1 तिसरा दिहोमेहें गालीलोअ काना होयरोमेहें कोडाआ तेबी वेहवाल ओतो, आन ईसुउ आयही बी तिहीं ओती. 2 ईसु आन तियाआ सेलां बी तिया वेहेवालोम आयाते. 3 जेहेलाम दाराक्शाआ रोह सेलाइत गोयू, ताहां ईसुउ आयही तियाहा कोयो, "तियां पोअ दाराक्शाआ रोह सेलाइत गोयू."

4 ईसु तियीही कोयो, "ए बाय, ओं तु माहूं काहा कोतापेहे? माआं वेल ओमे नाहांजी आयी."

5 तियाआ आयही, सेवकोहों कोयो, "ओ जों कोय, तोज तुमू कोअजा."

6 तिहीं पाईं पोइलाआ डोणोअ सोव कुंडे मिकीत रोयेते, एं या उद्देशोवाअहीं मेक्येते के, यहुदी कायदाअ पुरमाणे सोकायीइ काजे कामोमेहें लागाड़ीत सेके. हारेक कुंडामेहें एहेलोहो 80 ते 120 लिटर जाआं पाईं होमाअतोतो. 7 ईसु सेवकोहों कोयो, "कुंडामेहें पाईं पोई द्या." आन तियां सेवकहों कुंडाहां सिकार पोई देदे. 8 फाशोअ तिये तियांहां कोयो, "ओमे जारिक पाईं काडा आन रांदीणक्याआ मुख्याआ जागे लेत जावा." आन ते तियाहा लेत गोया. 9 जेहेलाम रांदीणक्याआ मुख्ये तों पाईं साकीत पाल्यो, जों दाराक्शाआ रोह बोणीत गोयोतो आन ने मुंदू ओतू के तो का रोत आयुहू, पोन जियां सेवकों पाईं काड्योतो, तियांहां मुंदू ओतू, ताहरुउ रांदीणक्याआ मुख्ये वोरोहो हाद्‍यू, 10 आन तियाहा कोयो, "हारेक माहुंउं पेल हाजू दाराक्शाआ रोह वाटेहे, आन जेहेलामेहें माहें पित कोइते साकीत जातेहे, तेहेलामेहें मध्याममेर्‍युउ दाराक्शाआ रोह आपतेहे; पोन तुमे तोम हाजू दाराक्शाआ रोह ओमे जाआं वासाड़ीत मिक्युहू."

11 ईसु गालीलोअ काना होयरोमेहें तियाआ ओ पेल्लूउ समत्कार देखाड़ीत कोइत तियाआ महिमा देखाड़्यी, आन तियाआ सेलहां तियापोअ विश्वास कोअयू.

12 याआ फासाड़ी ईसु आन तियाआ आयहीन, तियाआ पाही आन तियाआ सेला नेहें कफर्णहुमोमेहें गोये; आन तिहीं थोड़ाज दिही रोये.

13 यहुदीया वालाआ वल्हांडण✝2:13 निर्ग 12:1-27 तिवार आहने ओतू, तियाहा काजे ईसु येरुसालेमोमेहें गोयू. 14 तिहीं तो मंदिरोमेहें बोलोद, मेडें आन पेरवाआं वेसनारा आन पोशा बोदलीइनारा वापार्‍योहों तिहीं बोहीत रोल्या देख्या. 15 तियाहा काजे तिये एक दोअड़ाआ सापकू बोणावीत कोइत, आखा मेडाहांन बोलदोहों मंदिरोम रोत काडी देदे, आन पोशाआ बोदली कोअनाराआं पोशा वेरीत टाक्या आन टेबल उलटावी देदा; 16 आन पेरवे वेसनाराहां कोयो, "याहां इंहीं रोत बारथे लेत जावा. माआं आब्हाआ कोओहो बाजार मा बोणावहा." 17 इंहींपोअ तियाआ सेलाहां ओर आयी के वसनोमेहें लेख्योहो, "ताआ कोओअ धुंद माहूं खात जाये."

18 या उत्तरोमेहें यहुदी आधिकार्‍यों ईसुहू कोयो, "तू आमुहूं कोड्लू समत्कार देखाडीत सेकेहे? जियावाअहीं तु जों कोअहे, याआ तू आधिकारी होय, ओ पुरावू ओत सेके."

19 ईसु तियांहां उत्तर आप्यो, "या मंदिरोहो उठ्लावीत पाड़ा, आंय याहा तिन दिहोम फाशोअ बोणावी देहीं."

20 यापोअ यहुदी आधिकार्‍यों कोयो, "या मंदिरोहो बोणावीइलोमेहें शेहेशाड़ीस वोरह्ये लागे, आन तू याहा तिन दिहोमेहें बोणावही?"

21 पोन तिये तियाआ सोताआज शरीररुप मंदिरोअ बाप्तिम कोयोतो. 22 जेहेलाम तो मोल्याम रोत जिवीत उठ्यू, ताहां तियाआ सेलाहां ओर आयी, के ईसु ओं कोयोतो; आन तियां वसनोपोअ आन ईसुउ शब्दापोअ विश्वास कोअयू.

23 वल्हांडणोअ तिवारोअ दिहोमेहें, जेहेलाम ईसु येरुसालेमोमेहें ओतू, ताहां जाअखीलेहे माअहें तियाआ समत्कारोहों पालीत कोइत तियापोअ विश्वास मिक्यू. 24 पोन ईसु सोताहा तियांआं भरिवसे ने रोयू, काहाके तो आखा माहुंहूं जांअतुतो; 25 तियाहा यी गोठीइ गरज कायने के तियाहा कोडो तियां माहुंउं बाप्तिमेहें कोत आपे, काहाके तो तियां माअहोंअ मोनोम की होय तों जांअतुतो.