1 Pecai ma aidungde teicang kelucai, Jewme muiteume a da gwang eh rang, "Israel ga minadung, nah cingkume, nah Levimedung penui katei penuide mina deu gade kai ntsam luma, Canaanme, Hittime, Perizzitme, Jebusme, Ammonme, Moabme, Egyptme, nah Amoritme penui kemneu ketei tadung ria gade. 2 Kedanemene penui napuidung kakgade penui nau kera nah penui napeidung nau kera penui luulu, iciu eh penui kemci leuh dede cika lungh kebamme de ngngwa teihera di. Nah muiteume nah kedimedung ne samsang kemak aide gade raitu." 3 Nah Ih makie aide siulu herizi, Ih keregui gahdi eh a paini hietdi. Nah Ih peutam nah a tangkei mai taidi, nah Ih a suisia süt eh ntum bamdi.* 4 Nah langgi kedime masanglu kemak ziemne Israel Tinggwang samdung de ziemne ngngi kedime pelane acu twagwa lu. Nah tinghegi reca de tei kemaktane Ih a suisia süt eh ntum bamdi.

5 Nah tinghegi ratak tei kedidau, Ih a lung keherei kebam gade cuhlu, nah cidau Ih a paini nah a cwatie hietdi. Nah Ih a pi koktung mie, nah RAMPAUBE a Tinggwang dage a ba hwa gai. 6 Nah Ih kekietei, "A Tinggwang, Ih n dage a zu pung ncuh kera ngngam dida, a Tinggwang. Anui mau au anui peu reuga swade hu kedine, nah anui mau tinggimdung ga nghang cang dida.✝ 7 Anui peime tingdau gade henai tingba kecang anui mau teisüt dida. Nah anui maudung ziemne, anuikatei, anui gwangpeidung, nah anui cingkume de hegwangpeidung deu ba gage, kiengtie ga, hebaang ketei ga, nah tuiteu kedi ga, nah hengam ketei gage pwapeu dida, henai tingba nzwa.

8 Dede cu, tingkak ge ziemne, RAMPAUBE anui Tinggwang anuide ngaunggia beuda anui ziemne baangkelume depeu paklu kerane, nah pe kemci ni ga anuide kai ntip beulu kerane, iciu eh anui Tinggwang anui miak teimrak beuda nah hebaang teikela gade anuide kerelui kecam nage peuda. 9 Kedanemene anui au Persiame deudi ga hebaangme kecune, dede anuide hebaang gade anui Tinggwang anuide püt dima. Dede pa anui dage samkakkelu masang de Persia gwangpei zu dwade teintie beu anuide kerelui peu kerane, anui Tinggwang kerecaki kwakcuh lu kerane nah sia kedidung de teihemi dailu kerane, nah kensiu herie ge Judah ga nah Jerusalem ga nnuide peu kerane.

10 Cine cu, anui Tinggwang, aide cia anui daige ranglu laino? Anui n ajadung gileu daidi kecune,✝ 11 nang caihakecime, n kilamedung ba gade aja kai eh, ranggai, ‘Nnui gum kerane lüt lai eh kebam deude au kehera deu ge cipau deudung ga kelunghme kehera de ziemne, penui kemneu, mcikemak batadung dene tuge lamde kedale kecang cide teipui kedine. 12 Cu cine, nnui napui dungde penui napeidung dage peuso, mede penui napuidung de nnui napeidung ziemne luuso, mede nnui penui kezuyi peeiso mede penui mahei kelungtane, ciude nnui ngkieng lu eh nah hangdeu ga ma keyi tyeilu kerane nah nnui napeidung depeu kelungta mabam cide gumlu kerane.’*

13 Dede anui bata kesiadung teikedi nah anui mau kedide ziemne anui reuga kegwang leune caide (nang, anui Tinggwang, anui maudung ziemne swa cam eh anuide saja peu, nah ainzwa eh nang anuide ringkelu pwa peuda), 14 anui n ajadung gikah daidi zieni nah mina kemneu ta keteimedung de ngngwa keleilüt daizie ni? Nang tei ngkapdi kemaktane anuide n rata lakni, ciu eh bangkelume mede ring kelume gahdi kera?

15 RAMPAUBO, Israel Tinggwang, nang au masang, kedanemene anui au henai nzwa, ringkelume ge teibam. Pielo! Anui kemaume ge tei eh n dwaga bam, migede aide ziemne n dwaga sap gailak kecune."