1 Cipaucia matiemene, Moab nah Ammon ga minadung, nah Meunme kangge de ngngwa si eh Judah gwangpei Jehoshaphat de renia eh hereu tei kera gwang. 2 Cidau samgwame kangge Jehoshaphat da gwang eh ranggai, "Edom deudi gade, hemaa kekieege ncu renia kera Ketsai Jaaidi lulegim de gwangla dida. Pielo, penui Hazezon Tamar ga la dida," cide au, Engedi. * 3 Jehoshaphat ngngidi nah pa RAMPAUBE de peei kera pecu tiaklu. Pa Judah cuikui pelane ga mmwang kera sam kaigai. 4 Judahme RAMPAUBE de peei kera Jerusalem ga gwang ncütlu; Judah namdidung leune gade RAMPAUBE de peei kerane gwanglu.

5 Jehoshaphat Judah nah Jerusalemme ngkwa kebam ga saplu, RAMPAUBE ki ga, kigu keheci dwa ga. 6 Pa kie sahbak gai, "RAMPAUBE, anui paume Tinggwang, nang tinggim ga Tinggwang meni? Nang ne heleuhdung hegwangram pelane reu di meni? Kengkieng au n baga bam, cine mide ncu renia gailak. 7 Anui Tinggwang, nang ne n minadung Israelme dwa de aipau deu ga kelunghme de gwa gidi, nah Abraham leuhme de kelungta ziemne pwa peu dide meni?✝ 8 Anui paume cika lunghdi nah cika ge ncu kemci nige teibeu n zi ziemne, 9 penui ranggai, ‘Magade kengkap anui da gwang cai, hereu, tutiak, mede rapia, mede herakum, anui kerecaki aide dwaga sap zie, nah n dwa ga (kedanemene n zi aipau kerecaki ga kebam ne), nah anui keherei kelu dau n dage kie gai zie, nah nang anui kwa siu luzie delwe anuide keli beuzie.’* 10 Cu pielo, Ammon, Moab nah Seir Lamlwa minadung aika bam, nang Israelme Egypt deu gade kempet dau penuide peu lüt ma; meliene, Israelme penui dade nreu tetdi nah penuide tei ngkapdi ma.* 11 Pielo penui dainzwa anuide hekum peei zeubi; nang ne anuide n deu gum lulo kepeu gade anuide gwa gi kera penui gwangla dida. 12 Anui Tinggwang, nang penui tutiak lak ni? Kedanemene anui au reugwame kedi aide anui da gwang kelame dade kengkieng gahlu. Anui daipai tei ziebi ci meda, dede anui au ncu ngngei la." 13 Judahme pelane penui naudung, namedung, nah henamedung de ngngwa lwe RAMPAUBE dwa saplu.

14 Cidau minadung kebam maa sum ga, RAMPAUBE rabe Levime ge reu ga gwanglu, pe zi Jahaziel, Zechariah napei, pa Asaph pautsame ge, nah Benaiah, Jeiel, nah Mattaniah tsapei. 15 Jahaziel rangdi, "Kingneilu, Judahme pelane nah nnui Jerusalem ga kelunghme, nah hegwangpei Jehoshaphat. RAMPAUBE ainzwa nnui da ranggai, ‘Ngngi so; aipau reugwame kedi de ziemne nnui lung ceu diso, kedanemene hereu aide nnui ne lak, dede Tinggwang ne zie. 16 Nnui ncünne penuide renia kera hung bilu. Pielo, penui Ziz lampui tetkah kegwang lede hangla. Nnui penuide Jeruel hetaideu dwaga, langkam penli ga bam eh ngau luzie. 17 Nnui aipau hereu dega regi maisia dilak. Judah nah Jerusalem ga minadung, nnui bamga saplu, sap ntiplu, nah RAMPAUBE nnuide kelikebeu pielo. Ngngi mede lunghau diso. Mie penuide ncünne renia cu, kedanemene RAMPAUBE nnuide ngngwala lu.’" 18 Jehoshaphat keumie pezu hangdeu tunglu, nah Judah nah Jerusalem ga kelunghme leune RAMPAUBE dwa ga keumie pecu recadi. 19 Levimedung, Kohathme nah Korahme pautsadung, sahbak eh cuh saplu, RAMPAUBE Israel Tinggwang de twa kera ziemne.

