योहान 6

पास हाजार माअहोंहों ईसु तारीवत्लू

1 यीं गोठीइ फासाड़ी ईसु गालील दोर्‍याअ मोन्ज्ये तिबिरियास दोर्‍याआ तिवोग गोयू. 2 आन एक वोडी गर्दी तियाआ फासाड़ी जानी वोल्यी, काहाके तियां मांदवाड़्ये हुदरीइलाअ तिये कोअल्या समत्कार देख्याते. 3 ताहरुउ ईसु डोगो पोअ सोढीत कोइत तियाआ सेलांअरी बोहीत गोयू. 4 यहुद्याआं वल्हांडणोअ तिवार आहने ओतू. 5 जाहां ईसु तियाआ सोमकीर नजर फेरवीत वोडी गर्दीही तियाअहें आवत्लाहा देख्यी, तेहेलाम फिलीप्पोहो कोयो, "आपू यां माअहोंअ काजे ताराइत खाय एतुहू रोटू का रोत वेसातू लेतावहूं?" 6 तिये ए गोठ फिलीप्पोहो फारकीइलाअ काजे कोयी, काहाके तो सोताहा जांअतुतो के तो कि कोअनारु होये.

7 फिलीप्पे तियाहा उत्तर आप्यो, "बेन होव सांदीइ रुप्याआ*6:7 सांदीइ रुप्या मोन्ज्ये दिनार रोटा वेसाता लेय आन हारेक जोओंहों थोड़ थोड़ा बी आपे, तेबी पुगी ने आवे."

8 तियाआ सेलामेर्‍युउ शिमोन पेत्राआ पाही आंद्रिये तियाहा कोयो, 9 "इंहीं एक पोर्‍यू होये जिया पोअ जवोअ पास रोटा आन बेन मासा होये; पोन एता माअहोंअ काजे ते काहा पुरेमे?"

10 ईसु कोयो, "माअहोंहों बोहाड़ी द्या." तियी जागेहे जाअखीलोह खोड़ ओतो: ताहां आखे माअहें बोहीत गोये; जियांमेहें एका आंदासोवाअहीं माट्योंअ गणती पास हाजार ओती. 11 ताहरुउ ईसु आथोमेहें रोटू लेदू, आन देवोहो धन्यवाद आपीत कोइत तिहीं बोहनारा माअहोंहों वाटी देदू; आन तेहेंज कोइत मासे बी वाटी देदे, आन तियांहां जेते जोवे तेतेहे जोड़्ये. 12 जेहेलाम ते खात कोइत ताराइत गोये, ताहां तिये तियाआ सेलाहां कोयो, "उगरीइल्या कुटका हाटवीत ल्या के किज वाया ने जाअहूं जोवे." 13 ताहराअ तियां हाटव्या, आन पास जवोअ रोटाअ कुटका वाअहीं जे खानारापोअ रोत उगर्‍याते, बारा टोपले पोआये.

14 ताहां जो समत्कार ईसु तियांहां कोइत देखाड़्यू, तियाहा काजे तें माअहें कोने वोल्ये, "जो भविश्यवक्तू दुन्यामेहें आवनारु ओतू तो हादामक्यु ओज होये."