1 Pecai hegwangpei Darius aja ge kaigai eh penui Babylon ga laisiudung kekai ki ga, ma pemi kehung kai kenzeu kiga peeilo eh. 2 Pecai Media deuceu ga kebam Ecbatana hetaideu gade laisiudum ge ngaulu, nah sam ainzwa rau pwala:

3 "Hegwangpei Cyrus hegwang teikelu raitu bekum, hegwangpei Cyrus Jerusalem ga kebam Tinggwang ki de ziemne aja ge kaigai:

‘Peu ki de tei ncuhlu, ratakdung teigai kebeu nide gage, nah peu pe bangdwa teicuh dailu. Pe hu cubit 60 zie. Pe di cubit 60 zie, 4 tangtsu kedi lip cum nah tsing keheci lip ge le. Nah peu pemi hegwangpei mabam gade kaibeu lu. 5 Nah cide si eh, peu Tinggwang kerecaki ga (kecak nah rangkanggeu) lidung, Nebuchadnezzar Jerusalem ga kebam kerecaki gade keumpet kelude nah Babylon ga keugwang kelude, teu cailigwang lu. Nah Jerusalem ga kebam kerecaki dega peu keugwang dailu. Iciu eh nnui cidungde Tinggwang kerecaki gage kailu maisia.’"

6 Pecai hegwangpei Darius sam aide langgai: "Cu Euphrates Reuki kenlütle deuceudibe Tattenai, Shethar-Bozenai, nah penui kangzangme nah Euphrates Reuki kenlütle deuceu kedimedung: cikade mdei dilu. 7 Aipau Tinggwang kerecaki ta de püt dilu. Peu Jewme deuceudibe nah Jewme hangkiame de ndaa kesap nide gage Tinggwang kerecaki teigai lu. 8 Tinggwang kerecaki ketei ga nnui Jewme hangkiame, aidungde dage dai teigai maisiabi kecu Ih aja ge kaila. Nah hema mpet kedidung peu hegwangpei mabam gade (cide cai, heraha Euphrates Reuki kenlütle deuceu gu) penuide peu siakte beulu, iciu eh heta de mtakdi melu kerane. 9 Nah teumaikesia keheibede (Jerusalem ga kebam cingkumedung teu maisialie kecube, ketumseu keceunadung, mede meurünseudung, mede meurünnadung tinggim Tinggwang dage keru recadung teigai kerane, wheat, ncai, zau, mede olive ca), (cide teiluta diso) cide peu tingba ge cai tingba ge penuide pwapeu lu, 10 iciude penui perim-kehengui ratakdung tinggim Tinggwang dage reca teigai beulu kerane nah hegwangpei nah pe name teilung ziemne kielu kerane.

11 Nah Ih aja ge kai gaila, mina keheibe de hezai aide mzailu kemakbe de, tsingsum ge pe ki gade teumpet lu, nah, teu cuhlu eh pecu cikage reugai dizie. Nah aide ziemne pe ki peu ralie tum ge tei dizie. 12 Nah peu Tinggwang pe zi cika bam zielie kelabe de hegwang keheibe de mede mina cide kedidi kera, nah Tinggwang kerecaki Jerusalem ga kebam de teimsiadi kera keteibe de keliengi kedibe teilu. Ih, Darius, aja aide kaila. Peu cide tei siakte lu!"

13 Pecai Tattenai, Euphrates Reuki kenlütle deuceudibe de, Shethar-Bozenai, nah penui kangzangme cinzwa tei siaktelu, hegwangpei Darius langkegai de mzui eh. 14 Nah Jewme hangkiame Haggai caihakecibe nah Zechariah Iddo napei ne caihasam rang kegaide nzwa eh teilu nah lungh yidi. Nah penui Israel Tinggwang aja nah Cyrus, nah Darius, nah Persia gwangpei Artaxerxes ajai kai kebeude mzui eh reca ni de teilu. 15 Nah aipau kerecaki de Adar bekei lang cumne benai teicang lu, cide hegwangpei Darius hegwang tei kebam mmi herok bekum.

16 Nah Israelmedung, cingkume, nah Levime, nah langgi kedimedung pelane penui suiyi eh Tinggwang kerecaki aide teimci gaibeu. 17 Nah Tinggwang kerecaki aide teimci gai kerane, penui hetumseu hai ge, meurünseu hai na, nah meurünna hai mdai, nah hemeuseu kereiekena peugai, Israelme pelane kemau reca tei kerane, Israel leuhme riak rehi gade. 18 Nah penui cingkume de penui mzidung gade heta nlum beudi, nah Levime de penui mzidung ga, Jerusalem ga kebam Tinggwang ta de ziemne, Moses laisiukwak ga rauteu kelade nzwa eh.*

19 Cine langgi kedimedung Kahkegwang ngyi penui cailigwang kelu raitube kei ziangreiemdai benai hengyi lu. 20 Kedanemene cingkume nah Levime ngngwa ket tei eh penuikatei penuide teimci lu, penui pelane de mcilu. Nah penui Kahkegwang meurünna de gilu langgi kedi napeidung pelane ziemne, nah penui siname ziemne, cingkume, nah penui ziemne de.* 21 Nah Israelmedung, langgi kedi gade cailigwang kelume nah heleuhbe cipau deu ga lungh kebamme mci kemak zai gade penuide kai ntsam kelu pelane ngngwa ketaktyei, RAMPAUBE, Israel Tinggwang de peei kera ziemne. 22 Cine penui Cehikaikemak Tangku Ngyi* de penui suiyi eh lang henane hengyi lu, kedanemene RAMPAUBE penui suiyi kepui tei kebeune, nah peu Assyria gwangpei lung penui lam ge nreugai kelune, iciu eh penui Israel Tinggwang, Tinggwang kerecaki ketei ga ngha kebeune.