1 Pecai Hegwangpei Solomon kekie tei, "RAMPAUBE au muiting kecu ga lungh zie lie pa rang lie, 2 Dede Ih ncu ki kedi ge teibeu dida, n ziemne heni ge kelungta lunghla kera."✝ 3 Pecai Israel ngqwa pelane sap kebam dau, hegwangpei nreu tegwa gai eh Israel ngqwa pelane de samlam beu.

4 Pa rangdi, "Peu RAMPAUBE, Israel Tinggwang, de twa lulo, a pei David dage marang kegaibe, nah cide pekatei pe bale teicang kebeu da, ainzwa ranggai, 5 Tinggwang Solomon dage ranggai, ‘Ih a minadung de Egypt deu gade ngngwa mpet kelube nai gade, peu a zi cika bamlu kerane Ih Israel leuh pelane gade, namdi ket de kedet luma ki ge tei kerane. Mede peu a mina Israelme reu kedi tei kerane Ih migede de kedet luma. 6 Ciuliede, Ih Jerusalem de kedet lu, iciu eh a zi cika bamlu kerane, nah Ih David de a mina Israel reu kedi tei kera kedetlu.’ 7 RAMPAUBE Israel Tinggwang zi ziemne kerecaki ge teikera cu a pei David mlung ga ladi. 8 Dede RAMPAUBE a pei David dage rangdi, ‘N mlung ga a zi ziemne kerecaki ge tei kera la dida, n mlung ga kela cide nang tei hemi delie.✝ 9 Dede, nang ki cide tei kerabe ma; meliene, n na, n pum gade kegwangbe, ne a zi ziemne ki cide teibeu zie.’ 10 RAMPAUBE pa rang kegaide heta teilu, Ih a pei David bam ga cuhlu de kecune, nah Ih Israel hegwangbam ga bamlu de kecune, RAMPAUBE rang kebeu nzwa. Ih Israel Tinggwang RAMPAUBE zi ziemne kerecaki cide tei luda.✝ 11 Ih Kerecaki gage samkakbung de kai luda, cika RAMPAUBE samkak kelude bamla, pa cide Israelme de ngngwa teilu."

12 Solomon au RAMPAUBE recabam dwaga Israel ngkwa kebam pelane dwa ga saplu delwe pe ba hwa lwe kekie tei. 13 Pa au hetageu bamde teilu, petie cubit mengei, pedi cubit mengei, nah pehu cubit kecum. Pa cide kigu sum gage kaidi. Pa cide reuga saplu nah Israelme ngkwa kebam pelane dwaga keumie lu, nah iciu eh pa pe ba kena tinggimdung lebie ge kekie tei eh hetwa gai. 14 Pa kiegai, "RAMPAUBO, Israel Tinggwang, tinggimdung mede kideu ga nang kenzwa Tinggwang gah, n kilame penui mlung pelane teu eh n dwaga tet kelame de samkak kelu nah keku bammui kela de de kainzeu kelabe; 15 Nang au n kilabe a pei David dage, nang n sampet kebeude kainzeu luda. Yeo, nang n muile rang da, nah cide n bale teicang luda, henai teicang kelu nzwa. 16 Cu cine, RAMPAUBE, Israel Tinggwang, n kilabe a pei David dage nang sampet kelude teicang lulo, nang, ‘Nnui a dwaga Israel hegwangbam ga mina bam kera gah dilak, nnui leuhmedung a zai ga tet sünne lucai, nnui a dwaga tet eh kegwang nzwa,’ de eh kerang de. 17 Cine cu, RAMPAUBO, Israel Tinggwang, peu n sam de teicang gailo, nang n kilabe David dage rang kegai nzwa.

18 Dede Tinggwang kideu ga minadung de ngngwa lungh zieni? Pielo, kideu pelane nah tinggim de ncu mrak daulak—Ih teikelu kerecaki aide daikenzwa gede ceu ziebi! 19 Dede keherei liede n kilabe kekie aide nah pe luneu de herüt peulo, RAMPAUBO a Tinggwang; n kilabe sah nah kie kelade kingnei gailo. 20 Tingmui tingba n miak kerecaki ailambie piegai beulo, nang n zi kainzeu zielie sampet kebeube heni ga. Nang n kilabe kekie kingnei gai beulo heni aide ga nreu gwang kie kegai de. 21 Cine n kilabe nah n mina Israelme kekie de kingnei gailo anui heni ailam nreu eh kie kegai dau. Yeo, nang lungh kebam ni gade kingnei gailo, tinggimdung gade; nah nang kingnei lu de, kemaugi beulo.

22 Magade mige pe kidabe dage kemau teigai nah sampet gai cai, nah pa gwang eh kerecaki aika n recabam dwa gade sampet gai cai,* 23 Tinggimdung gade kingneilu delwe heta tei gailo. N kilame de tiak gailo, kemaube de mmau eh pe peu gage pa tei kedide teugwang gailo. Kenzeube de mau malie ndu gailo nah pe masang ria gade peu beulo.

