लुक 13

आरामोअ दिही एकी टुंगाल बोईहीं ईसु हुदारत्लू

10 एका आरामोअ दिहोअ दिही ईसु यहुदी आराधनालयो मेहें सिकाड़तुतो. 11 तिहीं एक बोईं ओती जियीही एडार वोर्ह्यों रोत एक कमजोर कोअनारी पुतोअ आत्मा तोइत रोयीते. आन ते टुंगाल ओत गोयीते आन केहें बी कोइत हुदी ने ओवित सेकतीते. 12 जेहेलाम ईसु तियीही देख्यी आन हाद्यी, आन तियीही कोयो, "ए बाय, ताहूं ताआ रोगोम रोत सुटका जोड़्यीही." 13 ताहां तिये तियीइ मुन्कापोअ आथ मेक्यु, आन ते तुरतुज हुदी ओत गोयी आन देवोअ महिमा कोई वोल्‍यी.

14 काहाके आरामोअ दिही ईसु तियीही हुदाऱ्यीते, तियाहा काजे आराधनालयोअ आधिकारी जोराखू उठ्यू आन तियां माहुंहूं कोनु वोल्यू, "सोव दिही होय, तियांज मेहें काम कोअहूं जोवे, आन तियांज दिहोमेहें आवा आन हुदरा, पोन आरामोअ दिहोअ दिही आवित मा हुदराहा."

15 ओं उनाइत कोइत प्रभु उत्तर आप्यो, "आरे वोडार्‍यां, आरामोअ दिहोअ दिही तुमामेहें एखु बोलदोहो नेत गोदड़ाहा खोटाम रोत सोड़ीत कोइत पाईं पिवाड़ नाहां लेत जातो के? 16 ओमे ए अब्राहामोअ बेटिह्ही होये, जियीही सैताने एडार वोरह्ये जाआं बांदीत मेक्यीते, केहें यीही आरामोअ दिही बंधनोम रोत सोड़ीइलोअ सुकीइ होय के?" 17 तियाआ या उत्तरो वाअहीं तियाआ विरोध कोअनारा आखा लाजवाअया, आन आखे माअहें तियाआ वोडे कामें देखीत कोइत खुसीम रोत गोये.