1 Asa napei Jehoshaphat pe pei hegwang bam leulu. Jehoshaphat Israel de renia kerane pekatei pecu tei ngkienglu. 2 Pa Judah riekelu namdidung pelane gage reugwamedung kailu. Judah deu ga Ephraim namdidung de, pe pei Asa ne tuikeludung gage pa ramzeukidung teilu. 3 RAMPAUBE Jehoshaphat de ngngwala kedanemene pa pe pei David puisau keraibedung de ga tetla nah Baaldung de reca la kemakne.* 4 Meliene, pa pe pei Tinggwang de ngngeilu, nah pe ajadung de mzuilu, Israelme zaidung de mzui mene. 5 Cine RAMPAUBE Jehoshaphat de pe ba gage Judah hegwangram reu kengkieng peu beu; nah Judah ga mina pelane Jehoshaphat de rüt eh mta mapeu pwapeu. Cine pa mahei süt di nah mina pecu hetwa peudi. 6 Pa RAMPAUBE zaidung gage pe lung kaidi. Pa nlumkemak reca ni kehudung de nah Judah gade herabepui Asherah mie de keu gidi.

7 Pa hegwang teikelu mmi kecum bekum pe kangga kedimedung, Ben-Hail, Obadiah, Zechariah, Nethanel, nah Micaiah penuide Judah namdidung ga ledeu kerane langgai. 8 Levime aidungde penuide ngngwala; Shemaiah, Nethaniah, Zebadiah, Asahel, Shemiramoth, Jehonathan, Adonijah, Tobijah, nah Tob-Adonijah; nah cingkupei Elishama penai Jehoram de penuide ngngwa mie. 9 Penui RAMPAUBE zai laisiukwak de pwalwe Judah ga ledeu. Penui Judah namdidung pelane ga mie minadung dage cide ledeu.

10 Judah taiga kebam hegwangramdung ga RAMPAUBE de kehing bamdi, cide ziemne penui Jehoshaphat de ngngwa hereu tei tadi. 11 Philistinme kangge ne Jehoshaphat de kerüt gade rangkanggeu nah mta mapeu teugwang beu. Arabiame de pecu meuründung 7,700 nah hemeudung 7,700 teugwang beu. 12 Jehoshaphat ngkieng sütdi. Pa Judah ga kudadung nah kaikehekwa namdidung teilu. 13 Peda Judah namdidung ga taktyeidung kekiee ge bam nah reugwame, kengkieng minadung, Jerusalem ga bam. 14 Aidungde penui mzidung penui pautsa rehi gade: Judah pautsa gade Adnah ne reugwame pecang reu muibe nah pa pe kangga reugwame 300,000 gede ngngwala. 15 Pe kangga Jehohanan reugwame muibe, nah pecu mina 280,000 ngngwala; 16 Pecai Zichri napei Amasiah, delwe pecu reugwame 200,000 ngngwala. Amasiah neungga eh RAMPAUBE gwa teikera tetpetlu. 17 Benjamin pautsa gade reugwame reu kedibe Eliada, pa mina kengkieng kekuu kau ge. Pa reugwame lakpi kepwa nah hegeu kepungme 200,000 ngngwala. 18 Pecai Jehozabad nah pa reugwame 180,000 hereu tei kera mteikelume de ngngwala. 19 Mina aidungde pelane hegwangpei gwa keteime, nah aidungde si eh hegwangpei reugwame kedame de riekelu namdidung Judah cuikui pelane gage kailu.