1 Joash mmi hena kedi dau pa hegwang teilu; pa Jerusalem ga mmi riakdai hegwang tei. Pe pui zi cai Zibiah, pa Beersheba namdi mege. 2 Joash cingkupei Jehoiada keringbe ting ga RAMPAUBE miak dwa gade petaube teilu. 3 Jehoiada, hegwangpei ziemne pe nau hangna kedetbeu nah pa pe na mipeinadung nah mipuinadung lunghlu.

4 Aipau cai, Joash RAMPAUBE ki retak kera cetlu. 5 Pa cingkumedung nah Levime de qu hekwa ncütlu delwe pa penui dage rangdi, "Mmi kum ramsang Judah namdidung ga mie delwe Israelme pelane dade nnui Tinggwang ki retak kera ziemne rangkang hekwa lulo. Nnui cide cu gade tei ndeu bilu maisia." Levime kerai dau magede tei ma. 6 Cine hegwangpei, cingkupei kedibe Jehoiada de qulu delwe pe dage keteu, "Nang daitei eh Levime de peu Judah nah Jerusalem gade RAMPAUBE kebam paiki de ziemne Moses RAMPAUBE kilabe, nah Israel hemaabe ne heraha ha lulo kebeu de halu meno?" 7 Kedanemene Athaliah mipui kesia pui, caisuime ne Tinggwang ki de tei msiadi delwe RAMPAUBE ki kemci niadung pelane Baaldung de reca kecu ga peu kedine.

8 Cine hegwangpei aja kaigai, nah penui hema kengkwabung de teilu delwe cide RAMPAUBE ki hegwale kimui gage kailu. 9 Pecai penui Judah nah Jerusalem leune ga minadung de RAMPAUBE ziemne heraha ha kera Moses Tinggwang kilabe ne hetaideu gade Israelme de tei lulo kebeu de teugwang kera sam kaigai. 10 Muiteume pelane nah minadung pelane penui suiyidi nah heraha rangkang keu gwang hema kengkwabung gage pui kemaktane kailu. 11 Keheidaude Levime ne hema kengkwabung de hegwangpei kedime da punggwang kecu dau, nah penui cika rangkang kekiee kebam ngaukelu dau, hegwangki ga keraube nah cingku kedibe kangga heta tei kebamme gwanglu, hema kengkwabung de tei mtalu, cide keulu, delwe cide pebam gage punggwang gaidai dila. Penui aide tingba ramsangne tei eh, rangkang kekiee ge hekwa bamla. 12 Hegwangpei penai Jehoiada RAMPAUBE ki ga heta ketei kerengeime de rangkang de peu dila. Nah mina aidungde tangtsuta keteime, tsingta keteime delwe hegeu nah hetageuta keteime depeu RAMPAUBE ki, retak kerane penui zie luilu. 13 Cine bata keteime pelane heri süt eh penui ba le retak gwang kera bata tei; nah penui Tinggwang ki de ndaa raitudau rehi nzwa eh teidai lu, nah tei ntiprip lu. 14 Penui retak cang luge, penui rangkang teu tei kebangbe hegwangpei penai Jehoiada de teugwang beudi. Aipau rangkang de RAMPAUBE ki maniadung ziemne keu dila. Lidung pwa ratak tei kera ziemne, kecak nah rangkanggeu le lidung nah hepiaktiadung teilu. Jehoiada ring kebamta penui RAMPAUBE ki ga keru recadung teigai bam muila.

15 Jehoiada lungh tie eh hecing süt di, delwe pa tsaidi; pa tsai kecu tingdau mmi 130 di. 16 Penui pecu David namdi ga hegwangme raudung gage kungdi, kedanemene pa Tinggwang nah Tinggwang ki ziemne, nah Israel ga heta keyi tei kegaine.

17 Cu Jehoiada tsaikedi cai, Judah muiteume gwang eh hegwangpei Joash de herüt peugai. Cidau hegwangpei lung teilu eh pa penui sam kingnei lu. 18 Cine Judah ga mina RAMPAUBE ki, penui paume Tinggwang, de pütdi, nah herabe pui Asherah miedung nah mamiedung de recadi. Penui kemau bata aidungde ziemne RAMPAUBE rata Judah nah Jerusalem reuga gwangdi. 19 Dede RAMPAUBE, pa minadung de peu pe da cailigwang dailu kerane caihakecimedung de langgai beu; caihakecimedung minadung kesia zierang teigai, dede penui pe kwa kingnei raudi. 20 Tinggwang Rabe cingkupei Jehoiada napei Zechariah de kezeu pwadi; Zechariah minadung pecu ngaulu kebui ga saplwe penui dage ranggai, "Tinggwang aide rangzeu: Nnui daitei RAMPAUBE hezaidung de mzai meno, ciu eh nnui kekap gage tet gaila no? Nnui RAMPAUBE de püt kedine, pa de nnuide püt dida." 21 Dede penui pecu teitset kera ciem riemlu; hegwangpei aja gade, penui RAMPAUBE ki kigu gade Zechariah de tangtsudung le sam. 22 Ainzwa eh, hegwangpei Joash, Zechariah pei Jehoiada pe dage keyi bata tei kegaidung de nsungtadi. Meliene, pa Jehoiada napei de teitsetdi. Zechariah tsai mie kecu dau, pa ranggai, "Peu RAMPAUBE de nang tei kegai aide ngau eh ncu saja peu kelube teilu."

23 Cipau kumde mmi kekam lebie, Aram reugwame Joash de ngngwa regi. Penui Judah nah Jerusalem ga gwanglu; penui mina muiteumedung pelane de teitsetdi, delwe penui dade hema tuih keludung pelane Damascus* gwangpei de langgai beudi. 24 Aram reugwame kecam nage gwang liede, RAMPAUBE peu penuide Judea reugwa kekiee reu kengkieng pwapeu, kedanemene Judahme RAMPAUBE, penui paume Tinggwang de püt kedine. Ainzwa Aramme de peu hegwangpei Joash de saja peu.

25 Aramme caili kedi dau, Joash de rejam msia sütdi. Pe kangga pe kilame ne pecu teitset kera heciem riemlu, kedanemene pa cingkupei, Jehoiada napeidung de daptset kedine. Penui pecu pe zeu gade teitsetdi, nah pa tsaidi; penui pecu David namdi gage kungdi, dede hegwangme raudung gage kung ma. 26 Aipau kena de ne pecu teitset kera heciem tei: Zabad, pa Ammonme pui Shimeath napei nah Jehozabad, pa Moabme pui Shimrith napei. 27 Cu Joash napeidung ha, pe ziemne caihasam kemlang kerangdung, nah Tinggwang ki retak kecu de, ainie, cidungde hegwangme Laisiu rangkecaikwak gage raupwa la. Pe napei Amaziah pebam leu eh hegwang teilu.