1 Judah gwangpei Amaziah mmi ngkaiehmengei dau pa hegwang teilu; pa Jerusalem ga mmi ngkaiehekui hegwang tei. Pe pui au Jerusalemme pui ge, pe zi Jehoaddan. 2 Pa RAMPAUBE miakdwa gade petaube tei, dede lungsang gade tei ma. 3 Amaziah hegwang tei ngkinglu herizi, pa pe pei, hegwangpei de daptset kedi kilame de teitsetdi. 4 Dede pa dapketsetme name de teitsetdi ma, dede hezai ga raupwa kela de nzwa teilu, Moses laisiukwak ga, RAMPAUBE sam kai kebeu de nzwa, "Pe peime pe name ziemne tsai dilak, mede pe name pe peime ziemne tsai dilak. Meliene, mileune de pekatei pe mau ziemne tsai zie." *

5 Cipaureude, Amaziah Judahme de hekwalu, delwe penui pautsa rehi gade penui maa mzilu, pecang reu nah pehai reu reugwa muibedung kang gage, Judah nah Benjamin leuh pelane de. Pa penuide mmi ngkai nah pe nreule gade peilu, nah hengei nah hegeu pwa kecime hereu tei kera mtei kelumedung kedetkelu minadung pelane ge 300,000 bam kecu ngaulu. 6 Pa Israel gade reugwame mina 100,000 de de rangkanggeu talent haige* le hezie luilu. 7 Dede caihakecime ge pe da gwang nah rangdi, "Hegwangpei, peu Israel reugwame de ncu nzang mie so, kedanemene RAMPAUBE Israelme nah Ephraim leuhme migede de ngngwala ma. 8 Dede nang magade mie delwe hereu gade kuu nah ngkieng liede, Tinggwang ngauraume de peu ncu ngam luzie, kedanemene Tinggwang da ngha kera, nah ngamlu kera kengkieng kebamne." 9 Amaziah caihakecibe dage rangdi, "Dede Ih Israel reugwame de talent haige peu kedi de dainzwa lai no?" Caihakecibe keligai, "RAMPAUBE cide swade kiee eh ncu peu lubui." 10 Cine Amaziah reugwame Ephraim gade pe da kegwangme de teu ntsamdi; pa penuide kilung gage langgai daidi. Cine penui Judah ga minadung de penui rata süt cuhdi, nah penui rata süt eh kilung caili gwangdi. 11 Amaziah pe lung tei ngkuulu eh pe minadung de teuswalu, Mcai Langkam ga mie kerane; cikade pa Edom reugwame mina cang kerei ge de ngamlu. 12 Judah reugwame mina keda cang kerei gede tuilwe teu tetdi. Penui penuide hetia kehu ga ngngwa mielwe cikade penuide kelien gai, iciu eh penui pelane de tei takcaira dedi. 13 Dede Israel reugwame, Amaziah penuide hereu ga pecu ngngwa mie kelakne lang caili kedimedung, Judah namdidung Samaria gade Beth Horon ga kecang gwaketang. Penui mina cang cum gede teitsetdi nah hema kekiee ge tuilu.

14 Cu, hegwangpei Amaziah Edomme de gitset lwe cailigwang kelucai, pa Seirme gu rabedung pung gwanglu, delwe cidungde de pe rabe tei kera teilu. Pa cidungde dwa keumie nah cidungde dage marim kehengui rugai. 15 Cine RAMPAUBE Amaziah de pe ratadi. Pa caihakecime de pe dage langgai, pa ranggai, "Nang daitei eh mina rabedung n ba gade pe minadung de keli gai kelak rabedung de de reca lano?" 16 Caihakecibe pecu ngngwa mpau kebam dau, hegwangpei pe dage rangdi, "Anui ncu peu hegwangpei de keledeube tei ni? Mtaklu! Dai ziemne ncu teitset lai?" Cidau caihakecibe mtakdi nah rangdi, "Tinggwang ncu ngkapdi kera cet kelu Ih cibam dida kedanemene nang aidungde tei kegaine nah a keledeu sam kingnei kemakne."

17 Cidau Judah gwangpei Amaziah keledeume de ngngwa kempaulu eh Israel gwangpei Jehoash, Jehoahaz napei nah Jehu tsapei dage sam langgai, eh ranggai, "Gwanglu, hereu gade kezumok eh hangge gede redau go." 18 Dede Israel gwangpei Jehoash Judah gwangpei Amaziah dage samgwame de aipau samgwa gade keligai, "Lebanon ga kebam hetuhum ge Lebanon ga cedar bang ge dage, ‘N napui de peu a napei nau lo’ de eh sam langgai, dede Lebanon ga renaam kaune kahgwang eh hetuhum de dau ngkaudi. 19 Nang ainzwa ranggai da, ‘Pielo, Ih Edom de ngam luda,’ nah nang hegie bam. Nang ngkieng kelu ga hegie lulo, dede kilung ga bamlu, kedanemene nang daitei nkatei n da kekap teugwang gai eh nangde nah Judah de ncu ngngwa kau lai no?"

20 Dede Amaziah kingnei tadi, kedanemene aide Tinggwang lungning kedine, ciu eh pa Judahme de penui ngauraume ba gage kailu kerane, kedanemene penui Edomme gu rabedung dade keledeusam peei kedine. 21 Cine Jehoash, Israel gwangpei, gwaketang; pa nah Judah gwangpei, Amaziah, Judahme deu Beth Shemesh namceu gade kezumok eh hangge gede redaulu. 22 Judahme de Israelme ne ngamlu, nah mina leune kilung gage pak gaidi. 23 Israel gwangpei Jehoash, Amaziah Judah gwangpei, Jehoash napei, Ahaziah tsapei de Beth Shemesh gade tuihlu. Pa pecu Jerusalem ga ngngwa gwanglu delwe Jerusalem rieki de tei msiadi, Ephraim Rieki gade Kimiak Rieki kecang, pe mdei cubit hai mdai* ge. 24 Pa kecak nah rangkang pelane, hema pelane Tinggwang kerecaki ga Obed Edom leuhme da kebam de, nah hegwangki ga ma pemi kehung dung keulu, nah mina tuikeludung de de ngngwalu, delwe Samaria ga cailigwang di.

25 Joash napei Amaziah, Judah gwangpei, Jehoahaz napei Jehoash, Israel gwangpei tsai kedi cai mmi kereiehmengei ge lunghlu. 26 Amaziah tei kegai kedabe dung cai, raitu gade gwang kamtu kecang, ainie, cidungde Judah nah Israel gwangpeime ha laisiukwak gage raupwa bam meni? 27 Cu Amaziah RAMPAUBE caisui kela gade nreu tet kedi gade, penui pe dage heciem kesia teigai kera Jerusalem gade riem cu. Pa Lachish gage pak gaidi, dede penui Lachish namdi ga minadung de pecai langgai delwe pecu cikade teitsetdi. 28 Penui pecu hekwendung reu gage pung cailigwang lu delwe Judah namdi ga pe paume de kekung gage kungdi.