1 यीं आखी गोठीइ बाप्तिम उंडे रोत विसार कोअयू, ताहां माहूं जाआंयो के धर्मी आन समजदार माहें आन तियांआं कामे आन तियांआं मेर आन तियांआं सीस देवोअ आथोम होये. आगाड़ी की ओवनारो होय तों कोडाहा नाहां जाआंतो, के तियाहा की आथ लागनारो होये. 2 आखी गोठी आखाआ कोअते हारकीज होय, धर्मी ओय नेत पापी, सोको ओय नेत एठो, गाराहा कोअनारे आन ने कोअनारे, आखाआ दशा एक हारकी रोहे. जेहेलीही हाजा माअहोंअ दशा, तेहेलीज पापीइ दशा; जेहेलीही शप्पत खानाराआ दशा, तेहेलीज जों शप्पत खाअहूं बिहे तियाआ दशा. 3 जों किबी धरतीपोअ ओवेहे यामेहें ए एक खाराब गोठ होय के आखा माअहोंअ एकुज दशा ओवेहे; आन माहुंउं मोनोमेहें खाराब गोठी पोआत रोतीही, आन जाअहूं जाआं तें जिवते रोतेहे ताअहूं जाआं तियांआं मोनोमेहें फोगाय रोहे, आन तिहींइं फासाड़ी तें मोल्याहां जात मिलतेहे. 4 जाअहूं जांआं माहुंउं जिवतो रोहे, तियाहा आशा होय, काहाके हुंणो मोअल्या सिहां रोत हाजो होय. 5 काहाके जें जिवते होय, तें जांअतेहे के तियांहां एक दिही मोइलाअ होय, पोन जे मोइत गोयेहे, ते कि जांअतेहे? तियांहां बक्शीस मिल्योहो. तियांआं ओर बी नाहां ओवती. 6 तियांआं मेर आन तियांआं सीस आन तियांआं आद्राय आखो तियांअरीज आरवात गोयोहो, ओमे यी धरतीपोअ जों बी ओवेहे तियामेहें तियांआं भाग जोलमजुग्योअ किज ने रोनारो.

7 ताआ वाटे जातु रो, ताआ रोटू खुसी वाअहीं खाया कोअ, आन मोनोमेहें सुख मानित कोइत दाराक्शाआ होरु पिया कोअ; काहाके देव ताआ कामों वाअहीं खुस होय. 8 ताआ आंगड़े हादाफल उजले रोअहूं जोवे, तुमाआ मुन्कापोअ हादाफल तेल लागाड़ल्यो रोअहुं जोवे.

9 देव धरतीपोअ या वाया जिवनोअ जेताहा बी दिही आप्याहा, तियामेहें ताआ मेराली लाडीइरी जिवन जिवीइलोअ खुसी कोआ, काहाके जिवनोमेहें ओंज तुमाआं भाग होय. जे मेहेंनत तुमू धरतीपोअ कोअतेहे तियामेहें ओज तुमाआं भाग होय. 10 तुमांआं आथोमेहें जो काम जोड़े तियाहा पुरी सेक्तीइ वाअहीं कोअजा, काहाके पातालोमेहें जिहीं तुमू तुमांआं मोतोअ फासाड़ी जाहा तिहीं किज काम ने, कदर ने, हुशारी ने, के बुद्दी नाहां.

11 फाशोअ आंय यी धरतीपोअ पाल्यो, के जोरे गुगदीइनारो नाहां जिकतो आन लड़ायीमेहें बाहदीर नाहां जिकतू. हुशार माहुंहूं खाअहूं रोटू नाहां जोड़तू, आन समजदारोहो मालमिलकत नाहां मिलती आन ग्यानीही मेरवानी नाहां जोड़ती. ओं आखो वेलोअ आथोम होय. 12 काहाके माहुंउं तियाआ वेल नाहां जांअतो. जेहेलोहो मासे अड़सनीम टाकनारी जालेमेहें आन सिड़े फांदामेहें फोसीत जातेहे, तेहेंज कोइत माहुंउं दुखोअ जालेमेहें फोसीत जाहे आन ए जाल कोत कोइत नाहां आवती.

13 आंय धरतीपोअ बुद्दीइ एक उदाहरण बी पाल्यो. ओं माहूं जाअखो खास हासवाअयो. 14 एक हानो एवडोहो होयर ओतो, जियामेहें थोड़ेज माअहें रोतेते, आन एक दिही एक वोडु राजा ताड़ बांदीत कोइत केंडवारीत लेदो. 15 पोन तियामेहें एक गरीब बुद्दीमान माटी ओतु, आन तिये तिया होयरोहो तियाआ बुद्दी वाअहीं वासाड़्यो. तेबी तिया गरब्योहो आक्खे माअहें विहीरात गोये. 16 ताहां आंय कोयो, "जर गोरब्योअ बुद्दी कमी गोणाअती ओय, आन तियाआ गोठ कोडोज ने उनाअतोय तेबी सेक्तीइ रोत बुद्दी वादार हाजी होय." 17 फोगाआ विसमेहें राजाआ आअड़ीत कोइत गोगीइलो रोत जी एखलामेहें बुद्दीमानोअ गोठी उनाइत लेअलोअ केतोहो हाजो होय. 18 लड़ायीइ आथ्यारो रोत बुद्दी वादार हाजी होय, पोन एक पापी माहुंउं जाअखीली हाजी गोठीही आरवी देहे.