1 Hezekiah kesamsang nah Kahkegwang ngyi aidungde cang kedi cai, Assyria hegwangpei Sennacherib, Judah ga gwang eh nlütlu. Pa riekelu namdidung de gwa lüt kerane ramzeuki teilu, pa cidungde tuihlu eh pegu tei kerane cet teula. 2 Hezekiah Sennacherib gwang bam kecu ngaulu nah pa Jerusalem de regi kera cet teu kela cilu ge, 3 pa pe muiteumedung nah pe kengkieng minadung de ngngwa duirwak Jerusalem namdi gwale kebam de kaamdi kera kempau; penui cinzwa tei kera pecu ngha beu. 4 Cine mina kekiee ge gwang mbau eh duirwak pelane nah reuceuna namdi sum gade lwa kebamde de kaamdi. Penui rangdi, "Daitei eh Assyria gwangme de peu gwang eh dui kekiee ge ngaulu lai no?" 5 Hezekiah kuu eh namdi kirie pelane pang mie kedidung de teicuh dailu. Pa reneidung de kwahu silu, nah herie keda hegwale tei si lu. Pa David namdi ga Millo de de teintip si lu nah pa hereuniadung nah hegeudung kekiee ge teilu.* 6 Pa minadung de reugwa muiteume kangga ge kailu. Namdi rieki heni mza kebam ga pa penuide pe da ngngwa hekwalu delwe penuide kecung süt eh maranggai. Pa penui dage rangdi, 7 "Ntiplu nah kuu lu. Assyria gwangpei nah pe da kebam reugwame pelane ziemne ngngi mede nnui lung ceu diso, kedanemene anui da kebambe au peda kebammedung swade ngkiengki lu. 8 Pe da au pumteih kengkieng rünne bam, dede anui da au RAMPAUBE, anui Tinggwang, anui de ngha kera, nah anui ziemne hereu regibeu kera bam." Ciu eh minadung Judahme gwangpei Hezekiah samdung dene penuide tei ngkuu lu.

9 Aipau cai, Sennacherib, Assyria gwangpei, pe kilamedung de Jerusalem ga (cu au pa Lachish namceu dwa ga bam, nah pe reugwame pelane pecu ngngwa bam), Judah gwangpei Hezekiah da, nah Jerusalem ga Judahme kelungh leune da langgai. Pa rangdi, 10 "Aide Assyriame gwangpei Sennacherib ranggai: Jerusalem de tuih kera twagwa kebam de lialu kerane nnui dai de ngngei pwa bam no? 11 Hezekiah, ‘RAMPAUBE anui Tinggwang anuide Assyria gwangpei ba gade kelibeu zie’ de eh kerang dau, pa nnuide cwa bam dide meni iciu eh peu nnuide mzeu nah hereu eh tsaidi kerane? 12 Hezekiah aipaude ne pe reca nidung nah pe recabamdung keu gidi delwe Judah nah Jerusalem ga minadung de, ‘Recabam ket gade nnui reca maisia nah cikade nnui nnui ratakdung ru maisia’ de eh aja kaigai meni? 13 Nnui Ih nah a paume heleuh kedadung pelane dage daipai teigai bi ci meni? Twagwa kebam heleuh keda rabedung penui deu de a kengkieng gade kelilu di ni? 14 A paume ne ngkap ciau kedi heleuh cidungde rabedung kak gade, hera gede pe minadung de a ba gade kelilu kera bam ni? Daitei eh nnui Tinggwang a kengkieng gade nnuide keli lulai no? 15 Cu peu Hezekiah de nnuide cwa mede ainzwa eh sau mau diso. Pecu nlum so, kedanemene heleuh rabe gede mede hegwangram gede a ba gade pe minadung de kelilu ma, mede a paume ba gade. Nnui Tinggwang nnuide a ba gade keli lubui lie lani?" 16 Sennacherib kedime RAMPAUBE Tinggwang nah pe kilabe Hezekiah de rang msia ki di. 17 Hegwangpei Sennacherib RAMPAUBE, Israelme Tinggwang de teu henui tei kerane, nah pecu mlai kecu sam rang kerane laisiudung de rau si gai. Pa rangdi, "Heleuh keda rabedung pe minadung de a ba gade keli pwa peu kemak nzwa, cide nzwa Hezekiah Tinggwang de pe minadung de a ba gade keli gailak." 18 Penui aide Jewme let gade kirie reu ga kebam Jerusalem ga minadung dage sahbak gai, penuide tei ngngi nah tei keherei gai kerane, iciu eh penui namdi de tuihlu kerane. 19 Penui Jerusalem Tinggwang ha de mi kedame kideu ga kelunghme gu mina ba le tei kelube rabedung ha nzwa eh rangdi.

