1 Josiah mmi heset dige pa hegwang teilu; pa Jerusalem ga mmi camreiehket hegwang tei. 2 Pa RAMPAUBE miakdwa gade petaube teilu, nah pe pau David puisau de mzuilu, nah zetle mede hile ge nreugai dima. 3 Pa hegwang teikelu mmi pe heset bekum, pa hena bamreu kecudau, pa pe pau David Tinggwang de peei cuhdi. Mmi kereiehkena bekum, pa Judah nah Jerusalem ga nlum kemakme reca nidung, Asherah miedung, nah mamie keda nah hegeu le teikelu miedung pelane teimsia cuhdi. 4 Pe minadung pe dwa gade Baal recabamdung tei ngkau di; pa marim kehengui recabam penui peu reu ga kebam de de dang tütdi. Pa Asherah miedung de tei kecaira dedi nah mamie kedadung pelane de nah hegeule tei kelu miedung, cidungde rebui mmi di kemaktane tei kecaira di. Pa cipau rebui de pwa cidungde de ratak tei beu kelame raudung gage kaidi. 5 Pa nlum kemakme cingkume radung pwa penui recabamdung gage rugai. Ainzwa eh, pa Judah penai Jerusalem de tei mcilu. 6 Pa aide nzwa eh Manasseh, Ephraim, nah Simeon namdidung, nah Naphtali deudung kecang, nah cidungde twagwa kebam sia kedi namdung gade tei gai. 7 Pa recabamdung tei ngkau di, nah Asherah miedung tei kecaidi nah mamie dungde rebui teidi, nah Israel deu pelane ga kehengui recabamdung pelane tei pang kecaidi. Pecai pa Jerusalem ga cailigwangdi.

8 Pa hegwang tei kelu mmi kereieheset bekum, Josiah hangdeu nah Kerecaki tei mci kelucai, pa Azaliah napei Shaphan, namdi deuceudibe Maaseiah, nah Joahaz napei Joah Keraube, de RAMPAUBE ki retak kerane langgai. 9 Penui cingku kedibe Hilkiah da mie, nah Tinggwang kerecaki gade rangkang hekwa kelu pwa pe dage balie gaibeu, cide Levime kikam kekwamedung, Manasseh penai Ephraim dade, bangh pwa kebam Israel leuh pelane dade, Judah nah Benjamin pelane dade, nah Jerusalem ga kelunghme dade hekwa kelu. 10 Penui rangkang de pwa RAMPAUBE kerecaki ga hetah ketei kerengeime ba gage nlum beudi. Mina aidungde ne kerecaki retak nah keteime de penui ziehi tei pwa peu. 11 Penui tsing ta keteime nah mata keteime de peu tangtsudung nah kentok pak ziemne tsingdung luilu kerane, nah Judah gwangpei kangge ne tei msia kedi ki hesumdung de peu retaklu kerane penuide peudi. 12 Minadung masang süt eh mata teilu. Penuide pie kerengeime cai Levime, Merari pautsa gade Jahath penai Obadiah, nah Kohath pautsa gade Zechariah penai Meshullam. Levime kedame, penui lei tei kecime ciau, nah mtingsüt eh mata keteime de pierengei la. 13 Levime aidungde au kerecaki ketei niadung pung kenggwame nah heta ketsamtsam keteime pelane de pie kerengeime. Levime makeraumedung, kedime, nah kirie kekwamedung de bam.

14 RAMPAUBE kerecaki ga pung gwang kelu mabam gade penui rangkang keu mpet kebam dau, cingkupei Hilkiah RAMPAUBE zai laisiukwak Moses dage kaikebeu de ngaulu. 15 Hilkiah Shaphan keraube dage rangdi, "Ih RAMPAUBE kerecaki gade Hezai laisiukwak de ngau luda." Hilkiah Shaphan de laisiukwak cide keugwang beu. 16 Shaphan hegwangpei da laisiukwak de keugwang beudi, nah peda sam pau eh ranggai, "N kilamedung penuide nlum gai kebeu pelane tei luda. 17 Penui RAMPAUBE kerecaki gage rangkang kaipwa kebam de keu luda, nah cide pwa penui de kerengeime ba gage nah heta keteime de peu dida." 18 Shaphan keraube hegwangpei de ranglia gai, "Cingkupei Hilkiah ne laisiukwak ge acu pwa peu." Delwe Shaphan cide hegwangpei dage pei lia. 19 Cidau hegwangpei hezai laisiukwak de pei kegai samdung siu kelu dau, pa pe painidung hietti. 20 Hegwangpei aja aide Hilkiah, Shaphan napei Ahikam, Micah napei Abdon, hezai keraube Shaphan, nah pe kilabe, Asaiah de peu eh ranggai, 21 "Mie delwe RAMPAUBE dade a ziemne nah Israel nah Judah ga lungh kelame ziemne pe lungning be keteu lo, keledeu sam laisiukwak de ngau kelu de ziemne. Kedanemene RAMPAUBE rata anui reu ga gwang kedi de au dizu kedine. Pe rata dizu lie, kedanemene anui paume aipau laisiukwak samdung de mzai luma, nah cide ga rau pwa kebam leune tei mzai luta kedine."

