1 Judah gwangpei Hezekiah mmi ngkaiehmengei dige pa hegwang teilu; pa Jerusalem ga mmi ngkaiehekui hegwang tei. Pe pui zi cai Abijah; pa au Zechariah napui. 2 Pa pe pei David tei kegai nzwa, RAMPAUBE dwa gade petaube teilu. 3 Hegwang teikelu raitu bekum, kei raitu bekei, Hezekiah RAMPAUBE ki kikamdung ngkeilu eh cidungde retaklu. 4 Pa cingkume nah Levime de ngngwa gwanglu, delwe penuide naimiak kepetle bie recaki kigu gage qu hekwalu. 5 Pa penui dage rangdi, "A kwa kingneilu, nnui Levimedung! Nnuide teimcilu, nah RAMPAUBE, nnui paume Tinggwang ki teimcilu, delwe kemci ni gade kehera leune keu gidi lu. 6 Kedanemene anui paume masang luma nah RAMPAUBE anui Tinggwang dwa gade kemau teidi; penui pecu pütdi, nah RAMPAUBE lungh kebam ni gade penui zu nreudi, nah penui cainok di. 7 Penui kigu kikamdung de ngkuidi nah mitaubungdung tei mmütdi; penui kemci ni gade Israel Tinggwang dage marim kehengui rugai ma mede keru recadung teigai ma. 8 Ciziemne RAMPAUBE lunghop Judah nah Jerusalem da gwang bam dida, nah pa penuide pwa kengngi, kerehim, nah mi ngau kerau ge tei dida, nnui ngau kebam nzwa. 9 Cine anui peimedung hereu gade tsai dida, nah aide ziemne anui napeime, anui napuime nah anui naume hebaang teila dida. 10 Cu au RAMPAUBE, Israel Tinggwang de ngngwa samkak kera a lung ga cetlu, iciu eh peu pe rata anui dade nreu dilu kerane. 11 A napeidung, cu au nnui nghet so, kedanemene RAMPAUBE nnuide pe gwa tei, pecu reca, pe kilame tei kera nah kehengui rugai kerane kedetlu delu."

12 Pecai Levime cuhlu: Kohath pautsa gade; Amasai napei Mahath, nah Azariah napei Joel, nah Merari pautsa gade, Abdi napei Kish, nah Jehallelel napei Azariah; nah Gershon pautsa gade, Zimmah napei Joah, nah Joah napei Eden; 13 Elizaphan pautsa gade, Shimri penai Jeuel; nah Asaph pautsa gade, Zechariah penai Mattaniah; 14 Heman pautsa gade, Jehuel penai Shimei; nah Jeduthun pautsa gade, Shemaiah penai Uzziel. 15 Penui au penui sinamedung de qu hekwalu, penui renet zai gade penuide teimcilu, nah hegwangpei rang kebeu nzwa, RAMPAUBE sam mzui eh, RAMPAUBE ki teimci kerane penui pelung ga lütlu. 16 Cingkume RAMPAUBE ki teimci kerane kerecaki helungle lütlu; penui RAMPAUBE kerecaki gade mcikemakbe ngaukelu leune penui kerecaki kigu gage pwa mpetlu. Levime cidungde Kidron reuki gage pung mie gaidi. 17 Penui hekei raitube langnaige benai teikemci heta de mdeulu. Hekeizie lang heset ne benai penui RAMPAUBE kerecaki kigu ga teimci pet canglu. Pecai lang heset ne penui RAMPAUBE ki teimci silu. Hekei raitube ziangreieherok benai penui teicanglu. 18 Pecai penui hegwangki ga lütlwe hegwangpei Hezekiah da gwang eh rangdi, "Anui RAMPAUBE ki pelane teimci luda, keru recadung recabam, nah tangkubam, nah pe netdung pelane si eh. 19 Cine anui mtei canglu nah anui Hegwangpei Ahaz pe hegwang tingdau samsang mene keugi kedi niadung pelane teimci dai luda. Ainie, cidungde RAMPAUBE recabam dwaga bam."

