1 Asa hegwang tei kelu mmi camreieherok bekum, Israel gwangpei Baasha pe ta siasüt eh Judahme dage teigai, nah Ramah namceu kwacuhlu, ciu eh pa peu migede de Judah gwangpei Asa deu gade mpet mede nlüt laklie di. 2 Pecai Asa RAMPAUBE kerecaki ga nah hegwang ki maniakibung gade rangkanggeu nah kecak keulwe Damascus ga lungh kebam Aram hegwangpei Ben Hadad dage langgai beudi. Pa rangdi, 3 "Peu anai kakga samkak bam kelube tei lulo, n pei nah a pei penai kakga kebam nzwa eh. Pielo, Ih ncu rangkanggeu nah kecak langgai la delie. Israel gwangpei, Baasha dade n samkak de pütdi lo, iciu lude pa a dade tetdi lu kerane." 4 Ben Hadad hegwangpei Asa sam kingnei lu nah pe reugwame muibedung de Israel namdidung de gwaketang lo eh langgai. Penui Ijon namceudung, Dan, Abel Maim, * nah taktyei hekwa pwa kebam Naphtali ga namdidung pelane gwaketang. 5 Cipau tingdau Baasha aide siu luge, pa Ramah kwacuh tadi nah pe ta de peu mtakdi. 6 Pecai hegwangpei Asa Judah ga mina pelane de ngngwa teudi. Penui tangtsudung nah tsingdung Ramah ga kebam de, Baasha ne keulwe namdi tei kebam de pung tetdi. Ge hegwangpei Asa cipau ki ketei niadung de keulwe Geba penai Mizpah namdidung de teilu.

7 Cipau tingdau caihakecibe Hanani Judah gwangpei, Asa da mie nah pe dage rangdi, "Kedanemene nang RAMPAUBE n Tinggwang de ngngei mene Aram gwangpei de ngngei kedine, Aram gwangpei reugwame n ba gade pak dida. 8 Cushmedung nah Libyamedung reugwame kekiee ge nah bagidung nah hekwen kepungme kekiee ge bam meni? Dede, kedanemene nang RAMPAUBE de ngngei kelune, pa ncu penui reu ngkieng kelu peuda. 9 Kedanemene RAMPAUBE kideu pelane kehei gade ngau bam, ciu eh pecu kenlumme de pe kengkieng peu kerane. Dede nang aipaude gade mie süt eh matei dida. Cu gade au, nang hereu teila di zieda." 10 Pecai Asa caihakecibe de pe rata di; pa pecu hebaangki gage kaidi, kedanemene aide ziemne pa pecu pe rata süt kedine. Cipau tingdau, Asa mina kangge de teikeherei di.

11 Pielo, Asa bata, raitu gade gwang kamtu kecang, ainie, cidungde Judah nah Israel gwangpeidung hakwak gage raupwala. 12 Asa hegwang ketei mmi camreiehekui bekum, Asa pepi ga mateei ge teeidi. Pe mateei sia süt di liede, pa darukecime dade gwale RAMPAUBE dade kengha kie ma. 13 Cine Asa pe hegwang ketei mmi riakdaiehket bekum, tsaidi nah pe paume rau tai gage kungdi. 14 Penui pecu David namdi ga pa ne pe ziemne pe raubung teipwa kebam gage kungdi. Penui pe paau kung kera kelamlui dau mosala ketsamtsam perim kehengui teu eh, perim kehengui tei kecime ne tei kelube penui pe paau gage kailu. Pecai penui mimang di süt kecu ge pecu herüt peu eh teigai.*