लुक 8

याईरोअ पोर्‍यी आन एक मांदवाड़्यी बाय

40 जाहां ईसु वापिस आयू, ताहां माअहें खुसी वाअहीं मिल्‍ये, काहाके तें आखे माहें तियाआ वाट जोवया कोअतेते. 41 तेताजमेहें याईर नावोअ एक माटी आयू, जो जागर्‍याआ यहुदी आराधनालयोअ आधिकारी ओतू, तो ईसुउ पागे पोड़ीत तियाहा रावणी कोउ वोल्‍यु के माआं कोअ साल, 42 काहाके तियाआ बारा वोरह्योअ एकुज बेटिह्‍ही ओती, आन ते दाबतीज मांदवाड़्यी ओती.

जेहेलाम ईसु जाया कोअतुतो, तेहेलाम तियाआ सारी सोमकीर माअहें जाअखीलीही गर्दी कोअतेते. 43 आन तिहीं एक बारा वोरह्ये रक्त वोहीइलोअ बिमारीवाली एक बाय ओती, जे तियीइ आखी मालमिलकोत डाक्‍टरोअ इलाजोअ कोअते खर्स कोइ देदी, तेबी तियीही कोडोज ने हुदारीत सेक्‍यो. 44 ते ईसुउ फासाडीइ वोलेहे आवित कोइत तियाआ आंगड़ाआ कोरेहे आथ लागाड़्यु, आन तेताजमेहें तियीइ रक्त वोहीइलोअ बोंद ओत गोयो. 45 ताहां ईसु कोयो, "माहूं कोडो आथ लागाड़्यो?"

तेहेलाम आखे नाकार कोए वोल्‍ये ताहां, पेत्र आन तियाआ हात्यों कोयो, "मालिख, ताहूं ए गर्दी सिपड़ेहेन, उपोअ आवित पोडेहे."

46 पोन ईसु कोयो, "कोडे तेबी माहूं आथ लागाड़्युहू, काहाके माआं जिवोमेहें रोत सेक्ती निहींयीही." 47 जाहां तियी बायी देख्‍यो के आंय निकाइत नाहां सेकती, ताहां थरथर कापतीज आयी आन ईसुउ हुंबर पागे पोड़ीत कोइत आखाआ सामने कोत देखाड़्यो के काहा कोत आथ लागाड़्यु आन केहें कोइत ताबुड़ हुदरीत गोयी. 48 ईसु तियीही कोयो, "माआं सोई, तु ताआ विश्वासो वाअहीं हुदर्‍यीही, होकेहे जाती रो."

49 एहें कोताजमेहें मंदिरोअ आधिकार्‍योअहीं कोडो तेबी एक जोओं आवित कोइत कोयो, "ताआ पोर्‍यी जाअखी दाब्तीज् होये: ओमे गुरुहू तारास मा देही."

50 ओं उनाइत कोइत ईसु कोयो, "बिही मा, फक्त विश्वास मिक, मोन्ज्ये ते हुदरीत जाय."

51 कोअमेहें आवित कोइत तिये पेत्र, योहान, याकोब आन पोर्‍यीइ आयहीन-आब्हाआ सिवाय बिहीरा कोडाहाज तियाअरी मांयते ने हाद्ये. 52 आखे तियी पोर्‍यीइ कोअते रोडतेते, पोन ईसु कोयो, "रोडहा मा; ते नाहां मोयी, पोन हुवेहे."

53 तेबी तें मोयीहिजे कोत तियाहा ओहें वोल्‍ये. 54 पोन ईसु तियीइ आथ तोअयु, आन बोंबलीत कोयो, "ए पोर्‍यी, ऊठ!" 55 तेहेलाम तियीइ जिव वोलीत आयू आन ते ताबुड़ उठीत बोठी. ताहां तिये तियीही काविंहीं खायतेहें आपे तेहें कोयो. 56 आन तियीइ आयहीन आब्हू बोगलाइत गोये, पोन ईसु तियांहां वारुहूं कोत देखाड़्यो के ओं जो ओवोहो तो कोडाहाज मा कोहा.