1 RAMPAUBE kerecaki ziemne hegwangpei Solomon heta pelane teicang keludau, Solomon, pe pei David heta aide ziemne kaitsam kenzeu maniadung de pwa nlütlu, rangkanggeu, kecak, nah maniadung leune de si eh, pa cidungde Tinggwang ki mabam kibungdung gage kaidi.*

2 Pecai Solomon Israel hangkiamedung, heleuhdung peumedung pelane, nah Israelme kelak muiteumedung de Jerusalem gage qu hekwalu, David nam, cide Zion, gade RAMPAUBE samkakbung de teugwanglu kerane. 3 Israel gu muiteume pelane hengyi ga hegwangpei dwaga gwang ngkwalu, cide kei hena bekei.* 4 Israel hangkiame leune gwanglu, nah Levime samkakbung de pwa cuhlu. 5 Penui samkakbung de, RAMPAUBE kebam paiki, nah paiki ga kebam manya kemci pelane pwa nghang lu. Cingkume Levi leuhmedung ma aidungde pwa nghang lu. 6 Hegwangpei Solomon nah ngkwa kebam Israelme pelane samkakbung dwaga gwang ngkwa lu, meurün nah hetumseu peikap gai kelak ratak teigai eh. 7 Cingkumedung RAMPAUBE samkakbung de pebam gage pwa gwanggai lu, kilung helungbe bung ga, heni mcitube ga, cherubim hesiu kangga ge.✝ 8 Kedanemene cherubim penai hesiudung de samkakbung reu gage siulim kelune, nah cidungde ne samkakbung nah cide kepwa tiedung de gumlu. 9 Kepwa tie kenade tiezu kecune petündung de helungbe bung heni mcitube dwa gade ngaula, dede kepwa tie kenade hegwale de ngau lama. Kepwa tie kenade henai kecang de bam. 10 Israelme Egypt gade tetkempet dau, RAMPAUBE Israelme de ngngwa samkak keludau, Moses ne Horeb *gade tangtsukwak kena kai kenzeude gwale samkakbung ga magede bam ma.

11 Cingkumedung heni kemci gade cidau tetmpetlu. Cingkume kebam pelane penuide maa mzidung nzwa swa mene, RAMPAUBE dade penuide teimci lu. 12 Levime lei keteimedung de, penui pelane, Asaph, Heman, Jeduthun de si, nah penui napeidung nah sinamedung, langcimpai teulu delwe ntwaidung, leibungdung, nah lyredung, kwa eh recabam kepetlebie tu ga saplu. Penuide nzang eh cingkume 120 telui kwabam. 13 Cidau ting telui kekwame nah lei keteime leitei ngkwa bam, kwa ge tei eh RAMPAUBE de twa nah hetwa peulu kerane. Penui teluidung nah ntwaidung nah leinet kedadung teu eh kwahu sahgai delwe penui RAMPAUBE de twadi. Penui lei teigai, "Kedanemene pa au yilie, pe samkak kelu kelungta bamla kecune." Pecai kerecaki, RAMPAUBE kerecaki cide hemwa ne puidi. 14 Cingkumedung hemwa ziemne sap eh hegwa tei luta di, RAMPAUBE gu kendu pe kerecaki pui kedine.*