24 N mina Israelme penui n dage kemau teigai kedine ngauraume ne penuide ngam kedidau, penui n da cailigwang dailu eh, n zi qu, kie nah kerecaki aikade n dwade penui maugi beulo kie cai, * 25 iciucai tinggimdung gade penui kwa kingnei gailo, n mina Israelme maugi beulo; nang penuide nah penui paume de peukela deu de ga penuide ngngwa cailigwang dai beulo.

26 Tingkamdung ngkui kedi dau nah minadung n dage kemau teigai kedine tingrui gah kedi dau, penui heni ailambie nreu kie, n zi qu, nah nang penuide teikeherei kegaidau penui mau gade nreu lucai— 27 iciucai RAMPAUBO, tinggim gade kingneilu delwe n kilamedung nah n mina Israelme maugi beulo, nang penui tet maikesia lampui keyi gage saulia kegai dau. N deu gage tingrui langgai lo, nang n minadung de gumlu kera kepeu deu de gage.

28 Hangdeube ga herakum, mede rapia gwang cai, mede mei pereugi, mede tangriemdung nah tambeibedung mei ngkap dicai; mede penui ngauraumedung penui deu ga namdidung kiriekidung gwaketang cai, mede cika rapia mede keteeikenei gede bam cai, 29 nah mige ne mede n mina Israelme pelane ne kekiedung nah lu keneudung kiegai cai—ket ket kecu rapia nah lungrei pe mlung gade cilu eh pa pe ba kena kerecaki lambie hwacuh gai. 30 Ciucai Tinggim, nang lungh kebam ni gade kingnei gailo; kemaugi beulo, nah mina leune de pe teilung zai rehi gade ziehi peulo; nang au pe mlung cibam, kedanemene nang nah nang rünne minadung mlung cibam lu. 31 Aide teilu penuide peu ncu hinglu kerane, iciu eh penui n lampuidung ga tet eh nang anui paumedung de pwa kepeube deu ga penui lungh lamui lu kerane.

32 Sangmedung nnui Israel ga si kemakmedung, dede cauge—n zi kedi de ziemne, n ba kengkieng de ziemne, nah n ba hwapwa kebamde ziemne—gwang eh kerecaki ailambie ge kiegai cai, 33 ciciude tinggim gade kingnei gailo, nang lungh kebam ni gade, nah sangme n dade kie kelade pelane tei beulo, iciu eh kideu ga mina pelane n zi ci luzie delwe ncu hing luzie, n mina Israelme nzwa eh, nah Ih kerecaki aide tei kelude au n zi gade qukelu penui ci luzie.

34 Magade n minadung penui ngauraume de hereu tei kera kepet dau, nang keheibe lampui gade penuide langgai liede, nah penui nang ne kedetkelu namdi aide nah Ih n zi ziemne teikelu kerecaki lambie nreu eh n dade kie cai. 35 Iciucai tinggimdung gade penui kekie kwa kingnei gailo, penui kie kelade, delwe penuide ngha gailo.

36 Penui n dage kemau teigai dicai—kedanemene migede kemau teila kemak gah lu—nah nang penuide n rata dicai nah penuide ngauraume ba gage kaibeu dicai, iciu eh ngauraume penuide hebaangme tei eh penuide penui deu ga ngngwa mie dicai, kemdei ga mede kenna ga liede.* 37 Nah penui penuide langgi kedi deu ga lungh kela penui ci lucai, nah penui helung nreu lwe penui hebaangme teikela deu gade n kengha kie cai. Penui, ‘Anui teimau süt dida nah kemau tei dida. Anui zai nlien dida,’ de eh rang cai. 38 Penui hebaang tei kebam deu, penuide hebaangme tei kera penui teu tet kedi gade penui mlung nah penui keringria pelane teu eh penui n da nreugwang lucai, nah nang penui paume de kepeu, penui deu lambie, nah nang kedetkelu namdi lambie, nah Ih n zi ziemne teikelu ki lambie penui nreu eh kie cai. 39 Iciucai tinggimdung gade kingnei gailo, nang lungh kebam ni gade, penui kekie nah penui kie keladung, nah penuide ngha gailo. N minadung, n dage kemau teigai kedimedung maugi beulo.

40 Cu, a Tinggwang, Ih n da kiela, n miak mrak lulo, nah heni aikade kie kegai kekiedung de kingnei gailo. 41 Cu cine cuhlu, RAMPAUBE Tinggwang, n kemtak ni ga, nang nah n samkakbung kengkieng de. N cingkumedung de peu, RAMPAUBE Tinggwang, kelikelu le bah lulo, nah peu nda samsang kelamedung de n keyi de ga penui suiyi lulo. 42 RAMPAUBE Tinggwang, nang ne keniak kelu hegwangpei zu de peu n dade nreutet diso. N kilabe David dade kesamsang samkakkelu ta de n lung gage kainzeu lulo."