Daniel 6

दानियेल सिहांआ दोराम

1 दारा राजाहा ओं हाजो गोम्यो के तियाआ राज्यापोअ एक होवेन विही एहेलाहा आधिकारी ठरव्या, जे पुरा राज्यापोअ आधिकार मिके. 2 आन तियांपोअ तिये तिन आदक्श, जियांमेहें दानियेल बी एक ओतु, तो याअ काजे ठरवाअयु के ते तियां आधिकार्‍योअ इसाब मिक्या कोए, आन एहें कोइत राजाअ किज नुकसान ने ओवुहूं जोवे. 3 जेहेलाम ओं पाल्यो के दानियेलोमेहें हाजाम हाजी आत्मा रोहे, ताहां तियाहा तियां मुख्याआ, आन आधिकार्‍योअ रोत वादार मानपान जोड़्यू; एतोज नाहां पोन पुरो राज्य तियाहा होपी देअलोअ राजाआ मोन ओतो. 4 ताहराअ आदक्श आन आधिकारी राजकार्याआ बाप्तिमेहें दानियेलोअ विरुद्दाम गुना होदा वोल्या; पोन तो इमानदार ओतु, आन तियाआ कामोम एखु सुक नेताहां गुनू ने जोड़्यू, आन तो एहेलाहा किज गुनाम नेताहां पापोम ने सापड़ीत सेकू. 5 ताहराअ ते माटी कोना वोल्या, "आपू या दानियेलोअ देवोअ कायदाहा सोड़ीत, बिहीरी कोड्लीज बाप्तिमेहें तियाआ विरुद्दाम गुनू ने सापड़ावीत सेकनारा."

6 ताहराआ ते आदक्श आन आधिकारी राजाअ जागे उतवाल आवयान तियाहा कोयो, "दारा राजा, हादाफल जिवतु रोअहूं जोवे! 7 राज्याआ आखा मुख्या, पुडारी, आधिकारी, न्यायी, राज्यपालहों यां आखाआज गोठी ओवीही, के राजा एहेलुहू आदेश आपे आन एहेलुहू कड़क आदेश काडुहूं जोवे, के तिन दिही जाआं जों कोडो, राजा, ताहूं सोड़ीत बिहीरा एखा माहुंहूं नेताहां देवताहा विनंती कोए, ताहां तो सिहांआ दोराम टाकी देवाअहूं जोवे. 8 तिहींइं काजे राजा, ओमे एहेलुहू आदेश आप, आन या पत्रापोअ सही कोअ, जिहींवाअहीं ए गोठ मादी आन पारसीइ कायदाआ होस ने बोदलीत सेकाय आन ने रद्द बी कोइत सेकाय." 9 ताहरुउ दारा राजे तिया आदेशपत्रापोअ सही कोइ देदी. 10 जेहेलाम दानियेलोहो मुंदू गोयु के तिया आदेशपत्रापोअ सही ओत गोयीही, ताहां तो तियाआ कोअमेहें गोयु, जियाआ उपर्‍यीइ खुलीइ खिड़की येरुसालेमोअहें उगड़ीत रोतीते, आन तियाआ सवायीइ पुरमाणे जेहेलुहू तो दिहोम तिन वारी तियाआ देवोअ सामने मांड्या पोड़ीत प्रार्थना आन धन्यवाद कोअतुतो, तेहेंज कोइत तेहेलाम बी कोअतु रोयु.

11 ताहराअ ते माटी एक मोन ओत कोइत दानियेलोहो तियाआ देवोअ सामने विनंती कोअत्लाहा आन रोड़ी-रोड़ीइ प्रार्थना कोअत्लाहा देख्यू. 12 ताहराअ ते राजाअ जागे जात कोइत, तियाआ आदेशोअ बाप्तिम तियाहा कोना वोल्या, "राजा, केहें तुमे एहेलाहा आदेशपत्रापोअ सही नाहां कोअयी के, तिस दिही जाआं जों कोडो ताहूं सोड़ीत, बिहीरा एखा माहुंउं नेताहां देवताहा विनंती कोए. तियाहा सिहांवागोअ दोरामेहें टाकी देवाय?"

राजे उत्तर आप्यो, "होव, मादी आन पारसीइ ने बोदलाअनारा कायदाआ पुरमाणे ए गोठ पाक्की होय."

13 ताहां राजाहा तियां कोयो, "यहुदी गुलामोमेहें रोते जो दानियेल होय, ए राजा, तिये ते ताअहें दिहानुज नाहां देदो आन नाहां तुमे सही कोअल्या आदेशपत्राअहें दिहान देतू; तो दिहोम तिन वारी तियाआ देवोहो विनंती कोअया कोअहे."

