPAUBE, penui paume Tinggwang, pe samgwame penui dage langgai daidai gai, kedanemene pa pe minadung nah pa lungh kebam nide de helungnei kecune. 16 Dede penui Tinggwang samgwame de teu henui tei, pe sam mlai, nah pe caihakecime de teu henui teidi, RAMPAUBE rata pe minadung da cangsiak kemaktane, kengha gah kedi kecang.✝

17 Cine Tinggwang Chaldeame gwangpei de penui dage ngngwa gwang, penui rehangmedung de kemci ni gade kingtie le teitsetdi, nah rehangme de mede releime, kecingme mede peu-pukedime dede ngaunggia beu ma. Tinggwang penui pelane de peba gage kai beudi. 18 Tinggwang ki gu maniadung pelane, keceu kedi, RAMPAUBE ki, hegwangpei nah pe kangga kedime mabamdung pelane pa Babylon ga pung gwangdi. 19 Penui Tinggwang ki ru ngkaudi, Jerusalem kirie tei ngkaudi, hegwangkidung pelane rudi, nah cika ma ngau keyi leune teimsia di. 20 Hegwangpei kingtie gade tsailu kemakme de Babylon ga ngngwa gwangdi. Persia gwangram ngkieng cuhlu kemaktane penui pe kila nah pe name kilame teidi. 21 Aide kegwang au Jeremiah ne rang kebeu RAMPAUBE sam de teicanglu kerane, kideube Sabbath kemtak zie mnei canglu kemaktane. Ainzwa eh kideube mrwa kebamtane pe Sabbath mneilu, mmi riakhena ge ainzwa tet gwanglu kerane.

22 Cyrus, Persia gwangpei, hegwang tei raitu bekum, RAMPAUBE sam Jeremiah ne kerang de peu teicanglu kerane, RAMPAUBE Persia gwangpei, Cyrus lung teigai, pe hegwangram pelane ga ndu gai lu kerane, nah kerau gage de kailu kera. Pa rangdi, 23 "Persia gwangpei, Cyrus ainzwa ranggai: RAMPAUBE, tinggim Tinggwang, acu kideureu ga hegwangram pelane pwapeu da. Pa acu Jerusalem ga pe ziemne ki ge tei kera aja kaigai, cide au Judah ga. Pe mina pelane gade caugame nnui kakga bam bi, peu RAMPAUBE nnui Tinggwang de, nnuide ngngwala lu. Peu pecu hangdeu cika miecu,"