22 Cine Hilkiah, nah kedame hegwangpei aja gade caihakecipui ge pezi Huldah dade ma keteu kera miedi, Shallum nau da, Tokhath napei nah Hasrah tsapei kerecaki painidung kerengeibe (pa au Jerusalem, Deuceu Kenabe ga lungh), nah penui peda aiciu eh rangdi. 23 Pa penui da rangdi, "Aide RAMPAUBE Israelme Tinggwang ne ranggai: Nnuide a dage lang kegai be da gwang rang beulo, 24 ‘Ainzwa RAMPAUBE ranggai: Pielo, laisiukwak ga resetdung raupwa kebam pelane Judah gwangpei dwa gade penui pei kegai de, Ih aipau ni ga nah cika kelunghmedung da kengkap peu lai eh bam dida. 25 Cine aipaudung de teicang zie kedanemene penui acu gidi nah penui marim kehengui ru pwa hera kedadung de peu kedine, nah penui ba le tei kegai pelane ziemne a rata tei dida, ciziemne, a rata aipau ni ga rui gai zie nah cide tei mmütti gailak.’ 26 Dede Judah gwangpei, RAMPAUBE dade daipai pa tei maisia bi keteu kerane nnui de lang kegaibe da, nnui pe dage ainzwa rang zie, "RAMPAUBE, Israel Tinggwang aide ranggaila: Nang kingnei kelu sam de, 27 kedanemene nang n mlung nciep, nah Tinggwang dwa gade nkatei ncu tei henahlu nang aipau ni de ga nah aika kelunghme da pe rata gwang di lai kecu samdung siu kelu dau, nah kedanemene nang a dwa de henah kelune nah n paidung hiet nah a dwa de hap kecune, Ih n kwa kingnei luda, aide RAMPAUBE ne rang ndugai, 28 pielo, Ih ncu n paume da ngngwa teu gwang beuzie. Ncu peu n lung nciep eh n rau gage pwa gai zie, nah aipau ni dega nah aika kelunghme de Ih kengkap peu lai eh kebam de nang ngau cang lak.’" Minadung sam aide teu eh hegwangpei da cailigwang di.

29 Pecai hegwangpei pe samgwamedung de langgai eh Judah nah Jerusalem ga hangkiamedung pelane de qu hekwalu. 30 Delwe hegwangpei RAMPAUBE kerecaki ga nghang, nah Judah minadung nah Jerusalem ga kelunghmedung pelane de, nah cingkume, Levime nah mina pelane, kedi gade keceu pelane de. Pecai pa penui pelane dwa gade samkakkelu laisiukwak samdung pelane RAMPAUBE kerecaki gade ngau kelu de peigai. 31 Hegwangpei pebam ga saplu delwe RAMPAUBE dwa gade samkaklu, RAMPAUBE lampui mzui eh tet gwang kera, nah pe ajadung mzai kera, nah pa teilo kebeube nah pe zaidung de, pe mlung pelane nah pe keringria pelane teu samkak kelu samdung, aipau laisiukwak ga raupwa kela de mzai kerane. 32 Pa Jerusalem ga nah Benjamin ga kebamme leune de peu samkakkelu de mneilu kera sampetlu. Jerusalem ga kelunghmedung, Tinggwang, penui paume Tinggwang de penui ngngwa samkakkelu zaidung de mzailu. 33 Josiah ma kemneeudung pelane Israelme minadung gu hangdeudung gade keu gidi. Pa Israel ga kelungh leune de RAMPAUBE penui Tinggwang de reca kera rangbeu. Kedanemene pa lungh kebamtane, penui RAMPAUBE dade tet ndei dima, penui paume Tinggwang dade.