1 Hegwangpei Amaziah tsai kedi cai, Judah ga mina pelane Uzziah, mmi kereieherok kedi gede peu pe pei keleu tei eh hegwang teilu. 2 Pa ne Elath namceu retak dailu nah Judahme de peudi. Pecai hegwangpei pe paume nzwa tsaidi. 3 Uzziah mmi kereieherok dau pa hegwang teilu. Pa Jerusalem ga mmi riakngeiehkena hegwang tei. Pe pui au Jerusalemme pui ge; pe zi cai Jekoliah. 4 Pa pelane ga pe pei Amaziah puisau mzui eh RAMPAUBE miakdwa gade petaube teilu. 5 Zechariah tingdau pa Tinggwang gwa tei kera pecu tiaklu, Zechariah pecu Tinggwang de rüt eh lungh kera ledeu beu. Pa RAMPAUBE gwatei kebamtane, Tinggwang pecu samlam beu.

6 Uzziah mie eh Philistinme de ngngwa regi. Pa Gath, Jabneh nah Ashdod namdi kiriedung de tei ngkaudi; pa Ashdod deudi ga nah Philistinme deu gage namdidung teilu. 7 Philistinme, Gurbaal namceu ga lungh kebam Arabme, nah Meunimme de renia kecu ga Tinggwang pecu ngha beu. 8 Ammonme Uzziah dage heraha habeu, nah pe kendu keyi mileune ci ladi, Egypt deurai ga kecang de, kedanemene pa ngkieng süt kedine. 9 Cipaureude, Uzziah Jerusalem ga Kimiak Rieki, Langkam Rieki, nah kirie ngkoi kebam gage renei kwalu, delwe cidungde tei ntiplu. 10 Pa renaamkang gage reketbam teilu nah tekwa kekiee kuilu, kedanemene pa hangdeu kehenadung ga nah langkiedung ga ketumdung kekiee kebamne. Pa heta keta pesui kecune, pe da kideutudung ga nah ma lunghkeyi luhdung ga heta ketamedung nah kubebang kelingmedung bam. 11 Cidungde reude, Uzziah hereu tei kera mina reugwame hemaa tei eh hereu ga kemieme bam, cidungde de penui riak ria gade teu hekwalu, Hananiah kengkieng kang gade keraube Jeiel nah kedibe Maaseiah ne peila, Hananiah cai hegwangpei kangga kedime hangge. 12 Pautsa muiteume mina kengkiengme de teuswa kecume riak pelane ge 2,600. 13 Penui kangga reugwame mina 307,500 ge ngkieng süt kecume de ngngwa hereu ketei ga hegwangpei de pe ngauraume dade nghalu kerame bam. 14 Uzziah penui ziemne, reugwame pelane ziemne, hegeudung, hengeidung, hereu peurwa, pumcum, lakpi, nah tangnungtsi mteibeu. 15 Jerusalem ga heciem kecimedung ne riem kebeu netdung de pa teilu, reketbam nah renei gage kai eh lakpitsi nah tangtsu kedidung kap kerane. Pe kendu keyi renam kedei kecang rang gwangdi, kedanemene pecu ngha süt beu nah pa ngkiengsüt kelune.

16 Dede hegwangpei Uzziah ngkieng luge, pa ngangdi iciu eh pa masang lu tadi; pa tingnaige RAMPAUBE, pe Tinggwang dage kemau tei gaidi, kedanemene pa RAMPAUBE ki ga kehengui recabam gage kehengui rugai kera lüt kedine.* 17 Cingkupei Azariah, nah RAMPAUBE cingkume mina kekuume riakheset pecu ngngwa, pecai sui lüt. 18 Penui hegwangpei Uzziah de kaamdi nah pe dage rangdi, "Uzziah, RAMPAUBE dage kehengui rugai kera n kwa ma, dede cide cingkume kwa, Aaron leuhme, kehengui ru kera ziemne penui de teimci kelume ne zie. Kemci ni gade tetdi, kedanemene nang masang kemakne nah RAMPAUBE Tinggwang ncu samlam beulak." 19 Cidau Uzziah pe rata sütdi. Pa kehengui ru kerane pe ba gage kehengui kerubung de pwalwe bam. Pa cingkume de pe rata kebam dau, RAMPAUBE ki ga cingkume dwa de, kehengui recabam taiga de pe sipie ga kempa petdi. 20 Cingkupei kedibe Azariah nah cingkume pelane pecu piegai, nah, ainie, pa pe sipie ga mpadi. Penui cikade pecu zette gwa gidi. Pa kelwa mpet kesang, kedanemene RAMPAUBE pecu teikeherei kedine. 21 Hegwangpei, Uzziah ketsai benai kecang mpa ladi nah pa mpadi kecune pe ki tsam eh lungh di, RAMPAUBE ki ga pecu peu lüt tadi. Pe napei, Jotham, hegwangki reu nah deudi ga minadung reu kedi teidi. 22 Amoz napei caihakecibe Isaiah ne Uzziah tei kegwang kedabe, raitu gade gwang kamtu kecang raupwala. 23 Iciu eh Uzziah tsaidi; penui pecu pe paume de kekung hegwangme raukie gage kungdi, kedanemene penui rangdi, "Pa au kempame." Pe napei, Jotham pe bam leu eh hegwang teilu.