1 Pecai Jehoshaphat pe paumedung nzwa tsaidi nah pecu David namdi ga penuide kekung gage kungdi. Pe napei Jehoram pe bam leu eh hegwang teilu. 2 Jehoshaphat napei Jehoram pe siname mipeina aidungde bam: Azariah, Jehiel, Zechariah, Azariahu, Michael, nah Shephatiah. Penui pelane Israel gwangpei Jehoshaphat napeidung. 3 Penui pei penuide rangkanggeu, kecak nah keda ma pemi kehung mapeu kekiee, nah Judah ga riekelu namdidung si eh pwapeu, dede pe hegwangram Jehoram de pwapeudi.

4 Cu Jehoram pe pei hegwangram leulu, nah pe hegwangram tei ngkieng luge, pa pe siname peciakne de nah Israel ga muiteume keda ketsamtsam dungde kingtie le bi tsetdi. 5 Jehoram hegwang tei keludau pa mmi camreiehkena di, nah pa Jerusalem ga mmi heset ge hegwang tei. 6 Pa Israel gwangpeidung puisau nzuidi, Ahab kelak tei kedi nzwa, kedanemene pa Ahab napui de pe nau kelune, nah pa RAMPAUBE miakngau gade kemau teidi. 7 Ciciuliede, RAMPAUBE David kelak tei ngkapdi neu tadi, kedanemene pa David da ngngwa samkak kelune; pa pecu nah pe leuhme de hegwang tei jüja kera peu zielie sampet beu kedine.

8 Jehoram hegwang tei kebam tingdau, Edomme Judah kangga kebam gade ngngwa siadi, delwe penuikatei penui reu hegwang ge kedetlu. 9 Pecai Jehoram pe reugwa muibedung nah pe bagidung pelane de nzanglwe tetpet. Pa cuh delwe Edomme pecu nah pe bagi muibedung de twagwa kebamme de ngngwa regi kecu dau tingmui dida. 10 Cine henai kecang Edom Judah de ngngwa sia eh pe kangga lungh si tadi. Cipau tingdau Libnah namdi de pe kangga kebamme de ngngwa siadi, kedanemene Jehoram, RAMPAUBE, pe paume Tinggwang de püt kedine.

11 Cipau reude, Jehoram Judah lamlwatudung gage nlum kemakme reca nidung de teigai nah pa Jerusalem ga kelunghmedung de peu helipuidung nzwa lunghdi nah pa Judah ga minadung de kemau ga peu ladi. 12 Caihakecibe Elijah laisiu ge Jehoram dage kaigai. Ainzwa rang eh, "Aide RAMPAUBE, n paume David Tinggwang ainzwa ranggai: Nang, n pei Jehoshaphat puisau ga, mede Judah gwangpei, Asa puisau mzui ma, 13 dede Israel gwangdung puisau nzuidi nah Judah nah Jerusalem ga kelunghme de, Ahab kilungme ketei nzwa, peu helipui nzwa lunghdi, nah kedanemene nang n sinamedung, n pei kilungme, n swa yiki kecume de teitset kedine, 14 cine pielo, RAMPAUBE n minadung, n nau n name da saja kedi ge kaigai zie nah n mabam pelane ngkapdi zie. 15 N raidung ga mateei ge ziemne nang mra süt dizie, cipau mateei de ziemne n raidung sia cangsiak di kemaktane, tingnaige swa tingnaige sia reureu dizie."

16 Cush taiga kebam Philistinme penai Arabme de RAMPAUBE ne Jehoram de ngngwa regi kera helung teigai beudi. 17 Penui Judah de gwaketang, cide lüt tuilu, delwe hegwangki ga mabam ngaukelu pelane pung tetdi. Penui pe napeidung nah pe naudung dede ngngwa tetdi. Pe da pe napei henatube, Jehoahaz de gwale keda hangge de de kaidiak beu ma.

18 Aidungde pelane cai, RAMPAUBE pecu pe rai gage yi daigai kelak mateei ge kaigai. 19 Cidau mmi kena ge cang kera tingdau, pe mra de ziemne, pe rai siadi, nah mateei cide sia süt kedi ziemne pa tsaidi. Pe minadung pe dwa ga pe paume ziemne tei kegai nzwa penui pecu herüt peu eh mimang gede teigai ma. 20 Jehoram mmi camreiehkena dau pa hegwang teilu; pa Jerusalem ga mmi heset ge hegwang tei, nah pa tsai kedi dau migede pecu hei eh hap ma. Penui pecu David namdi gage kungdi, dede hegwangme raudung gage kung ma.