1 Sheba gu Hegwangpui Solomon ha keyi siu luge, pa keheteu kecokdung keu pecu kedei kerane Jerusalem ga gwanglu. Pa maadi gede nzang eh gwang, utdung de peu mosala, kecak kekiee, nah tangtsu pemi kehungbe kekiee gele hepüt teilwe. Pa Solomon da gwang luge, pa pelung ga kebam pelane pe dage ranggai.✝ 2 Solomon pa keteukegai pelane pecu samli peugai, Solomon ziemne magede teipa zu kedi gah; pa samli peugai kemak kette gah. 3 Sheba gu gwangpui Solomon maci nah hegwangki pa tei kenzeu de ngaulu ge, 4 pe taktyeibam ga ketyeipok, pe kilame bamdung, pe kilame tadung nah penui painidung, nah pe piak kepwame nah penui painidung, nah pa RAMPAUBE ki ga recadung tei kegai*, pa pe swagah di. 5 Pa hegwangpei dage rangdi, "Ih a deu gade n samdung nah n maci ha siu kelude kesang da. 6 Ih aika gwang kemaktane au Ih siu kecude nlum ma, nah cu au a miak le ngau luda. N maci nah mabam pempie ge ha acu ranglia ma. Nang au Ih n ha kedi siukelu nreu swade diki.✝ 7 N minadung samlam daikenzwa ge pung no, nah n dwaga sap muibam kela n kilamedung daikenzwa ge samlam pung no, penui n macisam siu bam kelane. * 8 N Tinggwang RAMPAUBE de peu samlam punglu, pe suiyi nda ngau kelune, ncu pe hegwangbam gage kai kebeube, n Tinggwang RAMPAUBE ziemne hegwangpei teilu kerane. Kedanemene n Tinggwang Israel de ku kecune, penuide peu kelungta bam muilu kerane, pa ncu penui reu hegwangpei tei beuda, ncu peu kenzeube nah kesangbe gade kengkieng teu kerane!"

9 Pa hegwangpei de kecak 120 talents *nah mosaladung nah pemi kehung tangtsu kekieege peu. Sheba gwangpui ne hegwangpei Solomon de mosaladung kepeu aikenzwa madaude pecu peu dai ma. 10 Hiram kilamedung nah Solomon kilamedung, Ophir gade kecak, algum tsing nah pemikehung tangtsu de si eh teugwang. 11 Algum tsing le hegwangpei RAMPAUBE kerecaki nah pe ki takswadung teilu, leiketeime ziemne de leibungdung nah lyredung de. Judah cuikui deu ga tsing aide kenzwabe madaude pedwa ngau ma. 12 Hegwangpei Solomon Sheba gwangpui de pa lukeneu leune peu nah pa kie kela leune; pa hegwangpei da teu kegwang swa kiee eh pecu peugai. Cine pa nah pe kilame tetdi nah pe deu ga cailigwangdi.✝

13 Mmi ramsang kum Solomon kecak perüt 666 talents* ge ngau lula. 14 Aide heliketeime nah helila teikelame heraha teugwang kecu si lama. Arabia ga hegwangmedung leune nah deudi ga deuceudidung de kecak nah rangkanggeu Solomon de teugwang beu. 15 Hegwangpei Solomon kecak kedeu kelube pwa hegeudung kedi haina teilu. Cide ket ga kecak shekels hai herok* lütdi. 16 Kecak kedeukelube teu hegeudung hai cum de si eh teilu. Hegeu ket ga kecak minas kecum* le teilu; hegwangpei cidung de Lebanon hegung hegwangki gage kaidi. 17 Pecai hegwangpei hepwa ngeu lepwa hegwangbam kedi ge teilu nah cide kecak mcitube le teu kemailu. 18 Hegwangbam ga hang kecu pidwakdung herok bam nah cikage pidau bam gede dwa pwabam. Hegwangbam tu ramcau ga ba takbam bam, petu ramcau ga hingho mie kena saplwe. 19 Hingho kereiehkena pidwakdung ga sap, pidwak herok lule ailam ramcau ga. Hegwangbam cikenzwa keda hegwangram ga gah. 20 Hegwangpei Solomon pwa kesak piakdung leune kecak, nah Lebanon hegung gwangki ga pwa kesak piakdung pelane de kecak kemci le teilu. Kette rangkanggeu le tei ma, kedanemene Solomon tingdau rangkanggeu au makeyibe lie cet lama kecune. 21 Hegwangpei Solomon jaaidi ga duidi ga kemie liemdung maa ge bam, Hiram ga maa de si eh. Mmi kecum ramsang gade piage liemdung kecak, rangkanggeu, nah hepwangeu, hengadung nah ziangbeidung de si eh pung gwangla.

22 Cine Hegwangpei Solomon au kideu ga hegwangdung pelane swade mahei nah maci de kieeki. 23 Tinggwang pe mlung gage kai kebeude pe maci de kingnei kera ziemne, kideu ga hegwangdung pelane Solomon da gwangla. 24 Pecu peei kegwangme heraha, rangkanggeu nah kecak lidung, paihenidung, hereunet, nah mosaladung, hekwendung nah gadadung de si eh mmi ramsang kum teugwang beula. 25 Solomon au hekwen kidung nah bagidung cang mdai bam, nah hekwen keteume cang kereiehkena, cide pe bagi namdidung nah Jerusalem ga pe dage kainzeu la. 26 Pa Euphrates Reuki gade Philistinme deu kecang, nah Egypt deurai ga kecang hegwangme pelane reu kedi teigwang. 27 Hegwangpei Jerusalem ga rangkanggeu, hangdeu ga tangtsukang kieege bam. Pa cedar tsing teingkiee pwa hangdeu kehenahdung ga caimünbang kieege teilu. 28 Penui Solomon ziemne Egypt nah kideu pelane gade hekwendung teugwang beu.

29 Solomon ha kedadung, raitu gade gwang kamtu kecang, Caihakecibe Nathan hakwak, Shiloh ga Ahijah caihakecisam, nah caihakecibe Iddo kengaudung ga (Nebat napei Jeroboam hegwang ketei ha si eh) raupwala meni? 30 Solomon au Jerusalem gade Israelme pelane reu mmi riakdai ge hegwang teigwang. 31 Solomon pe paume nzwa tsaidi nah minadung pecu pe pei David namdi gage kungdi. Rehoboam, pe napei, pe bam leu eh hegwang teidi.