1 Judah gwangpei Jehoshaphat kwak eh Jerusalem ga pe ki ga cailigwang lu. 2 Pecai caihakecime ge, Hanani napei Jehu, hegwangpei de dau kera tetpet nah hegwangpei Jehoshaphat dage ranggai, "Nang kenlienme de ngha bam zieni? Nang RAMPAUBE de ngkau kelame de ku bam zieni? Aipau ta de tei kedi ziemne, RAMPAUBE rata n reu ga bam dida. 3 Ciciuliede, n da makeyi dungge bam, nang Asherah miedung hangdeu cikade keugidi kecune, nah nang Tinggwang de peei kera n mlung gage kaipwa kebamne."

4 Jehoshaphat Jerusalem ga lunghdi; nah pa minadung kakga mie dai, Beersheba namdi gade Ephraim kideutu deudi ga kecang nah penuide RAMPAUBE penui paume Tinggwang da ngngwa cailigwang lu. 5 Pa Judah hangdeu leune riekelu namdidung pelane ga, namdi ge cai namdi ge ga, tutiakmedung kaibeu. 6 Jehoshaphat tutiakmedung dage ranggai, "Nnui tei maikesia de tei teunelu, kedanemene nnui au mina ziemne hetutiak ma, dede RAMPAUBE ziemne; pa hetuketiak ga nnui de ngngwala. 7 Cu cine, peu RAMPAUBE mie kehing de nnui reu ga bam lu. Nnui hetuketiak dau mriaklu, kedanemene RAMPAUBE, anui Tinggwang da mide kecwa, mede heneuherüt ketei, mede hetauhenim gah."✝

8 Cipaureude, Jehoshaphat Jerusalem ga Levime nah cingkumedung kangge, nah Israel leuhme ki ga muiteumedung kangge de kedetlu, RAMPAUBE zi gade hetutiak kerane, nah kesamdau lu kera ziemne. Penui Jerusalem ga lungh bam. 9 Pa penuide ainzwa rang eh ranglia beu di, "Nnui RAMPAUBE de herüt peu eh, samsang eh, nah nnui mlung pelane pwa pe ta tei maisia. 10 Nnui sinamedung penui namdidung ga lungh kebamme dade kesamlim kecu ge nnuida gwang kecu dau, mide teitset kedine, hezaidung nah ajadung, rau kenzeu zaidung mede kaikebeu zaidung ha ziemne, nnui penuide ranglia lu maisia, iciu eh penui RAMPAUBE dwa gade maudi melu kerane, mecai n da nah n sinamedung da rata gwang dizie. Nnui aide teilu iciulude nnui mau dilak. 11 Pielo, Amariah cingku kedibe ne RAMPAUBE renet zaidung pelane ga nnui reu zie. Judahme leuh muiteube, Ishmael napei Zebadiah, ne hegwang ha pelane reu pie zie. Levime hezai kemzeube tei kemzai ga nnuide kenghabe tei zie. Kuulu nah hezaidung mzailu, nah RAMPAUBE de peu keyime de nzangla lulo."