1 Cu Kahkegwang ngyi pelane cangdi ge, Israel mina cika kebamme pelane Judah namdidung leune kebam ga miedi nah tsusumdung teipang kecaidi nah penui Asherah rabepui tsusum de teipangdi, nah penui Judah nah Benjamin, nah Ephraim nah Manasseh pelane ga nlumkemakme reca nidung nah recabamdung de teipang di, penui cidungde pelane teimsia cangdi kemaktane. Pecai Isrealmedung pelane pe nam nah pe ki riep cailigwangdi.

2 Hegwangpei Hezekiah cingkume nah Levime mzidung penuide mzi pwa kebam ria gade heta ketsamtsam nlumbeu, Levime nah cingkume de pe ta riep nlumbeu. Pa penuide keru recadung nah kekangbau recadung, hegwa tei kera, ketwa peu kera, nah RAMPAUBE kerecaki kirie gade hetwa peu kerane mzibeu. 3 Hegwangpei pe mabam gade keru ratak ziemne kaigai beula, cide cai, tingcang nah tinghegi keru recadung ziemne, nah Sabbath tingbadung ga keru reca ziemne, keici ngyi, nah hengyi kela ngyidung, RAMPAUBE zai gage rauteu kelade tei kerane. 4 Cipaureude, pa Jerusalem ga kelunghmedung de cingkume nah Levime qwa pwapeu kera aja kaibeu, iciu eh penui RAMPAUBE zai de mzai kecu ga laikai teilu kerane. 5 Aja cide kaibeu herizi, Israel ga minadung mei raitube, zau keheci, maca, heliadui, nah penui luh gade ngau kelu leune gade teugwang beu. Penui kereizige hema leune gade teugwang beu, cide au kekiee ge. 6 Judah namdidung ga kelungh Israelme nah Judahme de kauhau nah meurün kereizige, nah kemci niadung ziemne kereizige penui RAMPAUBE Tinggwang dage kai ntsam kebeu teugwang beu, nah penui cidungde kekiee ge hekwalu. 7 Penui kei pekecum bekei gade penui makai de hekwa mdeu lu, nah penui kei pehena bekei ga hekwa canglu. 8 Hezekiah nah muiteume gwang eh makai kieesüt kebam de ngaulu ge, penui RAMPAUBE nah pe mina Israel de samlam beu. 9 Pecai, Hezekiah cingkume nah Levime de mapeu ha keteugai. 10 Azariah, cingku kedibe, Zadok leuhbe, pecu keli eh ranggai, "Minadung RAMPAUBE kiga mapeudung teugwang mdeu kedi gade, anui tyeiset lu nah kekieege banghlu, kedanemene RAMPAUBE pe mina dungde samlam kebeune. Aika kebam kekiee aide bangh kelubedung da."

11 Pecai Hezekiah RAMPAUBE ki gage kehekwa kibung tei kera aja kaigai, nah penui cidungde rengeilu. 12 Pecai penui samsang süt eh mapeudung, kereizige pelane nah RAMPAUBE dage tei mcigai kedidung pwa nlütlu. Levime pei Konaniah de cidungde peu kerengeibe teilu, nah pe sinabe Shimei de peu pe kenghabe teilu. 13 Jehiel, Azaziah, Nahath, Asahel, Jerimoth, Jozabad, Eliel, Ismakiah, Mahath, nah Benaiah penui Konaniah nah pe sinabe Shimei kangga kenghamedung, Hegwangpei Hezekiah penai Tinggwang kiga kedibe Azariah ne kedet kelumedung. 14 Levime pei Imnah napei Kore, kerecaki kepetle rieki ga kekwabe, Tinggwang da kekai suiyi makaidung rengeila, nah RAMPAUBE de reca kebeu mapeudung nah mci tube recadung rengeila. 15 Cingkume namdidung ga, pe kangga kebamme cai, Eden, Miniamin, Jeshua, Shemaiah, Amariah, nah Shecaniah. Penui samsang eh taktyei aidungde penui sinamedung de penui mzidung rehi gade kedi keceu de mzi nsam beula. 16 Penui mipeina mmi kecum nah pe nreume, penui paume hezi kerau laisiukwak ga hezi kebamme penui ta nah penui mzidung rehi gade hera tingba heta tei kera RAMPAUBE ki ga kelütme de, penui qwa peucio la. * 17 Penui cingkume de penui pautsa rehi gade, nah Levime mmi ngkai nah pe nreume de penui tadung nah penui mzidung rehi gade penui qwa ramsiak beula. 18 Penui penui namedung pelane, penui naudung, penui napeidung, nah penui napuidung de hemaa pelane ga silu, kedanemene penui kemci ga penui samsang kecune. 19 Cingkume, Aaron leuhmedung, penui namdidung gu renam luhdung ga lungh kebamme, mede namdi kehei leune ga lungh kebamme ziemne cai, cingkume kakga, midung ge hepüt pung eh, cingkume kelakdung ga mipei pelane nah Levi pautsadung ga pezi kebamme leune de penui qwa mzi beula.

20 Judah pelane ga hegwangpei Hezekiah aidungde tei gwanglu. Pa RAMPAUBE pe Tinggwang dwa gade keyibe, petaube nah kesamsangbe teicanglu. 21 Pa Tinggwang ki ziemne heta ketei leune ga, hezai nah ajadung kemzai ga, pa Tinggwang de peeilu nah pa pe mlung pelane teu eh teilu, nah pa ngkienglu.