1 Ahaz mmi ngkai dau pa hegwang teilu, nah pa mmi kereieherok ge Jerusalem ga hegwang tei. Pa au pe pau David ketei nzwa, RAMPAUBE miakdwa gade petaube teilu ma. 2 Meliene, pa Israel ga hegwangme puisaudung nzuidi; pa Baal miedung hegeule teilu. 3 Cipaureude, pa Ben Hinnom langkam gade marim kehengui rugai nah RAMPAUBE Israelme dwade, heleuh gwagi kedime kemneeu ta tei keladung zai reli eh pe namedung de keru ratak tei gaibeu. 4 Pa nlum kemakme reca nidung, hangdeutudung nah tsingbang kemdiak leune kang gage ratak teigai nah marim kehengui rugai.

5 Ciziemne RAMPAUBE pe Tinggwang pecu Aram gwangpei ba gage kaidi. Aramme pecu ngamlu delwe hebaangme maadi kekiee gede pe dade ngngwa tetdi, nah Syria namdi sumbe Damascus ga penuide ngngwa gwanglu. Ahaz de Israel gwangpei ba gage kaibeudi, pa pecu mina kekiee gede tei ketset gade ngamlu. 6 Kedanemene Remaliah napei Pekah Israel gwangpei langnaige gage reugwame mina 120,000 de Judah gade teitsetdi, nah cidungde pelane mina kengkiengme, kedanemene penui RAMPAUBE penui paume Tinggwang de püt kedine. 7 Ephraim gade kegwang kengkieng kau Zicri ne hegwangpei napei Maaseiah, hegwangki ga kedibe Azrikam, nah hegwangpei kangga ditube Elkanah de teitsetdi. 8 Israel reugwame mipuidung, pe napeidung nah pe napuidung 200,000 ge de penui kibaume dade tuilu. Penui hema kekieege de tuilu, nah cidungde penui Samaria ga pung cailigwangdi. 9 Dede cika RAMPAUBE caihakecime ge bam, pezi cai Oded. Pa reugwame Samaria ga gwang kelame de redau kera tetpet. Pa penui dage rangdi, "Kedanemene RAMPAUBE, nnui paume Tinggwang, Judah de pe rata süt kedine, pa penuide nnui ba gage kaibeu dida. Dede nnui penuide nnui rata süt eh teitset kedi de ziemne pe ha tinggim ga hangcang dida. 10 Cu nnui Judah nah Jerusalem ga mipei nah mipuidung de nnui baang tei kera cetla. Dede RAMPAUBE nnui Tinggwang dage nnui kemau teigai kedi ziemne maudi de meni? 11 Cu iciucai, a kwa kingneilu: Hebaangme, nnui kibaume dade nnui ngngwa gwang kelume de lang caili dilu, kedanemene RAMPAUBE lunghop nnui da la di delu." 12 Pecai Ephraimme muiteumedung kangge, Jehohanan napei Azariah, Meshillemoth napei Berechiah, Shallum napei Jehizkiah, nah Hadlai napei Amasa, hereu gade cailigwang kelamedung de mlaidi. 13 Penui au penui dage rangdi, "Nnui hebaangme de aika ngngwa gwang so, kedanemene nnui anui maudung nah gikahkedidung gage kaisi kerane, anuide peu RAMPAUBE dage kemau teigai kera cetla, kedanemene anui tei mau kedi au di süt, nah Israel reuga rata sia süt kecu bam dida." 14 Cine reugwame hebaangme nah hema tuikeludung de muiteume nah mina ngkwa kebamme dwa gage kaibeudi. 15 Muiteu hang mdai kedet pwa kebamme, paini rega keludung kesa keulu delwe hebaangme keu maisia kebamme de pwa peudi. Penui penuide paiheni nah picumdung pwapeu. Penuide ketyeikesak pwapeu. Penui rezam zamdung de rengeibeu nah kemneime de gadadung reu gage kailu. Penuide ngngwa Jericho ga penui kilungme da ngngwa cailigwang beudi, (Laira namdi lie de eh qula). Pecai penui Samaria ga cailigwangdi.

16 Peting tie kemak ge cai hegwangpei Ahaz Assyria hegwangpeidung de pecu nghalo kie kerane samgwame langgai. 17 Kedanemene Edomme gwang Judah gwadai eh hebaangme de ngngwa tet kedine. 18 Philistinme lamlwatu pi namdidung nah Judah Negev ga hereu gwala. Penui Beth Shemesh, Aijalon, Gederoth, Soko, Timnah, Gimzo nah cidungde twagwa kebam renamdung si eh gwalu, nah penui cipau namdung ga lungh kera miedi. 19 RAMPAUBE Israel gwangpei Ahaz ziemne Judah de tei henadi; kedanemene pa Judah ga heta siasüt kecu teigai, nah RAMPAUBE dage mausüt kecu teigai kedine. 20 Assyria gwangpei, Tiglath-Pileser, peda gwang eh pecu tei ngkieng si meliene pecu tei keherei di. 21 Kedanemene Ahaz, Assyria gwangpei de ma pemi kehungdung pwapeu kerane RAMPAUBE kerecaki, hegwangkidung, nah muiteume kidung gade hema tui. Dede aide tei kegai ziemne pa magede kemmi ngaulu ma.

22 Hegwangpei Ahaz pa keherei kelu tingdau de RAMPAUBE dage kemau teikiee kidi. 23 Kedanemene pecu ngamkedi Damascusme rabedung dage pa ratak tei kegaine. Pa ranggai, "Aram gwangme rabedung penuide ngha kebeune Ih penui dage ratak teigai zie, iciude penui acu nghalu kerane." Dede cidungde ne pecu nah Israel pelane de kengkap teugwang gaibeu. 24 Ahaz Tinggwang ki gade mania keu hekwalu delwe cidungde teipang takcaidi. Pa RAMPAUBE ki kikamdung ngkuidi delwe Jerusalem lule ailam ge pe ziemne ratakbam teilu. 25 Hera keda de ratak ru gaibeu kerane pa Judah namdi leune ga nlum kemakme reca nidung teilu. Iciu eh Pa RAMPAUBE, pe paume Tinggwang rata teidi. 26 Pa tei kegwang kedadung pelane, nah pa tei kegai leune, raitu gade kamtu kecang, ainie, cidungde Judah nah Israel hegwangme laisiukwak ga raupwala. 27 Ahaz pe paume nzwa tsaidi, nah penui pecu Jerusalem namdi gage kungdi, dede penui pecu Israel hegwangpeidung raudung gage kung ma. Pe napei Hezekiah, pebam leu eh hegwang teilu.