20 Pecai benai tingcang nuge penui cuhlu delwe Tekoa hetaideu ga mie. Penui tetpet kecu dau, Jehoshaphat cuhlu eh rangdi, "A kwa kingneilu, Judahmedung, nah nnui Jerusalem ga kelunghmedung! RAMPAUBE nnui Tinggwang de nlumlu, iciude nnuide ngha beuzie. Pe caihakecimedung de nlumlu, nah nnui ngkieng luzie."* 21 Pecai hegwangpei Jehoshaphat minadung de ngngwa resiu kelu cai, pa RAMPAUBE da lei tei kegaime de nah pe kemci keyi de ziemne pecu twa kelame de kedetlu, penui reugwame dwa gade tet pet kecudau, ranggai, "RAMPAUBE de hetwa peu lu, kedanemene pe samkakkelu kesamsang de kelunghta bamla." 22 Penui leitei nah pecu twa cuhdi ge, RAMPAUBE minadung de langgai beu eh Ammonme, Moabme, nah Seir Lamlwa ga kelunghme de renia eh gwaketang, Judah de gwaketang kera gwang kelame de. Penuide ngamdi. 23 Kedanemene Ammonme nah Moabme Seir Lamlwa ga lungh kebamme de ngngwa regi cuhdi, penuide teitset ciak nah ngkapdi kerane. Penui Seir Lamlwa ga lungh kebamme de teitset ciak dige, penui pelane hangge gede ngngwa regi bamdi.

24 Judahme hetaideu ngau kebam ni ga gwang luge, penui reugwame lam piegai. Ainie, penui au tsai dida, hangdeu ga kauzeu bam; migede paklu meda. 25 Jehoshaphat nah pe minadung penui dade hema tui kera gwang luge, penui kakga mania gi kenzeu, paiheni nah mania pemi kehungdung ngaulu, cidungde penui pung kap gai kelak ge, penui ziemne keulu. Kiee ham kedine, penui hema tui kelube pwa hekwa eh lang cumne nggwangdi. 26 Hema tui kecu lang mdaine benai penui Berakah Langkam* ga gwang ngkwalu. Cikade penui RAMPAUBE de twagai, cine cipau ni de zi "Berakah Langkam" de eh henai kecang de qula. 27 Pecai penui, Judah nah Jerusalem ga kelunghme pelane, Jehoshaphat ne penuide teuswa eh penui sui yi eh Jerusalem ga cailigwangdi, kedanemene RAMPAUBE peu penuide penui ngauraume reu ngkieng kelu ziemne. 28 Penui lyre, leibung, nah teluidung kwa eh Jerusalem ga, nah RAMPAUBE ki ga gwanglu. 29 Tinggwang de kehing, twagwa kebam hegwangram leune ga bamdi, RAMPAUBE Israel ngauraume de ngngwa regi kecu penui siu luge. 30 Cine Jehoshaphat hegwangram ga kehebwak bam ma, kedanemene pe Tinggwang pecu lule ailam tu leuga lungciep peu.

31 Jehoshaphat Judahme reu hegwang tei: Pa hegwang teicuh kecu dau pa au mmi camreiehmengei, nah Jerusalem ga mmi ngkaiehmengei hegwang tei. Pe pui zi cai Azubah, Shilhi napui. 32 Pa pe pei Asa nzwa lungh gwang; pa cide gade nreu di ma; pa RAMPAUBE dwade petaube teilu. 33 Ciciuliede, nlum kemakme reca nidung au keugidi ma. Minadung cidaude penui paume Tinggwang dage penui lung nreugai luma. 34 Jehoshaphat heta tei kegai keda, raitu gade penli kecang, ainie, cidungde Hanani napei Jehu hakwak ga rau nzeu, cidungde Israel gwangdung laisiukwak gage rau pwabam.

35 Aipau cai Judah gwangpei, Jehoshaphat, Israel gwangpei Ahaziah, kesiata kekiee keteibe de ngngwa henna teilu. 36 Pa pecu ngngwa henna ketei au liem tei lwe Tarshish ga mie kerane. Penai liem Ezion-Geber namceu gade teilu. 37 Cidau Mareshah namceu gade kegwangbe Dodavahu napei Eliezer, Jehoshaphat da cairasam rang; pa rangdi, "Kedanemene nang Ahaziah de ngngwa henna tei kedine, RAMPAUBE nang tei kelude ngkapdi da." Liemdung siadi iciu eh madaude liemtau lu tadi.