1 Rehoboam Jerusalem ga gwang luge, pa Judah nah Benjamin kelak gade, mipeina reugwame kedet kelu 180,000 de qu hekwalu, Israel de ngngwa regi kerane, Rehoboam gwangram teucuh dailu kerane. 2 Dede Tinggwang minabe caihakecibe Shemaiah da RAMPAUBE sam gwang, rang eh, 3 "Solomon napei Rehoboam, Judah gwangpei dage, nah Israelme pelane Judah nah Benjamin leuh pelane dage rangbeulo, 4 ‘RAMPAUBE aide rangla, "Nang n sinamedung de gwaketang mede hereu tei kerabe ma. Mina leune pe ki ga cailigwang di maisia, Ih ne aide teigai kecune."’" Cine penui RAMPAUBE samzai teilu nah Jeroboam de gwaketang zielie kela gade cailigwang di.

5 Rehoboam Jerusalem ga lunghdi, nah nsiulu kerane, Judah ga riekelu namdidung teilu. 6 Pa Bethlehem, Etam, Tekoa, 7 Beth, Zur, Soko, Adullam, 8 Gath, Mareshah, Ziph, 9 Adoraim, Lachish, Azekah, 10 Zorah, Aijalon, nah Hebron teilu. Aidungde Judah penai Benjamin ga riekelu namdidung. 11 Pa kudadung de teingkieng lu delwe cidung gage muiteume kai, ketyeipok, maca, nah zaudung de si eh hekwalu. 12 Pa namdidung pelane gage hegeudung, nah hengeidung kailu nah cidungde teingkieng sütlu. Cine Judah penai Benjamin pegu teidi.

13 Israel ga kebam pelane cingkumedung nah Levimedung penui deu gade peda miedi. 14 Judah nah Jerusalem ga gwang kerane Levimedung kekiee ge penui gu namceudung nah tseheideudung pütdi, kedanemene Israel hegwangpei Jeroboam nah pe namedung penuide gwagi kedine, iciu eh penui RAMPAUBE ziemne cingku tadung tei gailak di. 15 Jeroboam reca nidung nah pa ne tei kelu hemeu nah hetumna miedung ziemne cingkumedung de kedetlu. 16 Israel leuhdung pelane gade minadung Levime caisui gwanglu, Israel Tinggwang, RAMPAUBE de peei kerane penui mlung kai kelumedung; penui Jerusalem ga RAMPAUBE, penui peinamedung Tinggwang dage ratak teibeu kerane gwanglu. 17 Cine penui Judah gwangram teingkienglu nah Solomon napei Jeroboam de mmi kecum ge teingkieng beu, nah penui mmi kecum ziemne hegwangpei David penai hegwangpei Solomon lampui ga tetlu.

18 Rehoboam pa Mahalath de penau lu, pe pei au David napei Jerimoth, nah pe pui au Abihail, pa Eliab napui nah Jesse tsapui. 19 Pa pecu mipeinadung mnabeu: Jeush, Shemariah, nah Zaham. 20 Mahalath cai, Rehoboam Maacah de luulu, Absalom napui; pa pecu Abijah, Attai, Ziza, nah Shelomith penuide mnabeu. 21 Rehoboam au Maacah de hungla, Absalom napui de, penau kedadung pelane nah pe nauseupuidung swade (pa pe nau kereieheset teilu nah nauseupui riakherok, nah pe na mipei ngkaieheset nah pe napui riakherok lunghlu). 22 Rehoboam Maacah napei Abijah de ditube tei kera kedetlu, pe sinamedung kakgade muiteube; pa pecu peu hegwang tei kera cetla. 23 Rehoboam mriak eh hegwangtei; pa pe napeidung pelane de Judah nah Benjamin deu ga riekelu namdi pelane gage teizang gai. Pa penuide de ketyeipok kekiee penuide peu nah penui ziemne henau kekiee ge peeibeu.