Ester 4

मोर्देखाय एस्तेरेपोअ मदत मागत्लू

1 जेहेलाम मोर्देखायोहो मुंदू पोड़्यु, ताहां तिये सोताआ आंगड़े फाड़्ये, पेंडीइ पोतो फांगीत मुन्कापोअ खाआं टाक्यून ताहरुउ होयरोअ विसमेहें जात कोइत वोडी हादेज रेकू वोल्यू; 2 आन तो राजवाड़ाम बाओ जागे पोत्यु, पोन पोते फांगीत राजवाड़ाआ बाअणाआ मायते जाअलोअ कोडाहाज परवानगी ने ओती. 3 एकेका प्रान्तामेहें, जिहीं जिहीं राजाआ आदेश आन नियम पोत्या, तिहीं तिहीं यहुदी पोता फांगीत आन उपास कोइत आन रोड़े वोल्ये; आन वारुज जोएं पोते फांगीत खाओंम बोहीत रोये.

4 एस्तेर राणीइ सेविका आन सेवक*4:4 सेवक बायल्ये तियीइ जागे आवित तियीही कोत देदो, ताहां राणी जास्ती नाराज ओवी; तियी मोर्देखायोअ काजे पोते काडीत आंगड़े पोवे तेहें काजे लेत मोकल्ये, तियांहां तिये ने तोअये. 5 ताहां एस्तेर राजाआ सेवकोमेहें रोत हताकोहो जियाहा राजा तियाआ जागे रोअलाअ कोत ठरव्युतो, तियाहा हादाड़ीत कोइत कोत मोकल्यो के, ए गोठ केहें काय होय आन काहा काजे तों मोर्देखायोअ सोवकिशी कोइत सेके. 6 ताहां हताक राजवाड़ाआ तिया बाओअ सामने होयरोअ जागे सोवकड़ीपोअ मोर्देखायोअ जागे गोयु. 7 मोर्देखाये तियाअरी कि कि ओवो तों तियाहा आखो कोत आपी देदो, आन हामाने यहुदी माअहोंहों आरवीइलोअ परवानगी जोड़े तेहें काजे राजवाड़ामेहें केताहा पोशा आप्याहा तों बी आखो बोराबर कोत देदो. 8 फाशोअ यहुदी माअहोंहों आरवीइलाअ जो आदेश शूशन होयरोमेहें आप्युतो, तियाआ एक नकल बी तिये हताकोअ आथे, एस्तेरोहो देखाड़े तेहें आप्यी, आन ए आखी गोठ ते मायते राजाआ जागे जात कोइत तियीइ माअहोंअ कोअता रावणी आन विनंती कोए तेहें वारुहूं कोत मोकल्यो. 9 ताहां हताक एस्तेरोअ जागे जात कोइत मोर्देखायोअ ए गोठ कोत आपी देदी. 10 ताहां एस्तेरे मोर्देखायोअ जागे हताकोहो एहें कोत मोकल्यो के, 11 "राजाआ आखा आधिकार्‍योहों, आन राजाआ आखा प्रांताआ माअहोंहों बी मुंदू होय, एखु माटी नेत बोईं बिगर हाद्येज राजाआ मायतेए खोलीइ गोयो तियाहा माईंत टाकीइलोअ आदेश होय; जर राजा होनाआ राजडांडू जियाआ वोल आगाड़ी कोए तोंज वासाय, पोन माहूं तोम आज कोइत तिस दिही ओत गोया राजाआ जागे नाहां हाद्यी जी."

12 एस्तेरोअ ए गोठ मोर्देखायोहो कोत देखाड़्यी. 13 ताहां मोर्देखाय एस्तेरोअ जागे ओं कोत मोकल्यो, "तु मोनोमेहें ओ विसार मा कोअहीं, के आंय राजवाड़ामेहें रोहो कोत आखा यहुदीमेहें रोत वासात जाहीं. 14 काहाके तु जर यी वेले तु ठावकी रोही, ताहां केहेंन केहें कोइत यहुदी माअहें वासात जाय, पोन तु आन ताआ आब्हाआ घराणो आरवात जाय. केहें नेत ताहूं यी वेलेए काजेज ताआ राणी कोत निवड़ ओवी ओय?"

15 ताहां एस्तेर मोर्देखायोअ जागे ओं कोत मोकल्यो, 16 "तु जात कोइत शूशनोअ आखा यहुदीही टोलु वाल, आन तुमू आखे मिलित कोइत माआ कोअते उपास कोआ, तिन दिहीन तिन रात किज मा खाहान किज मा पिहा. आंय बी माआ सेविकाअरी एहेंज कोइत उपास तोअहीं; आन एहेलीज दशामेहें आंय नियमोअ विरुद्द राजाआ जागे मायते जाहीं; जर माए ताहरोअ माए."

17 ताहां मोर्देखाय जातु रोयू आन एस्तेरोअ आदेशोअ पुरमाणे तिये कोअयो.