20 Hegwangpei Hezekiah, nah Amoz napei caihakecibe Isaiah, aide ziemne kekie tei nah pa tinggim gage sahbak gai. 21 RAMPAUBE tinggimgwame gede langgai eh reugwamedung, reugwamaa muibedung, nah paiki ga Assyrian hegwangpei gu kedimedung de teitsetdi. Cine Sennacherib ngngam eh pe deu ga cailigwangdi. Pa pe rabe kerecaki ga lüt kelu dau, pekatei pe name kangge ne kingtie le pecu cikade teitsetdi. 22 Ainzwa eh, RAMPAUBE Hezekiah nah Jerusalem ga kelunghmedung de Assyria gwangpei, Sennacherib ba gade, nah mi kedamedung pelane ba gade kelibeu, nah namdadung pelane de ngngwa yi eh penuide peu lungh ziune eh lunghdi. 23 Mina kekiee ge Jerusalem ga RAMPAUBE da makai teugwang bam, nah Judahme gwangpei Hezekiah de pemi kehung mapeudung teugwang beu, ciciu eh cipau ciale de heleuh pelane miakngau gade pa herüt pung sütti.

24 Cipau tingdau Hezekiah nra süt eh tsai kera nzwa di. Pa RAMPAUBE da kekie teigai, nah RAMPAUBE pecu mpau eh pa yilu kera marehi ge pwa lia. 25 Dede Hezekiah RAMPAUBE pecu ngha kebeu de ziemne hetwa pwa peu lu tadi, kedanemene pa ngang kedine. Cine pe da, nah Judah nah Jerusalem da rata gwangdi. 26 Ciuliede, kekamle Hezekiah ngang kela gade pecu tei henalu, pa nah Jerusalem ga kelunghmedung de, ciciu eh Hezekiah tingdau, RAMPAUBE rata penui da gwang cang ma.

27 Hezekiah mahei süt nah herüt pung süt. Pa pe rangkanggeu, kecak, tangtsu pemi kehung, nah mosala, nah hegeudung ziemne de nah pemi kehungdung ketsamtsam ziemne maniakibung tei lu. 28 Pa pe ciu, zau keheci, nah maca luhlüt ziemne mabam kidung, nah makaune leune ziemne taktyei kidung bam. Pe meurün haudung de penui kidung ga bam. 29 Aidungde reude, pa pe ziemne namdidung de teilu nah meuründung nah kauhau kekiee gede ngaulu, kedanemene Tinggwang pecu mabam mahei kekieege pwa kepeune. * 30 Hezekiah aipaude ne Gihon duirwak nreube de kaamdi, delwe pa cide David namdi naimiak kenlütle ge teu nzui hung gailu. Hezekiah pe bata leune tei zeu di mene teilu. 31 Ciuliede, Babylon gade hegwangram deudiding keteime hangdeu cika miswakegah bata tei kedi de pecu keteu zie lie pe dage lang kegai dau, Tinggwang pecu pütti, pecu kedakpie kerane, nah pe mlung ga kebam pelane cilu kerane.

32 Hezekiah tei kegai kedabedung, pa RAMPAUBE da samting samkakkelu bata tei kegai leune de, Amoz napei caihakecibe Isaiah marengei kengau ga nah Judah nah Israel gwangpeidung ha kwak gage raupwa la. 33 Hezekiah pe paumedung de nzwa tsaidi, nah penui pecu David leuhme raudung kideutu gage kungdi. Judah nah Jerusalem ga kelunghmedung pelane pe tsit dau pecu herüt peugai. Pe napei Manasseh ne pebam leu eh hegwang teilu.