1 विश्वासी कोत एकमेकाअरी मेर कोइत रोवा. 2 पावणाय तोइलोअ विहिराअहा मा. काहाके यावाअहीं थोड़हा जोओं ओजाणेमेहें देवदुतोंअ पावणाय कोअयिही. 3 जें जेलेम होय तियांअरी तुमू सोताहा जेलेम होय एहलोहो होमजीत तियांआं कालजी ल्या. तुमाआं बी डिल होय, ओं इतवीत जें दुख वेठतेहे तियांआं बी कालजी ल्या.

4 वेहवाल आखामेहें मानपानोअ गोठ कोत मानुहूं जोवे, आन आथरुउ सोको मिकुहूं जोवे.*13:4 बेनु एकमेकाअरी इमानदार जोवे काहाके जें सिनालो कोअतेहे, आन बिहीराआ बोईंहीं राखतेहें, तियांआं न्यायनिवाड़ु देव कोए.

5 तुमाआं सोभाव पोशाअ लालसवालू ने जोवे, आन जों तुमापोअ होय तियाजमेहें खुस रोवा; काहाके तिये सोताहा कोयोहो के, "आंय ताहूं केदिहीं ने सोड़ो, आन ने केदिहीं टाको." 6 तियाहा काजे आपू मानमुखाऱ्येज कोत सेकतेहे,

"माहूं मदत कोअनारु माआं देव होय,

तियाहा काजे आंय नाहां बिनारु;

मोनवी माआं कि कोइत सेकेहे?"

7 जियां तुमुहूं देवोअ वसन सिकाड़्यो तियां सेवकोअ ओर मिका; आन तियांआं हाजा गुण*13:7 गुण सोभाव देखीत कोइत तियांआं होऱ्युउ विश्वास लेत साला. 8 ईसु ख्रिस्त काल, आज आन पिढ़ीन पिढ़ी एकसारकुज होय.✝13:8 भजन 90:2; प्रगटी 1:8; यश 41:4 9 जुदी जुदी बातीइ शिक्शणो वाअहीं भटकीत मा जाहा, काहाके देवोअ मेरवानीम मोन वातड़ो मिकीइलो हाजो होय, आन खाअलोअ वस्तुउ नियमोअ पालनी वाअहीं कोडाहा बी लाभ नाहां ओवू.

10 जिया देवान्यापोऱ्यीइ वस्तु खाअलोअ आधिकार मंडपोम सेवा कोअनाराहां जाआं कायनाहां, एहलोहो एक देवान्यो आपाअ जागे होय. 11 काहाके जियां जनवारोअ रक्त मुख्य पुंजारु जाअखा सोका जागाम पापोअ बोदले गाराहा लेत जात्लु, तियां जनवारोअ तोड़ पोड़ावाआ बारथे पेटाड़त्ले. 12 तिहींज वाअहीं, ईसु बी सोताआ रक्ता वाअहीं माअहुंहूं पवित्र कोइलोअ काजेहे गांव-हींवोंअ बारथे दुख वेठ्यो. 13 तियाहा काजे आवा, तियाआ निंदा सोतापोअ लेत कोइत गांव-हींवोंअ बारथे तियाआ जागे साला.✝13:13 लुक 6:22 14 काहाके इंहीं आपाआ कोड्लोज टिकनारो होयर कायनाहां, आपू ताम आवनारा होयरोअ ताकेम होय. 15 तियाहा कोत आपू स्तुतीरुप गाराहा, मोन्ज्ये तियाआ नाव कबुल कोअनारा ओठोअ फल ख्रिस्ता वाअहीं देवोहो कायम आप्या कोइलो. 16 बिहीराआ काजे हाजो कोइलो आन दानधर्म कोइलोअ मा विहीराअहा; काहाके एहलोहो गाराहा देवोहो गोमत्लो.

17 तुमाआं सेवकोंअ गोठी माना आन ते जेहें कोय तेहें कोआ. काहाके तुमुहूं सांबालीलोअ जाबाबदारी तियांपोअ होय, आन तियांहां देवोहो इसाब आपुहूं पोड़नारु होय. तिहीं वाअहीं तियांआं गोठी माना मोन्ज्ये ते नाराज ओत नाहां खुसी वाअहीं तियांआं काम कोइत सेके.

18 आमाआं काजे प्रार्थना कोअते रोवा, काहाके आमुहूं भरिवसू होय के आमाआं बुद्दी सोकी होय: आन आखी गोठीमेहें आमू हाजीहुतेहे सालता रोंव एहेलिही आमाआं इश्शा होय. 19 आंय तुमुहूं विनंती कोअहो के देव माहूं तुमाआं जागे मामार वापिस मोकलुहूं जोवे कोत प्रार्थना कोइलो कोअजा.

20 ओमे शांतीवालू देव आपाआ प्रभु ईसुहू ,जो मेडाआं महान राखवाली होय, हादाजल्म्यीइं शप्पतेए रक्ताआ गुणोवाअहीं मोल्याम रोत जिवाड़ीत लेतायू. 21 तियाआ इश्शा पुरी कोइलोअ काजे तुमुहूं हाजी गोठी वाअहीं पाक्के कोअहूं जोवे आन ईसु ख्रिस्ता वाअहीं तियाहा पसन आवनारे कामे तो आपामेहें कोअहूं जोवे. आखी महिमा हादाजलम तियाहाज जोड़ुहूं जोवे. आमेन!

22 पाव्हीइला, ओ जो हिकाअहूं जोगुहू संदेश आंय थोड़ाज शब्दामेहें लेख्युहू, तो तुमू धिर तोइत उनाआ एहलिही आंय तुमुहूं विनंती कोअहो. 23 तुमू जाइंत ल्या के, आपाआ पाही तिमथ्या जेलेम रोत सुटीत गोयुहू आन जर तो उतवाल आयु, ताहां आंय तियाहा लेतुज तुमुहूं मिलू आविहीं.

24 आखा मंडड़ीइ सेवकोहों आन आखा विश्वासी पाव्हीइलाहां सलाम कोवा, इटलीवाले तुमुहूं सलाम कोतेहे.

25 देवोअ मेरवानी तुमा आखापोअ रोअहूं जोवे. आमेन.