1 Mmi kekiee gecai, Persia gwangpei, Artaxerxes hegwang ketei tingdau: Ezra (Seraiah napei, Azariah napei, Hilkiah napei, 2 Shallum napei, Zadok napei, Ahitub napei, 3 Amariah napei, Azariah napei, Meraioth napei, 4 Zerahiah napei, Uzzi napei, Bukki napei, 5 Abishua napei, Phinehas napei, Eleazar napei, Aaron napei cingku kedibe), 6 Ezra aipaude Babylon gade gwang, nah pa RAMPAUBE, Israel Tinggwang ne Moses de kepeu zai ga yisüt kecume ge. Nah pa kie kegai pelane hegwangpei pecu teibeu RAMPAUBE pe Tinggwang ba pe reuga kebamne.

7 Nah Israel napeidung kangge gade nah cingkume gade, nah Levime, nah lei keteime, nah herieki kekwame, nah kerecaki ga kilamedung Jerusalem ga nghang Hegwangpei Artaxerxes hegwang ketei mmi hena tingdau. 8 Nah pa Jerusalem ga kei mengei bekei gwanglu, cide hegwangpei hegwang teikelu mmi hena bekum. 9 Kedanemene Babylon gade kei raitu bekei tingba raitu benai hebeuh teicuh gai. Nah pa kei mengei bekei tingba raitu benai Jerusalem ga gwanglu, pe Tinggwang pecu ngha kebeune. 10 Kedanemene Ezra RAMPAUBE hezai kai kebeude peei kera ntip bam, nah cide teilu kera, nah Israel ga zaisiedung nah hezaidung ge ledeu kera.

11 Cu laisiu aide Hegwangpei Artaxerxes ne cingkupei Ezra, laisiu kecibe RAMPAUBE aja kai kebeu samdung nah Israelme ziemne hezai kai kebeu dage raukegai:

12 "Hegwangme reu hegwangpei, Artaxerxes ne kaipwa cingkupei Ezra, tinggim Tinggwang hezai kecibe dage kaila. Kelum gaila:

13 a hegwangram ga pelane de, Jerusalem ga ncu ngngwa mie keneume, Israelme gade, nah pe cingkumedung nah Levimedung, mie lubui lie eh Ih aja kai gaila.

14 Kedanemene hegwangpei dwagade, nah pe keledeumedung hang hena, Judah deuceu ha nah Jerusalem namdi ha n Tinggwang zai gade, n baga kebam ria gade dainzwa bambi keteu kera ncu langgai nzeu, 15 nah rangkanggeu nah kecak hegwangpei nah pe keledeume mta mapeu Israel Tinggwang Jerusalem ga lungh kebam de kepeude keu gwang kerane, 16 nang rangkanggeu nah kecak pelane Babylon deuceu pelane gade ngau kelube, mina nah cingkumedung mta mapeu kepeu teusi eh, Jerusalem ga kebamme Tinggwang kerecaki ziemne pemi tei mene kepeube: 17 ciziemne, nang rangkang aide, teu teune eh hetumseudung luilu, hemeuseudung, meurünnadung, nah penui kereca tsiu nah penui kesak reca; nah nang cidungde recabam Jerusalem ga n Tinggwang kerecaki ga kebamde gage reca teigai beulu. 18 Nah n ziemne nah n maame ziemne rangkanggeu nah kecak bangkelu dungde teu yi kerabe tei lubui, n Tinggwang suibe nzwa eh teilu. 19 Nah n Tinggwang kerecaki tade ziemne lidung ncu kepeudung, Jerusalem Tinggwang dwa gage pung gwang ciak gai beulu. 20 Nah n Tinggwang kerecaki ziemne teu maikesia kedabe leune nang pwapeu mai kesiabe, nang hegwangki mabam gade peu lubui.

21 Nah Ih, hegwangpei Artaxerxes, Euphrates kenlütle deuceu mabam keteume pelane dage aja kai gaila: Ezra (Cingkupei, tinggim Tinggwang zai kecibe) nnui dade kekie leune, cide tei sünne beu lulo; 22 rangkanggeu kikkars 100* kiee ge, nah wheat cors 100* kieege, nah zau baths 100* kieege, nah maca baths 100 kieege, nah mcai teu maikesia kieege peu lulo. 23 Tinggim Tinggwang dade kegwang aja kai kebeu pelane, tinggim Tinggwang kerecaki ziemne cide gapte tei teune beulu. Kedanemene daitei eh peu pe rata hegwangpei gwangram nah pe napeidung da gwangdi laino?

24 Nah nziemne au cingkume pelane reuga heraha kera riem kecu, ceha, mede hezai tei kecu Levime, lei keteime, herieki kekwame, kerecaki kekwame, nah cipau Tinggwang kerecaki kilame reu kengkieng peuma. 25 Nah Ezra n ziemne au, Tinggwang maci n baga kebam ria gade, Euphrates Reuki ga kebamme mina leune de tutiak lu kerame tiak lu nah keteumedung tutiakme de kedetlu, n Tinggwang zaidung ci kebam leune. Nah nang ci kemakme de ledeu maisia. 26 Nah n Tinggwang zai nah hegwangpei zai mnei kemakme leune dage, tutiakbe pe reu gage tei teune eh teigai beuzie, ketsai ziemne liede, mede langgi kera ziemne liede, mede pe ma tuiteukedi ziemne, mede hebaang ketei ziemne."

27 RAMPAUBE anui paume Tinggwang de twalu, Jerusalem ga kebam, RAMPAUBE kerecaki de rütlu kera, pa hegwangpei mlung gage cikenzwa peu, 28 nah samkakkelu samsang de hegwangpei dwa gade, nah pecu keledeume, nah hegwangpei kengkieng kedime pelane dwa gade acu liagai. Nah Ih, RAMPAUBE a Tinggwang acu ngngwa kelane Ih acu teingkieng lu, nah Ih Israel gade muiteume dungde acu ngngwa nghang kera hekwa luda.