1 Cu Solomon RAMPAUBE zi ziemne kerecaki ge tei kera nah pe hegwangram ziemne hegwangki ge tei kera riem lu. 2 Solomon mina cang riakhena de maniadung pwa kera, nah mina cang riakheset de lamlwatudung ga tangtsu pang kerane, nah mina 3,600 de penuide rengei kerane nlum beudi. 3 Solomon Tyre gwangpei Hiram dage sam ge langgai eh ranggai, "Nang a pei David dage ketei nzwa, pecu lungh kerane ki ge tei kera cedar lwadung langkegai nzwa, acu ngngwa cinzwa tei beulo. 4 Pielo, Ih a Tinggwang RAMPAUBE zi ziemne kerecaki ge teizie, cide pe ziemne heni kemci ge zie, pe dwaga marim kehenguidung rugai kerane, Tinggwang de recakebeu tangku de kai kerane, nah tingcang nah tinghegi keru recadung ziemne, Sabbath benai nah Keici Ngyidung ziemne, nah RAMPAUBE anui Tinggwang hengyi tingdau ziemne. Aide kelungta Israelme ziemne. 5 Ih tei kerabe ki de disüt zie, kedanemene anui Tinggwang au hera kedadung swa diki lu. 6 Dede cau Tinggwang kerecaki ge teilu buino? Kedanemene tingkideu pelane nah tinggim kecangde pecu mrak gailak lu? Pecu ki ge teibeu kera Ih cauno, pe dwaga ratakdung rugaibeu kera gwale? 7 Cine acu kecak, rangkanggeu, hetageu, hegeu, nah gieremang, kegie, nah mamai kenzai, ta tei kecime gede langgai beulo, tsing gage ketsamtsam teilu kebui keci gede. Pa Judah deukui pelane nah Jerusalem namdi ga ada kebam matei kecime, a pei David ne kepeudung de de ngngwa bam zie. 8 Acu Lebanon gade cedar, cypress, nah algum bangdung de si eh langgailo, kedanemene Lebanon* ga n kilamedung dainzwa tsing dang labi ci kecu Ih cibam kecune. Ainie, a kilamedung n kilamedung de ngngwa bam zie, 9 a ziemne tsing kekiee ge mteilu kerane, kedanemene Ih ki teilai kebamde disüt, nah miswakegah ge zielu. 10 Pielo, Ih n kilamedung de tsing dang keramedung, wheat cors cang ngkai*, barley cors cang ngkai, zau baths cang ngkai, nah maca baths cang ngkai* peu zie." *

11 Pecai Tyre gwangpei Hiram, kerau gade sam keligai, cide pa Solomon dage langgai: "RAMPAUBE pe minadung de ku kecune, pa ncu pwa penui reu hegwang tei luda." 12 Pecaide, Hiram rangdi, "RAMPAUBE, Israel Tinggwang, tinggim nah kideu tei kegaibe de twa lu, pa David hegwangpei de kemteu napei ge peuda, kemriak nah kecikecet le puih eh, pa RAMPAUBE ziemne kerecaki ge nah pekatei ziemne hegwangki ge tei zie. 13 Cu Ih heciem teikeci pei ge Huram-Abi de langgaila, pa au kecikecet le kepuih pei ge. 14 Pa au Dan leuhme napuime puige napei. Pe pei Tyre deudi gade kegwangme ge. Pa au kecak, rangkanggeu, hetageu, hegeu, tangtsu, nah tsing, nah gieremang, kenzai nah mamai kegie, nah langcimpai, teu heta tei kecime ge. Pa au mamie keheri ta keheibede tei nah perehi keheibe ketei gade heciem cilie. Peu heni ge pe ziemne n ta teikecime nah a mpaupei n pei David, ta keteime kakga mteibeu lulo. 15 Cine cu, wheat nah barley, maca nah zau, a mpaupei rang kebamde, aidungde pecu peu pe kilamedung dage langgai lu. 16 Anui nang tsing teumaikesia kieege Lebanon gade tsing bi beuzie. Anui cide kangkecüt lwe Joppa ga jaaidi gade n dage punggwang beuzie, nah nang cide Jerusalem ga pung nghanglu zie."

17 Solomon Israel deu ga kebam sangme pelane de peigai, pe pei David, penuide kepei nzwa eh. Penui mina 153,600 peilu. 18 Pa penui mina cang riakhena de mapwa kera, mina cang riakheset de peu lamlwatudung ga tangtsu pang kera, nah 3,600 de peu mina de matei lu kera rengei kerane nlum beudi.