1 Judah cuikui hegwangpei Jotham mmi ngkaiehmengei dau pa hegwang teilu; pa Jerusalem ga mmi kereieherok ge hegwang tei. Pe pui zi cai Jerushah; pa Zadok napui. 2 Ma pelane pa pe pei Uzziah, ne lunghlia kebeude mzai eh, RAMPAUBE miak dwade petaube teilu. Dede pa au RAMPAUBE kerecaki ga lüt kecu teima. Dede minadung kemau tei eh lungh ladi. 3 Pa RAMPAUBE kerecaki nreule kirie de teilu, nah Ophel hangdeutu gage pa kirie kekiee ge tei silu. 4 Cipaureude pa Judah hangdeutu nam ga namdidung teilu, nah hegungdung gage pa hegwangki nah reketbamdung teilu. 5 Pa Ammonme gwangpei de de ngngwa regi nah pa penuide ngamlu. Cipau kum de, Ammonmedung rangkanggeu talent haige*, wheat cangkerei mdet *ge, barley cangkerei mdet ge pecu pwa peu. Ammonme mmi pekenabe kum nah pekecumbe kum de cinzwa pecu pwa peu. 6 Cine Judah hegwangpei Jotham ngkieng süt lu kedanemene pa ntiprip eh RAMPAUBE pe Tinggwang dwa ga tet kegaine. 7 Nah Jotham tei kegwang keda hadung, pe reugwadung, nah pe zaireli pelane, ainie, cidungde Israel nah Judah gwangpeidung laisiukwak gage raupwala. 8 Pa mmi ngkaiehmengei dau hegwang teilu; pa Jerusalem ga mmi kereieherok hegwang tei. 9 Jotham pe paume nzwa tsaidi nah penui pecu David namdi gage kungdi. Pe napei, Ahaz ne pe bam leu eh hegwang teilu.