14 ए गोठ उनाइत कोइत, राजा जाअखीलुहू नाराज ओवू, आन दानियेलोहो वासाड़ीइलोअ वाट होदू वोल्यू; आन दिही बुडू ताअहूं जाआं तियाहा वासाड़ीइलोअ कोशित कोअतु रोयु. 15 ताहराअ ते माटी राजाअ जागे उतवाल्या आवीत कोइत तियाहा कोताहा, "राजा, ओं जाइंत ले, के मादी आन पारसीमेहें ओ कायदू होय के जों जों ने कोइलोअ नियम नेताहां जो जो आदेश राजा ठरवे, तो नाहां बोदलाइत सेकतू."

16 ताहरुउ राजे आदेश आप्यू, आन दानियेलोहो लेतावीत कोइत सिहांआ दोराम टाकी देदू. तेहेलाम राजे दानिएलोहो कोयो, "ताआ देव, जियाआ तु कायम भक्ती कोअहे, तोज ताहूं वासाड़े!" 17 ताहरुउ एक डोण लेतावीत कोइत तिया दोरापोअ मिकी देदू, आन दानियेलोअ बाप्तिमेहें किज ने बोदलाअहूं जोवे काजे राजे तियापोअ तियाआ मुंदीवाअहीं आन तियाआ पुडाऱ्योअ मुंदीवाअहीं सिक्कू लागाड़ी देदू. 18 ताहरुउ राजा तियाआ राजवाड़ामेहें जातु रोयु, आन तेदिहीं राती फुकल्युज पोड़ीत रोयु; आन तियाआ जागे सुखसांतीइ किज वस्तु ने पोताड़्यी, आन तियाहा निंद बी ने आयी.

19 वेगीइ हुस्ताज वाआ राजा उठ्यू आन सिहांवागोअ दोराअहें तावणी कोइत गुगद्यू. 20 जाहां राजा दोराआ आहने आयू, ताहां विखावालाआ होस आवाजोम आअड़ू वोल्यु, आन दानिएलोहो कोयो, "दानियेल, ए जिवता देवोअ सेवक! केहें ताआ देव, जियाआ तु कायम भक्ती कोअहे, तिये ताहूं सिंहावागो रोत वासाड़्यू के?"

21 ताहरुउ दानियेल राजाहा कोयो, "राजा, तु हादाफल जिवतु रोअहूं जोवे! 22 माआं देवे तियाआ दुत मोकलीत कोइत यां सिहांवागोअ जोड़बे एहेलेहे बोंद कोई देदे के तियां माआ किज नुकसान ने कोअयो; याआ अर्थ ओं होय के आंय तियांआं सामने निर्दुस सापड़्यू; आन राजा, ताआ सामने बी मी किज सुक नाहां कोअयी."

23 ताहरुउ राजा, जाअखीलुहू खुस ओत कोइत, दानियेलोहो दोराम रोत काडीइलाअ आदेश आप्यु. ताहरुउ दानिएलोहो दोराम रोत बारथे काड्यू, आन तियापोअ वाहीं दुखाइलोअ डाग ने सापड़्यु, काहाके तो तियाआ देवोपोअ विश्वास मिकतुतो. 24 ताहरुउ जियां माट्यों दानियेलोअ बाप्तिम दोश लागाड़्युतो, तियांआं बाप्तिम राजे आदेश आप्यू, ताहां तियांहांन तियांआं बोईंन-पोर्‍ये नेहें लेतावीत कोइत सिहांवागोअ दोरसाम टाकी देदे; आन तियांहां ते सिंहांवाग दोराआ टेकोपोअ उसाअ-उसेज रोत सेलवीत आडेन-हाडे सावीत खात गोया.

25 ताहरुउ दारा राजा पुरी धरतीइ रोनारा देस-देसोअ, राज्या राज्याआ आक्खा माअहुंहूं, आन जुदी जुदी बाशा गोगनाराआ जागे ओं लेखीत मोकल्यो के:

"तुमा आखाआ हाजोज ओत जाअहूं जोवे! 26 आंय ओ आदेश आपोहो, के जिहीं जिहीं माआं राज्याआ आधिकार होय, तिहींइं माअहें दानियेलोअ देवोअ सामने बिते-बिते आन कापते-कापते रोअहूं जोवे.

"काहाके तो जिवतु देव होय,

आन हादाजलम रोनारु देव तोज होय;

तियाआ राज्य ने आरवाअनारो,

आन तियाआ सालती कायम मजबुत रोय.

27 जिये दानियेलोहो सिंहांप रोत वासाड़्युहू,

तोज वासाड़नारु आन सोड़वीइनारु होय;

आन होरगाम आन धरतीपोअ निशाणी

आन समत्कार देखाड़नारु होय."

28 एहें कोइत दानियेल, दारा आन कोरेश, पारसी, बेनु राज्याआ दिहोमेहें सुख-शांती वाअहीं रोयु.