1 Hegwangpei Solomon RAMPAUBE ki nah pekatei pe ki ketei mmi ngkai cang gwang dige, 2 Solomon Tyre gwangpei Hiram pecu kepeu namceudung de retak dailu, delwe pa cidungde ga peu Israelme de lunghlu.

3 Solomon Hamathzobah namceu de gwaketang nah cide ngamlu. 4 Pa hetaideu gage Tadmor namceu, nah Hamath cuikui gage hema kehebau namdidung pelane teilu. 5 Pa Beth Horon Nreube nah Beth Horon Ngkangbe namdidung de, riekelu namdidung, kiriekidung, heriekidung nah hegeuriadung de si eh teilu. 6 Pa Baalath namdi nah pa gumkelu ga hema kehebau namdidung pelane, nah pe bagidung ziemne namdidung pelane nah pe hekwen kepungme ziemne namdidung teilu, nah pa Jerusalem ga, Lebanon ga, nah pe hegwang kangga kebam deudung leune ga pe renga ziemne pa tei keneu leune teilu.

7 Minadung bang pwa kebam Hittime, Amorme, Perizzitme, Hivime, nah Jebusme, Israelme kemakmedung ziemne cai, 8 penui leuhmedung penui cai hangdeu ga bang kenzeumedung, Israelme ngkapdi kemakmedung—Solomon penuide teu eh kemei ta keteimedung teidi, henai kecangde penui cinzwa eh la. 9 Ciciude, Solomon au Israelme de teu eh kemei ta keteimedung tei dima. Meliene, penui au pe reugwamedung, pe muibedung, pe kedimedung, nah pe bagi maadung muibedung nah pe hekwen keteume teidi. 10 Aidungde hegwangpei Solomon gu kedi kemlangme minadung de keteume, penui mina 250, penui au heta keteimedung de pie rengei la.

11 Solomon David namdi gade Pharaoh napui de pe ziemne tei kelu ki gage ngngwa gwang gailu, pa pekatei peda rangdi, "A nau Israel gwangpei David ki ga lungh kerabe ma, kedanemene RAMPAUBE samkakbung gwangkelu leune ga au mci lu."

12 Pecai Solomon au kigu dwaga pa teipwa kebam pe recabam gage RAMPAUBE dage keru recadung teigai beu. 13 Pa tingnairamsang tei maikesia de nzwa ratakdung teigai; pa cidungde reca teigai beula, Moses zai ga kebam nzwa, Sabbath tingbadung ga, kei kehecidung, nah tingkum ramsang tei kela hengyi piacum ga: Tsehi kaikemak Tangku Ngyi, Mtakkakdung Ngyi, nah Paikidung Ngyi.

14 Pe pei David sam kaikebeu de mnei eh, Solomon cingkumedung de penui ta ga hemaa mzilu, nah Levimedung de penui sapdung gage, Tinggwang de twa nah cingkumedung dwaga hegwatei kerane, tingnairamsang tei maikesia nzwa. Pa kirieki kekwamedung de de penui mzidung rehi gade herieki leune ziemne relang beudi, kedanemene David, Tinggwang minabe, aide de teilo rangdiak kebeune. 15 Maniakibungdung mede cingkumedung nah levimedung dage hegwangpei ajadung kai kebeude gade mina aidungde penui ta teita dima.

16 Aide nzwa eh RAMPAUBE ki bangdwa teicuh kecu ting gade cide teicanglu kemaktane Solomon ne heta tei lulo kebeude tei canglu. RAMPAUBE ki de tei canglu.

17 Pecai Solomon Ezion Geber nah pecai Elath namceu ga Edom deudi, duikung ga miedi. 18 Hiram pe dage pegu kedimedung ne aja teu eh, mina jaaidi zai kecimedung de si eh liemdung langgai, nah Solomon kilamedung de ngngwa eh penui Ophir deudi ga miedi nah penui cikade kecak 450 talents* keulu delwe Hegwangpei Solomon da cide teugwang beu.