1 तुमाआ पोशा हाजी जागे लागाड़ा, ताहां सेलवाआ थोड़ाक दिहोमेहें तियाआ फायदू तुमुहूं जोड़े. 2 तु हांत कि पोन आंठ जोओंहों वाटीत आप, काहाके ताहूं नाहां मुंदू धरतीपोअ कि आफत आवनारी होय.

3 जर वाद्लामेहें पाईं ओय, ताहां वोरहात पोड़नारुज. साड़ जर देहामाआ वोग नेत पालामाआ वोग पोड़्यो, ताहां तों जिहीं पोड़े तिहींज रोनारो. 4 जर तुमू वाराहा पाल्या कोअहा, ताहां बियारु ओइत ने सेकहा; जर तुमू वाद्लाहा पालते रोये ताहां केदिहीं वाडीत ने सेकहा. 5 वारो केहें रोत लागेहे ओं तुमुहूं नाहां जाआंतो. आन याह्हीइ पोटामेहें पोऱ्यो केहें कोइत वोडो ओवेहे तों बी तुमुहूं नाहां मुंदू, तेहेंज कोइत जिये आखो बोणायोहो तिया देवोअ कामोहों तुमू नाहां जाईंत सेकते. 6 तियाहा कोत वेगऱ्योअ ओइलोअ सालु कोइ द्या आन हांजे वेले जाआं मा रुकाअहा; काहाके काअली गोठीम तुमुहूं फायदू जोड़े तों ने कोत सेकाय, केहेंनेत याम नेत फोलाम, नेताहां बेनुमेहें फायदू ओत सेकेहे.

7 उजालो हाजो होय, आन दिहोअ उजालो डोआहा हाजो गोमेहे. 8 जर माहुंउं जाअखा दिही जिवतो रोयो, ताहां तों तियां आखा दिहोम खुस रोअहूं जोवे; काहाके आंदाराआ दिही बी जाअखा रोनाराहा ओं बी तियाहा ओर मिकुहूं पोड़े. जों किबी ओवेहे तों आखो वायाज होय.

9 ए जुवान, ताआ जुवानीमेहें मोज्या कोअ, आन ताआ जुवानीइ दिहोमेहें खुस रो; आन ताआ मोनोहो पोटे तेहें कोइत साल आन देखाय तिवोल जा; पोन यीं आखी गोठीइ बाप्तिमेहें देव ताआ इसाब लेनारु होय ओं तु ओर मिक.

10 ताआ मोनोमेहें रोत नाराजी काडीत टाक, डिलोहो तारास मा ओवुहूं देही; काहाके कोवली वय आन जुवानी बेनु वाया होय.