6 ओं जाईंत लेजा के, जों थोड़ो पेए तों थोड़ोज वाडे आन वादार पेए तों वादार वाडे. 7 हारेक जोओं जिवज्योअ मोनोम जेहें कोइत ठरव्योय तेहेंज कोइत भेट आपुहूं जोवे; मोनोम खुरकीइतोज नेताहां आपिइलो आवत्लो कोत ने आपहूं जोवे, काहाके खुसी वाअहीं आपनारो माहुंउं देवोहो गोमत्लो.✝9:7 कायदा 18:10; निती 22:9; 11:25 8 तुमुहूं लागनारी आखी गोठी तुमापोअ कायम रोअहूं जोवे; आन आखा हाजा कामोअ कोअते तुमापोअ भारपुर रोअहूं जोवे कोत देव तुमुहूं आखी जातीइ मेरवानी आपित सेकेहे. 9 वसनोम एहें कोइत लेख्योहो के,

"तो गोरब्योहों खुल्ला मोनोवाअहीं आपेहे;

तियाआ सतीपण कायम रोहे."✝9:9 भजन 112:9

10 ताहां जो पेएनाराहां बियारु आन खाअलोअ कोअते रोटू आपेहे, तो तुमुहूं बियारु आपे आन तियाहा जाअखु वादाड़े; आन तुमाआं सतीपणोअ फल वादाड़े.✝9:10 यश 55:10 11 एहें कोइत तुमू आखी गोठीम मालदार बोणित जाहा, ताहां तुमाआं मोन खुल्लो कोआ, मोन्ज्ये तुमाआं भेट आमाआं आथोवाअहीं वाटाय तेहेलाम देवोअ धन्यवाद ओवे. 12 काहाके ए सेवा पुरी कोइलो वाअहीं देवोअ माअहोंअ गरज एतीज नाहां पुरी ओवती, पोन माअहें देवोहो जाअखीलेहे धन्यवाद कोअतेहे.