1 ताहरुउ आंय फुसोहो: देवे तियाआ माअहुंहूं टाकी देदे के? जोलोम नाहां! आंय बी ताम इस्राएलवालुज होंव; अब्राहामोअ पारवाड़ आन बिन्यामीनोअ जातीम रोत होय. 2 देवे तियाआ माअहुंहूं नाहां टाक्ये. वसन एलियाआ बाप्तिम कि कोहे तों तुमुहूं मुंदू होय के, जाहां तो इस्राएलोअ विरुद्दाम देवोहो रावणी कोअहे? 3 "प्रभु, ताआ भविश्यवक्ताहा तियां माइत टाक्या, आन ताआ देवान्यो ओदालीत टाक्योहो; आन आंय एतुज वासाअयुहू, आन ते माहूं बी माइलोअ काजे होदते फिरतेहे." 4 ताहां देवे तियाहा कि उत्तर आप्यो? "जे बाल देवताआ सामने टुंगा ने पोड़्या, एहेलाहा हांत हाजार माटी मी निवड़ीत मिक्याहा." 5 एहेंज कोइत यीं वेले बी: मेरवानी वाअहीं निवड़ीइल्ये थोड़ेक माअहें बाकी रोयेहे. 6 जर मेरवानी वाअहीं ओवोहो, ताहरोअ कर्मा वाअहीं नाहां; जर तेहें ने ओय ताहां मेरवानी फाशीइ मेरवानी की कोइत ओवी?

7 ताहां याआ फल की जोड़्यो? इस्राएलवाले जों होदतेते, तों तियांहां ने जोड़्यो; पोन निवड़ीइल्या माहुंहूं तों जोड़्यो, आन बाकी माअहें डांबरात गोये. 8 वसन कोहे, "देवे तियांहां आज परंत वोडी निंदेम टाकी देदेहे, आन तियांहां ने देखे एहेलाहा डोआ आन ने उनाय एहेलाहा कान आप्या." 9 आन दाविद कोहे,

"तियांआं रोटू तियांआं काजे जाल आन फांदू,

आन ठोकात पोड़े आन डोंड जोड़े एहेलोहो ओत जाअहूं जोवे.

10 तियांहां ने देखाय एहेलोहो तियांआं डोआपोअ आंदारो फिरीत वोलुहूं जोवे,

आन सादा तियांआं टुंग तू वालित मिक."

11 ताहां आंय फुसोहो, "इस्राएलवाले उठ्लीत पोड़े तेहें काजे ठोकाअये के?" जोलोम नाहां! पोन तें तियांआं पोडीइलाअ वाअहीं बिगर यहुदी माहुंहूं तारण जोड़्यो, काहाके तियांहां जलन ओवुहूं जोवे. 12 तियाहा काजे जर तियांआं पोड़ीइलो वाईं दुन्याहां धन जोड़्यो आन तें कमी पोड़्ये ताहां बिगर यहुदी माहें पान्गीत गोये, आन जर तियांआं भरती ओवी, ताहां विसार कोआ केतुहू वोडू आशिर्वाद जोड़े!

13 खास कोइत आंय तुमू बिगर यहुदीही ए गोठी कोहो, तेहलुहू आंय बिगर यहुदीइ काजे प्रेशित बी होय, ताहां आंय माआं सेवाआ वोडाय कोअहो. 14 काहाके माआं कुटूंबामेर्‍याआ थोड़ेक जोएं तेंव वासाय कोत तियांहां आंय ओड़बी लेवाड़ोहो. 15 काहाके जेहेलाम तें ओलावी देवाअये तेजाआं कांय देवे दुन्याहां तारण आप्यो, ताहां तियांआं स्विकार ओवे ताहां की ओवे? तों ते मोल्याम रोत जिवीत उठल्याआ बोराबर ओवे!

16 लोटोअ पेल्लू उंडू पवित्र ठर्‍यु ताहां आखु केलवीइल्यु लोट बी पवित्र रोनारु, आन मुल पवित्र ठर्‍य ताहां डाली बी पवित्र रोनारी. 17 पोन जर थोड़ही डाली तोड़ीत टाक्यी, आन तू रानजैतुनोअ होस होय, तेबी ताहूं तियांआं जागापोअ कलम लागाड़्युहू आन तु जैतुनोअ*11:17 जैतुन एकी जातीइ साड़ हाजाम हाजा मुलोअ*11:17 हाजाम हाजा मुलोअ मोन्ज्ये अब्राहामोअ कुटूंबाम भागिदार बोण्युहूं, 18 ताहां डालीपोअ वोडाय मा कोअही; आन जर तू वोडाय कोअही, ताहां जाइंत लेजी के तू थुड़ाहा नाहां सांबालतु, पोन थुड़ो ताहूं सांबालेहे.

