1 Rehoboam au Shechem namdi ga miedi, kedanemene Israel tingpeule cuikui mina pelane pecu peu hegwang teilu kerane Shechem ga gwang kelane. 2 Nebat napei Jeroboam aide siu luge pa Egypt gade caili di (kedanemene pa Egypt ga kebamne, pa cika hegwangpei Solomon dade pak kelane).* 3 Cine penui langgai eh pecu qu, ge Jeroboam nah Israelme pelane gwanglu; penui Jeroboam de mpau eh rangdi, 4 "N pei ne anui ngwanggai tei rüt dida. Cu ciziemne, n pei ta kehung de teimca dilo, nah pa anui reu gage kekai ngwanggai kerüt de teimca dilo, iciude anui n gwatei luzie." 5 Hegwangpei Rehoboam penui dage, "Lang cumne cai a da gwang dailu," de eh ranggai. Cine penui tetdi.

6 Hegwangpei Rehoboam au pe pei Solomon ringbam keladau pe dwaga sapbam kelame kecingmedung de keteugai, pa rangdi, "Mina aidungde sam keli kerane nnui acu dai sam ledeubeu laino?" 7 Penui pe dage ranggai, "Magade nang mina aidung dade yi nah penui suiyi tei lucai, nah penui dage sam keyidung rang lucai, penui n kilame tei lamui luzie." 8 Dede Rehoboam kecingme keledeusam rang kegaide cikemak nzwadi, nah pa rehangme pe dwaga pecu nzang kelame de keteudi. 9 Pa penui dage rangdi, "Nnui acu daipai keledeusam peu laino, iciude minadung a da gwang ‘N pei anui reuga ge ngwanggai dwak kegaide teimca dilo’?" de rang kelame de samli peulu kerane. 10 Rehoboam de ngngwa lunghcuh kelube peina de pe dage rangdi, "N pei Solomon penui ngwanggai teinrüt dilie dede nang cide teimca beu maisia lie rang kelame de nang ainzwa rangbeu maisia. Aide nang penuide rangbeu maisia, ‘A zurang keceuna de de a pei kia swade siuki lie. 11 Cu cine, a pei ne nnui ngwanggai püt kerüt gele teinrüt beu liede, Ih nnui ngwanggai gage kaisi beuzie. Apei tsingrang le nnuide saja peu, dede Ih au heruingapuidung le nnuide saja peu zie.’"

12 Cine Jeroboam nah mina pelane hegwangpei, "Lang cumne benai a da cailigwang lu," de eh rang kegai nzwa, lang cumne benai hegwangpei Rehoboam da gwanglu. 13 Kecingmedung keledeusam de mlaidi eh Rehoboam penui dage pe sam siasüt gai. 14 Pa rehangmedung keledeusam de mzui eh penui dage samrang, "A pei nnui ngwanggai kerüt peugai, dede Ih cide gage kaisi beuzie. A pei nnuide tsingrang le saja peu, dede Ih nnuide heruingapuidung teu saja peu zie."

15 Cine hegwangpei mina sam kingnei tadi, cide tei kegaide Tinggwang lungning kedine, iciu eh RAMPAUBE pe sam Shiloh namdi caihakecibe Ahijah ne Nebat napei Jeroboam dage rang kegaide teicanglu kerane.

16 Israelme pelane hegwangpei penui sam kingnei takedi ngau luge, minadung pe samkeli eh rangdi, "David da anui qwa daipai bam no? Jesse napei da anui mabam bam meda! Israelme nnui ketket kecu pe paiki riep ga cailigwang cu. Cu au nkatei n ki rengeilu cu, David." Cine Israelme pelane penui paiki ga cailigwang di. 17 Dede Israelme Judah namdidung ga lungh kebamme ziemne au, Rehoboam penui reu hegwang teidi. 18 Pecai Hegwangpei Rehoboam Adoniram de langgai, pa au mikemei tei eh heta keteime reu kedibe, dede Israelme tangtsu le pecu sam tsetdi. Hegwangpei Rehoboam pe bagi teu eh Jerusalem gage zette pak gaidi. 19 Cine Israelme henai kecang de David kelak de ngngwa renia eh lala.