1 Jerusalem ga kelunghme, Jehoram napei henatube Ahaziah de peu pe pei mding hegwang teilu, kedanemene mina maa ge Arabme de ngngwa eh ramzeuki ga kegwang dau, pe napei kecingmedung de teitset ciak kedine. Cine Judah gwangpei Jehoram napei Ahaziah ne hegwang teilu. 2 Ahaziah mmi ngkaiehkena dige pa hegwang teilu; pa Jerusalem ga mmi ge hegwang tei. Pe pui zi cai Athaliah; pa au Israel gwangpei Omri napui. 3 Pa hegwangpei Ahab kelak puisau de nzuidi kedanemene pe pui Athaliah ne heta kesia ketei gage pecu ledeu gai kebeune. 4 Ahaziah RAMPAUBE miakngau gade kemau teidi, Ahab kelak kesia tei kebam nzwa eh, kedanemene pe pei tsai kedi cai, penui ne pe keledeume tei eh pecu kengkap gage saugai beudi. 5 Pa penui keledeu sam de de nzuidi, pa Israel gwangpei, Ahab napei Joram de ngngwa Aram gwangpei Hazael de Ramoth Gilead namdi gade ngngwa regi kera mie. Aram reugwame ne Joram de tei rejamdi. 6 Joram, Ramah gade Aram gwangpei Hazael de ngngwa regi kecudau, penui ne pecu rejam kedi de yilu kerane Jezreel namceu ga cailigwang lu. Cine Judah gwangpei, Jehoram napei Ahaziah, Ahab napei Joram de pie zielie Jezreel ga mie, kedanemene Joram de rejam kedine.

7 Tinggwang ne Ahaziah Joram de mie kepie aide teu eh Ahaziah de teingkau lu. Pa gwang kelu dau, pa Jehoram de ngngwa Nimshi napei Jehu de gwaketang kera mie, pa au RAMPAUBE ne Ahab kelak de teingkap kera kedet kelube. 8 Cidau, Jehu Tinggwang tutiak de Ahab kelakdung dage tei kebam dau, pa Judah muiteume nah Ahaziah napei sinamedung Ahaziah gwatei bam eh ngaulu. Iciu eh Jehu penuide teitsetdi. 9 Jehu Ahaziah de peei; penui pecu Samaria ga mbai bam eh ngaulu, pecu Jehu da ngngwa gwang lwe pecu teitsetdi. Ge penui pecu kungdi, kedanemene penui rangdi, "Pa au Jehoshaphat napei, pe pei pe mlung pekiene pwa RAMPAUBE de kepeei kauge." Cine Ahaziah kelak gade migede hegwangram reu hegwang tei kera kengkieng gahdi.

10 Cidau hegwangpei Ahaziah pui Athaliah pe napei tsai kedi ci luge, pa Judah kelak ga hegwangme na pelane de teitset cuhdi. 11 Dede hegwangpei napui Jehosheba, ngkim eh Ahaziah napei Joash de hegwang name de teitsetdi lai eh kebamme dade ngngwa teu tetdi. Pa pecu nah pe nkwetpui de zeubung gage kaidi. Ainzwa eh hegwangpei Jehoram napui Jehosheba, cingkupei Jehoiada nau (pa au Ahaziah tipui), pecu Athaliah dade kebailu, iciu eh Athaliah pecu teitset melu kerane. 12 Joash penuide ngngwa, Tinggwang kerecaki ga mmi herok ge mbai bamdi, cidau Athaliah hegwangpui tei eh hangdeu reu kedi tei bamdi.