20 Ge hegwangpei Hezekiah tingcang cuh zilu nah namdi ga muiteume de qu hekwalu, delwe pa RAMPAUBE ki ga hangdi. 21 Penui ketumseu hena, meurünseu hena, meurün hena, nah hemeuseu hena teugwanglu, hegwangram, kemci ni ziemne nah Judahme ziemne kemau reca teigai kerane. Pa cingkume, Aaron leuhme de aja kaigai, RAMPAUBE recabam gage cidungde ratak teigai kerane. 22 Cine penui ketumseudung de gilu, nah cingkume cidungde jai keulwe recabam gage kezingailu. Pecai penui meurünseudung de gilu delwe cidungde jai recabam gage kezingailu; nah penui meuründung de gilu delwe penui jai recabam gage kezingailu. 23 Penui hemeuseudung de hegwangpei nah ngkwa kebammedung dwa ga kemau reca tei kerane teugwanglu; ge penui cidungde reu gage penui ba kaigai. 24 Cingkume ne cidungde gilu, nah Israelme pelane mau keugi dilu kerane penui cipaudung de jai le pwa recabam gage kemau reca tei gailu, kedanemene hegwangpei Hezekiah ne keru reca nah kemau reca Israelme pelane ziemne tei kera aja kaigai.

25 Hegwangpei David aja kai kebeu nzwa eh, nah hegwangpei caihakecibe Gad, nah caihakecibe Nathan rang kebeu nzwa eh, Hezekiah Levime de peu RAMPAUBE ki ga bamlu, ntwaidung, leibungdung, nah lyredung pwa eh, kedanemene aja cide RAMPAUBE ne cairasam kecime de rangkebeu sam kecune. 26 Levime David leibungdung, nah cingkume telui pwalwe kerecaki sap twagwalu. 27 Hezekiah recabam gage keru reca teigai lo eh cidungde aja kaigai. Keru ratak tei cuh kecudau, RAMPAUBE de ketwalei de tei mdeulu, telui, nah Israel gwangpei David leibungdung de kwa si eh. 28 Maadibe reca cuhdi, leiketeime leitei, nah telui kekwame kwagai; nah aidung de pelane keru reca teicang kemaktane tei jüja bamdi.

29 Penui recadung cide cang kedi dau, hegwangpei nah cika kebam pelane pecu ngngwa keumie eh recadi. 30 Cipaureude, hegwangpei Hezekiah, nah muiteumedung Levime de David nah caihakecibe Asaph ne raupwa kebam lei de teu RAMPAUBE de ketwalei tei kera sam kaibeu. Penui suiyi eh ketwa leidung teigai, nah penui keumie eh recadi.

31 Pecai Hezekiah rangdi, "Cu nnui RAMPAUBE dage nnuide teimci gai luda. Ratakdung nah ketwa recadung RAMPAUBE ki ga pung gwanglu." Hemaabe ratak tei nah hetwa peu kerane reca pwa gwanglu, nah lungnei kebamme keru recadung pung gwanglu.✝ 32 Keru reca tei kera hemaabe pung gwang kelu pelane ge ketumseu riakhena, meurünseu haige, nah keda meurünseu haina. Aidungde pelane RAMPAUBE dage keru reca teigai kerane. 33 Kemci recadung cai ketumseu hai herok, nah meurün cangcum. 34 Dede cingkume keru reca ziemne makaune geu gau kera cam sütdi, cine penui siname, Levime, penuide heta cang kemaktane nghabeu, nah cingkume penuikatei de teimcilu kemaktane, kedanemene Levime au penuikatei de teimci kecu cingkume swade mting sütla. 35 Cipaureude, keru reca tei kera kekieege bam; cidungde macadung le kekangbau reca teilu, nah keru reca pelane ziemne zau reca bam. Cinzwa eh RAMPAUBE ki ga reca kecu pebang dwa dailu. 36 Hegwangpei Hezekiah nah Judahme pelane de penui sui yilu, kedanemene Tinggwang mina ziemne maleune mtei gaibeu eh, hetadung tei mzet süt kelune.