1 Rehoboam hegwang ngkieng petlu nah pa ngkieng luge, Judah ga pelane de RAMPAUBE zai de gidi, nah pecu ngngwa eh Israelme pelane de cide gidi. 2 Hegwangpei Rehoboam hegwang teikelu mmi mengei bekum, Egypt gwangpei, Shishak, Jerusalem de ngngwa renia di, kedanemene minadung RAMPAUBE dade masang luta kedine. 3 Pa bagidung cangge eh haina nah hekwen keteume cang riakherok de ngngwa gwang. Egypt gade reugwame peeikap gai kelak pecu ngngwa gwang: Libyame, Sukkimme, Cushme. 4 Shishak Judah da kebam riekelu namdidung tuilwe Jerusalem ga gwanglu. 5 Cu Caihakecibe Shemaiah au Rehoboam nah Shishak ziemne Jerusalem ga gwang ngkwa kebamme Judah muiteumedung da gwanglu. Shemaiah penui dage rangdi, "RAMPAUBE ainzwa rangla: Nnui acu püt dida, cine Ih de nnuide Shishak ba gage kaibeu dida." 6 Pecai Israel gwangnadung nah hegwangpei penuide tei henah lwe rangdi, "RAMPAUBE au masang lie." 7 Judah ga minadung penuikatei de tei henah kelu RAMPAUBE ngaulu ge, RAMPAUBE sam Shemaiah da gwang rang eh, "Penui au penuide tei henah luda. Ih penuide ngkap dilak; Ih penui kangge de au keli beuzie, nah Shishak ba teu eh a rata Jerusalem gage rui gailak lie. 8 Dede, penui au pegu kilamedung dizie, iciu eh penui a gwa ketei nah deudi kedame gwangpei gwa ketei dainzwa bi cilu zie."

9 Cine Shishak, Egypt gwangpei Jerusalem de ngngwa renia delwe RAMPAUBE kerecaki ga mabamdung keu tetdi, nah hegwangpei ki ga mabamdung de. Pa maleune keu teu kapdi; pa Solomon ne teikelu kecak geudung de keteudi. 10 Hegwangpei Rehoboam cidung keleu gage hetageu gu geudung tei gailu delwe cidungde kekwame muibedung ba gage nlum gaidi, penui au hegwangpei ki kikamdung kekwame. 11 Hegwangpei RAMPAUBE kerecaki ga kelüt dau, kekwamedung cidungde pungla; pecai penui cidungde kekwaki gage teu cailigwang dai dila. 12 Rehoboam pecu tei henah luge, RAMPAUBE rata pe dade nreu di, iciu eh pecu ngkapzing de melu kerane; cipaureu de, Judah ga makeyi kesa ngaulu kera lareu.

13 Cine Hegwangpei Rehoboam Jerusalem ga pe hegwang teingkienglu, iciu eh pa hegwang teigwang. Rehoboam hegwang teicuh keludau, pa mmi riakdai-ket di, nah pa Jerusalem ga mmi kereiehena ge hegwangtei, Israel leuh pelane gade RAMPAUBE ne kedetkelu namdi dega, iciu eh pa cikage pezi kailu kerane. Pe pui zi au Naamah Ammonme pui. 14 Rehoboam kemau teidi, kedanemene pa au pe mlung teu RAMPAUBE de peei lu kemakne.

15 Judah tingpile hegwangbam gu hegwangpei Rehoboam ha kedadung liecai, raitu gade gwang kamtu kecang, cidungde caihakecibe Shemaiah laisiukwak nah caihakecibe Iddo keraudung ga la meni, cika paupai hadung nah Rehoboam penai Israel tingpeule hegwangbam ga hegwangpei Jeroboam kakga hereu tei jüja kegwang ha dungde sibam meni? 16 Rehoboam pe paumedung nzwa tsaidi nah David namdi gage kungdi; pe napei Abijah pe bam leu eh hegwang teidi.