19 ताहरुउ तू कोही, "माहूं कलम लागाड़ीइलोअ काजे ते डाली तोड़ाअयी." 20 बोराबर होय, तियां विश्वास ने कोअयू तिहींवाईं टुटीत अलग ओवे, पोन तू विश्वासोवाअहीं टिकीत रोयुहू, तियाहा काजे वोडाय मा कोअही, पोन बित साल. 21 काहाके, देवे होय तियींज डालीही*11:21 डालीही इस्राएलवालाहां वाडीत टाक्यी ताहां ताहूं काहा मिके तो. 22 इंहीं देव केतुहू दयालू आन कड़क सोभावोअ होय पाल; जें पोड़्ये तियांआं बाप्तिम तो कड़क होय, पोन ताआ बाप्तिम दयालू होय; पोन तु जर तिहींम टिकीत ने रोही ताहां तो ताहूं बी सींदित टाकी देय. 23 आन जर यहुदी माहें विश्वास कोअते ताहां ने सींदाअते; काहाके देव तियांहां फाशुउ कलम लागाड़ीत सेकेहे. 24 काहाके जर तू जो सोभावो वाअहीं रानजैतुनोअ होस होय, आन ताहूं वाडीत कोइत सोभावोअ विरुद्द हाजा जैतूनोमेहें कलम लागाड़्युहू, ताहां तें ताम तुऱ्येए तिहींजमेऱ्येए होय, ताहरेए हिद्लाआ जैतुनोम काहा ने कलम कोआय.

25 माआं पाव्हीइला, तुमू सोताहा हुशार ने समजुहूं जोवे; तियाहा काजे आंय तुमुहूं एक दोड़पाअली गोठ कोत देहो के, जाअहूं जाआं बिगर यहुदी माअहोंअ आकड़ू पूरु ने ओत जाय, ताअहूं जाआं इस्राएलोअ एक भाग माहें वातड़ेज रोनारे.✝11:25 यश 59:20-21 26 आन एहेंज कोइत आखो इस्राएल वासाय. तेहलोहो लेख्यो बी होये के,

"वासाड़नारु सियोनोअ वोल रोत आवे,

आन याकोबोअ पारवाड़ी पोअ रोत आखी विणभक्ताय काडीत टाके.

27 आन जाहां आंय तियांआं ओ पाप दुर कोइ देहीं,

ताहां तियांअरी माआं ओंज आथवसन रोये."

28 तियां हाजी बातमी नाकारी देदी तिहीं वाईं तें तुमाआं उस्ती देवोअ दुस्मोन होय, पोन देवोअ निवड़ ओती तिहीं वाईं तियांआं डायहांआं वोजेसे तें देवोअ लाड़के होये. 29 काहाके निवड़ आन आशिर्वादोअ बाप्तिम देव तियाआ विसार नाहां बोदलीइतू. 30 जेहलेहे तुमू पेल देवोअ आदेश ने मान्ये, पोन ओमे मानतेहे ताहां तुमापोअ देवोअ दया ओवीही, 31 तेहलोज तें बी ओमे आदेश ने मान्ये, पोन माने वोले ताहां तुमाआं हारकीज तियांपोअ बी दया ओवे. 32 काहाके आदेश ने मानत्ले काजे देवे आखाहा एकीज जागे केंडीत मिक्येहे काहाके तो आखा पोअ दया कोइत सेके.

33 देवोअ धन केतोहो वोडो होय! तियाआ बुद्दी आन ज्ञान केतोहो उंडे रोत होय! तियाआ विसार कोडे जाअयां! तियाआ मार्ग कोडाहा समजाय! 34 वसनोम लेख्योहो,

"प्रभुउ मोन कोडे जाअयों?

तियाहा हान देखाड़नारु कोडू होय?

35 नेत केदिहीं एखु तियाहा काविंहीं आप्यो के

तो तियाआ बोदलू आपित सेके?"

36 काहाके आखी वस्तु तियाज वाअहीं बोण्‍यिहीं, आन आखी वस्तु तियाआ वोजेसे रोतिही आन तियाआ काजे होय, देवोअ महिमा हादाजलम ओवती रोये! आमेन.