1 ताहां आंय एक नोवू जुग आन नोवी धरती देख्यी, जुनू जुग आन जुनी धरती बेनू आरतात गोयेते, आन दोर्‍या बी ने रोयू. 2 ताहां आंय सोको होयर, नोवा येरुसालेमोहों देवोअ जागे जुगोमेहें रोत उतरीइत्लाहा देख्यो, तों वोरोअ काजे हिंगरावल्यी वोड़ली जेहें होबाड़ल्यो ओतो. 3 ताहां आंय राजगादीइहीं रोत निहींल्या एका आवाजोहो उनाअयू, "पाला, देवोअ वोहती माअहोंअ विसमेहें होय. तो तियांआं विसमेहें रोय, आन तें तियाआ माहें बोणे आन देव सोताहा तियांआं विसमेहें रोत कोइत तियांआं देव बोणे.✝ 4 तो तियांआं डोआमेर्‍येए आक्खे रोज्ये नुसीत टाके; आन तिहींइं फासाड़ी ने मोत रोय, ने रोड़ीइलोअ, ने विखु, आन ने दुख, काहाके जुनी गोठी निहींत गोयीही."

5 ताहां राजगादीपोअ बोहनारे कोयो, "पाला, आंय आक्खो नोवो कोअहो." फाशोअ तिये कोयो, "ए गोठी लेखीत ले, काहाके ए खोरी आन सत्य होय." 6 तिये फाशोअ माहूं कोयो, "काम पुरो ओत गोयो! अल्फा आन ओमेगा, सुरुवात आन सेवट आंय होंव. आंय तिहील्याहा जिवनोअ पाअयोंअ उकलामेहें रोत फुकटोम पाईं पिवाड़ीहीं. 7 जों जिके तोंज यी आखी वस्तुउ वारीस रोय; आंय तियाआ देव बोणिहीं आन तों माआं पोर्‍यो बोणे. 8 पोन बिकर्‍ये, आन विश्वास ने कोअनारे, खाराब कामे कोअनारे, खुन कोअनारे, सिनालो कोअनारे, मोतरीइनारे, मुर्तीइ पुंजन कोअनारे आन आखे ठोग यांआं वाटू तिया दोर्‍यामेहें जोड़े: ओं दुसरो मोत होय."

9 जे हांत देवदुत हांत वाटका लेत कोइत ओता, जिहींमेहें सेलवार्‍यीइ हांत पिड़ा पोइत ओती, तियांमेहें रोत एके जोएं माआं जागे आवीत कोइत कोयो, "एहें आव, आंय ताहूं वोड़ली, मेडाआ लाडी देखाड़ीहीं." 10 ताहां आंय आत्मावाअहीं पोआइत गोयू, आन देवदुत माहूं एका जाअखीलाहा वोडा आन उसा डोगोपोअ लेत गोयू. तिये माहूं येरुसालेम सोको होयर होरगाम देवोअ जागे रोत निसे उतरीइत्लाहा देखाड़्यो.✝ 11 तों होयर देवोअ महिमा वाअहीं हिंगरात ओतो; आन तियाआ उजालो मोगला डोणोअ आन समकीइनारा डोणोअ होस समकीइतोतो. 12 तियाआ मेरेमेरे एक वोडी आन उसी पितड़ाआ वाड़ ओती, जियीमेहें बारा गेट ओता आन हारेक गेटोपोअ एकेक देवदुत ओता; आन तियां गेटोपोअ इस्राएलोअ बारा कुलोअ नावे लेखल्ये ओते. 13 उक्तामाअहें तिन बाएं; आन पालामाअहें तिन बाएं; देहामाअहें तीन बाएं आन बुट्टामाअहें तिन बाएं ओते.✝ 14 होयरोअ पितड़ाआ वाड़ बारा डोणोअ पायापोअ उबी ओती, आन तियां डोणोपोअ मेडाआ बारा प्रेशितोंअ नावे लेख्येते. 15 जो माअरी गोठी कोअतुतो, तिया देवदुतोपोअ होयर, तियाआ गेटोअ आन तियाआ पितड़ाआ आन वाड़ीही मापीइलोअ काजे एक होनाआं बुओं ओतो. 16 तों होयर शार खुण्‍यो ओतो, तों नांबोन पोलो हारकोज ओतो; तिये देवदुते बुआं वाअहीं होयर माप्यो, ताहां तों बेन हाजार शार होव किलो मिटर निहींयो: आन तों नांबोन पोलो आन उसो हारकोज ओतो. 17 तिये देवदुते तिया होयरोअ मेरेमेरे पितड़ाआ वाड़ीइ माप लेदो, ताहां तों माअहुंउं मापोअ देवदुते वापर कोअयू, तिया मापोअ पुरमाणे एक होवेन शोवरेशाड़ीस आथ उसो निहींयो. 18 तियाआ पितड़ाआ वाड़ सोमक्या डोणोअ बोण्यीते, आन तों होयर पिवर होनाआ ओतो, जों हाजा बी खासोअ होस ओतो. 19 तिया होयरोअ पितड़ाआ पाया राज्या राज्यामेहें मोगला डोणोवाअहीं मोडाड़ल्या ओता. पेल्लूउ यास्फेए ओतू, बिहीरु निलमणीइ, तिसरु लालड़ी, शौथू मरकत, 20 पासवू गोमेद, साहावू मोणक्याआ, हांतवू पिवला खासोअ मणक्याआ, आंठवू पेरोज, नोववू पुश्कराज, दाहवू लहसनीइ, आकरावू धुम्रकांतोअ आन बारावू याकोतोअ. 21 बारा बाएं बारा मोतीइ बोण्येते; हारेक बाआ एकेक मोतीइ बोण्योतो, आन होयरोअ सड़क हाजा खासोअ होस पिवर होनाआ ओती.

22 माहूं तिया होयरोमेहें एक बी मंदिर नाहां देखाअयो, काहाके आखाम रोत वोडु सेक्तीमान प्रभु देव आन मेडू तियाआ मंदिर होय. 23 तिया होयरोहो दिहोअ आन सांदोअ उजालाअ गरज कायनाहां, काहाके देवोअ महिमा तियाआ उजालो आन मेडू तियाआ दिवू होय. 24 दुन्यां तियाआ उजालामेहें साले; आन धरतीइ राजहां तियामेहें मालधन लेतावे. 25 तिया होयरोअ बाएं दिहेए वेले केदिहीं बोंद ने ओवे; आन तिहीं केदिहीं रात ने पोड़े.✝ 26 आन दुन्याआं माअहें महिमा आन मालधन तियामेहें लेतावे. 27 पोन तिया होयरोमेहें ने कोड्लीज एठी वस्तु फोहीत सेकनारी आन ने खाराब कामे कोअनारो आन ठोगनारो फोहीत सेकनारो. पोन तेंज फोहीत सेकनारे, जियांआं नावे जिवनोअ पुस्तकोमेहें लेखाअयेहे.