1 Abijah pe paumedung de ngngwa zipdi, nah penui pecu David namdi gage kungdi. Asa, pe napei, pe bam leu eh hegwang teilu. Pe tingdau hangdeube ga mmi kerei ge nciepniep eh bamlu.

2 Asa RAMPAUBE pe Tinggwang dwade keyibe nah petaube teilu, 3 kedanemene pa sangme recabamdung nah reca nidung keugi kedine. Pa tangtsu tsiadung teikaudi nah Asherah miedung bi ngkaudi. 4 Pa Judahme de RAMPAUBE, penui paumedung Tinggwang de peei lulo aja kaigai, nah hezai nah ajadung de mzai lulo beu. 5 Pa reca nidung nah kehengui recabamdung Judah namdidung pelane gade keu gidi. Pe kangga hegwangram mtakziune bamlu. 6 Pa Judah ga riekelu namdidung teilu, kedanemene kideube ga lungciep bam, nah cipau mmidung ga pa hereu tei ma, RAMPAUBE ne pecu lungciep kepeu ziemne. 7 Asa Judah dage rangdi, "Anui namdi aidungde tei nah cidungde herie tei twagwa digo, nah reneidung, heriekidung, nah kudadung; kideube au anui gu reu kedanemene anui Tinggwang RAMPAUBE de anui peei kelune. Anui pecu peeilu, nah pa anuide lungciep kehei lamde de peuda." Cine penui cide tei canglu. 8 Asa da reugwamaa hegeudung nah hengeidung kepwame bam; Judah gade mina 300,000, nah Benjamin gade mina 280,000 hegeudung kepwame nah lakpi kekapme bam. Aidung pelane kengkiengme.

9 Cushme ge Zerah reugwamaa 1,000,000 nah bagidung haicum de ngngwa lwe penuide renia gwang; pa Mareshah ga gwanglu. 10 Pecai Asa pecu redau kera tetpetlu, nah penui Mareshah ga Zephathah Langkam ga reugwa sapdung mteilu. 11 Asa pe Tinggwang, RAMPAUBE dage sahgai, nah rangdi, "RAMPAUBO, mige hemaa kekiee de redau eh pe kengkieng gah kedi dau pecu ngha kera migede gah dede nang rünne lie. Anuide nghabeu lo, RAMPAUBE anui Tinggwang, kedanemene anui au ncu ngngei bam, nah n zi gade mina aikieege de renia kera anui gwang luda. RAMPAUBO, nang au anui Tinggwang; peu mina de ncu ngam diso." 12 Cine RAMPAUBE Cushme de Asa nah Judah dwa gade ngamlu; ge Cushme pakdi. 13 Asa nah pecu ngngwa kela reugwame penuide Gerar ga zuimie di. Cushme kekiee kau kedine penui cuh dailu tadi, kedanemene RAMPAUBE nah pe reugwame dwa gade penuide ngkap cangsiak kedine. Reugwame hema tuikelu kekiee pungtet di. 14 Reugwame Gerar twagwa kebam renamdung pelane ngkapdi, RAMPAUBE rata cika kelunghme reuga gwang kedine. Reugwame renamdung pelane tuilu, nah hemadung kekiee gede tuilu. 15 Reugwame meurün kekwame paiki bamdung de ngkapdi; penui meurün kekiee ge nah utdung de pungtet di, nah pecai penui Jerusalem ga cailigwang di.