1 Mmi hena bekum, cingkupei Jehoiada pe kengkieng keulia eh pa reugwamaa haireu muibedung de ngngwa samkaklu: Jehoram napei Azariah, Jehohanan napei Ishmael, Obed napei Azariah, Adaiah napei Maaseiah nah Zichri napei Elishaphat. 2 Penui hang mengei Judah ga mie eh Levime de nah Israel ga pautsa peume de si eh Judah namdi pelane gade hekwalu, nah penui Jerusalem ga gwanglu. 3 Mina hemaa pelane Tinggwang ki gade hegwangpei de ngngwa kesamkak lu. Jehoiada penui dage ranggai, "Pielo, hegwangpei napei hegwang tei zie, RAMPAUBE hegwangpei David leuhme ne zielie rang kebeu nzwa. 4 Nnui aide tei bi maisia: Cingkume nah Levime Sabbath benai mata tei kera kegwangme, penui kecum zige kerecaki riekidung ga kekwame zie. 5 Kecum zige keda cai hegwang ki ga zie, nah kecum zige keda Bangdwa Rieki ga zie. Mina pelane RAMPAUBE ki kigu ga ngkwa luzie. 6 Peu migede de RAMPAUBE ki ga lüt lak, cingkume nah Levime heta tei kebamme gwale. Penui au lüt lubui kedanemene penuide tei mcilu delu. Dede mina kedame pelane RAMPAUBE sam mzailu maisia. 7 Levime mi hangge ge kecu pe reunetdung pe ba ga pwalwe hegwangpei de petu pelane ga twagwa lu maisia. Hegwangpei kegwang kemie leuga pecu ngngwala lu. Mina keheibe de kerecaki ga lüt cai, pecu peu teitsetdi lu."

8 Cine Levime nah Judah ga minadung pelane cingkupei Jehoiada sam kai kebeu nzwa eh heta teilu. Sabbath benai bata tei kera gwang lai eh kebamme nah sabbath ga heta teicang lwe tet kerame, pe mina hangge gede ngngwalu, kedanemene cingkupei Jehoiada peu migede de tet kemakne. 9 Ge cingkupei Jehoiada reugwamaa muibedung de Hegwangpei David gu hengeidung nah hegeudung keceu kedi Tinggwang ki gage kaipwa kebamdung de teu gwang beu. 10 Jehoiada, kerecaki zetle gade kerecaki hile kecang, reca ni ga nah kerecaki ga, reugwame pelane de peu pe reunet riep pe ba ga pwalwe hegwangpei de twagwalu. 11 Pecai penui hegwangpei napei de ngngwa petlu, pe peu gage hegwangpeurwa kailu delwe samkakkelu zaidung laisiu de pecu peu. Iciu eh penui pecu peu hegwang teilu, nah Jehoiada nah pe napeidung pecu keniaklu. Pecai minadung pelane, "Hegwangpei ring ketiebe teilo," de eh sahgai.

12 Athaliah mina pakkela nah hegwangpei de ketwa kwa siu luge, pa RAMPAUBE ki ga minadung ngkwa kebam ga gwang, 13 nah Athaliah piegai ge, ainie, hegwangpei keheci kerecaki kimui ga, hegwangme ziemne kaipwa kebam tsiapum pi ga reugwa muibedung nah telui kekwame ne twagwapung kebam ngaulu. Cika lungh kebam mina pelane penui sui yisüt bam nah telui kwabam nah kerecaki ga leiketeime leibungdung kwa eh ketwa lei tei eh teuswa bam. Cidau Athaliah pe paini hietdi delwe sahbak eh cu, "Hegwang de mlai zeu! Hegwang de mlai zeu!" 14 Cidau cingkupei Jehoiada haireu reugwa muibedung, reugwame reu kedimedung de ngngwa mpetlu delwe penui dade rangdi, "Pecu kekwame riadung kak de teu mpetlu, nah keheibe de pecai sui cai, peu pecu kingtie le teitsetdi lu." Kedanemene cingkupei ainzwa ranggai delu, "Pecu RAMPAUBE ki gade teitset so." 15 Cine penui pa hegwang ki ga Hekwen Rieki kimui ga lüt kela dau pecu tuilu delwe cikade penui pecu teitsetdi.

16 Pecai Jehoiada nah hegwangpei, nah minadung pelane kakga pa de si eh, penui RAMPAUBE mina tei zielie samkaklu. 17 Cine minadung pelane Baal kerecaki ga mie eh cide tei ngkaudi. Penui Baal recabamdung teipangdi nah pe miedung tei takcaidi, delwe cipau recabamdung dwade Baal cingkupei, Mattan de teitsetdi. 18 Jehoiada RAMPAUBE ki pie rengei kerane cingkume kangga kedimedung de kedetlu, cidungde cai Levimedung, David ne RAMPAUBE ki ga heta tei kera nlum kebeume, Moses zai ga raupwa kela nzwa keru recadung RAMPAUBE dage rugai beu kerane, suiyi nah ketwa lei tei eh, David rang kebeu nzwa. 19 Jehoiada RAMPAUBE ki kiriekidung gage kekwame kailu, ciu eh renet gade mcikemakme migede de peu lüt melu kerane. 20 Jehoiada haireu reugwa muibedung, makecime, mina reu deuceudime nah renamme pelane de ngngwalu. Pa hegwangpei de RAMPAUBE ki gade ngngwa nghunglu; minadung Nreule Rieki gade hegwang ki ga lütlu nah hegwangpei de hegwangbam ga peu bamlu. 21 Cine minadung pelane penui sui yisüt di, nah namdi de ziune di. Athaliah de penui kingtie le teitsetdi.