1 तियाहा काजे, ए बिहीरापोअ दोश लागाड़नारा, तू कोडू बी ओय, ताहूं दोश लागाड़ीइलोअ किज आधिकार कायनाहां; काहाके जियी गोठीम तू बिहीरापोअ दोश लागाड़ेहे, तियीज गोठीमेहें तू सोताह बी सुकेहे, तिहींज वाईं तू सोताआ जिवोह दोशी ठरवेहे.✝2:1 इफिस 4:17-18 2 आपुहूं मुंदू होय के एहेलेहे कामे कोअनारा पोअ देव बोराबर शिक्शा लेतावत्लू. 3 ए मोनवी, तू जो एहेले एहेले कामे कोअनारा पोअ आरोप लागाड़ेहे आन सोताह बी तेज कामें कोअहे; ताहां केहें ताहूं एहेलोह लागेहे के तू देवोअ न्यायनिवाड़ा रोत वासात जाही? 4 केहेंनेत देवोअ दया ताहूं मोन फेरवे तेहें काजे लेत जाहे एहें ने जांइत तू तियाआ वोडी दया, माया, आन धिरोअ अपमान कोअहे? 5 पोन तू ताआ यी डांबरायी आन जिद्दी मोनोवाअहीं सोताआ काजे देवोअ खोत हाटवेहे, जे तियाआ खोरा न्यायनिवाड़ाआ दिही प्रगट ओवनारी होय. 6 तो हारेक जोओंहों जिया तियाआ कामोंअ परमाणे फल आपे, 7 जे माअहें हाजा कामोमेहें खेटीत रोतेहे आन देवोअ महिमा, मानपान आन अमर जिवनोअ वाट जोवतेहे, तियांहां देव अमर जिवन आपे. 8 पोन जे माअहें आद्र्ये होय आन सत्याहा नाहां मानते, गाठ्येए सुकीइ गोठी मानतेहे, तियां पोअ देवोहो खोत लागे आन जास्ती खिजवाय. 9 जो खाराब कोअहे तिया हारेक माहूंपोअ आन पिड़ा आन आफत आवे, पेल यहुदी पोअ तिहीं रोत बिगर यहुदी पोअ; 10 पोन जो हाजो कोअहे तिया हारेक जोओंहों महिमा, मानपान आन होक जोड़े, पेल यहुदीही आन तिहीं रोत बिगर यहुदी. 11 काहाके देव कोडाआ भेदभाव नाहां कोअतू.

12 बिगर यहुद्यां पोअ मोशेए कायदु कायनाहां; तियां गुनू कोअयू, तें विण कायदाआ आरवात बी जाय. यहुद्यां पोअ कायदु होय; तियां गुनू कोअयू, तियांहां कायदाआ परमाणे डोंड जोड़े. 13 काहाके कायदु उनाअनारे नाहां, पोन कायदाआ परमाणे सालनारे देवोअ नजरेमेहें धर्मी ठरतेहे. 14 काहाके बिगर यहुद्यां पोअ कायदु कायनाहां तेबी तें कायदाआ परमाणे सालतेहे, ताहां तियांआं सोताआ सोभावोज मेहें तो कायदु होय. भले तियांपोअ कायदु कायनाहां. 15 तियांआं मोनोम लेखाअलू कायदु तियांआं सोभावोम देखाअहे; तियांआं बुध्दी बी ओं बोराबर होय कोत साक्शी आपेहे, तियांआं विसार तियांहां दोशी नेताहां निर्दुस ठरिवताहा. 16 जे हाजी बातमी मी कोताप्यिही तियीइ परमाणे देव एक दिही मोनवीइ हारेक दोड़ापाअली गोठीइ न्यायनिवाड़ु ईसु ख्रिस्तावाईं कोए.

17 जर तु सोताहा यहुदी कोवड़ावतुय, आन कायदाआ आधार लेतुय आन देवोअ बाप्तिमेहें वोडाय कोअतुय; 18 आन तियाआ इश्शा जांअतुय आन कायदाआ शिक्शण लेत कोइत जो हाजो ओय तियाहा पसन कोअतुय; 19 आन ताहूं सोतापोअ भरिवसू होय के तू आंद्ला-ओजाण्याआं वाट देखाड़नारु, आन आंदारामेहें सालनाराआं दिवू होय, 20 फोगा माहुंहूं हाने लागड़नारु आन नादानोअ सिकाड़नारु मास्तर होय. ताहूं कायदाआ आखी गोठीइ आन पुरा सत्याआ ज्ञान होय. 21 ताहरुउ तू बिहीराहा हाजलुज सिकाड़ेहे आन सोताहा काहा नाहां सिखाअतू? तू सिकाड़ेहे, "सोरी मा कोअहा," ताहां तू सोताहा सोरी काहा कोअहे? 22 तू सिकाड़ेहे, "सिनालो मा कोअहा," पोन तू सोताहाज सिनालो कोअहे? तु मुर्तीही नाहां मानतू कोहे आन सोताहा मंदिरे लुटेहे? 23 देवोअ कायदु तापोअ कोत तू वोडाय कोअहे, पोन कायदाआ पालन सोड़ीत देत तू देवोअ अपमान काहा कोअहे?

24 "काहाके तुमाआं उस्ती बिगर यहुदी माअहूंमेहें देवोअ नावोअ निंदा ओवेहे," एहेलोहो लेख्यो बी होय. 25 जर तू कायदाआ पालन कोअही ताहां खतनाआं फायदू होय, पोन जर तू कायदाआ पालन ने कोअतुय ताहां ताआ खतनाआं कीज फायदू कायनाहां. 26 जर विण खतनावालो कायदाआ पालन कोअतोय, ताहां देव तियाहा खतनावालाआ होस ने गोणे के? 27 तिहीं वाईं तू यहुदी ओत बी ताआ न्याय बिगर यहुद्यां वाईं ओवे, काहाके ताआ खतना ओयुहू आन तापोअ कायदु होय तेबी तुमे कायदाआ पालन ने कोअयो; पोन तियांआं ताम शारीरिक खतना ने ओवो तेबी तियां कायदाआ पालन कोअयो. 28 काहाके खोरु यहुदी तो नाहां जो फक्त उपरसोल्यू यहुदी होय, जियाआ खतना फक्त शारीरिक होय. 29 पोन खोरु यहुदी तो होय जो मायते रोत यहुदी होय; जियाआ मोनोअ खतना ओवोहो, आन ओं नाहां लेखल्या कायदाआ पोन देवोअ आत्माआं काम होय. एहेला माहुंहूं मोनवीप रोत नाहां, पोन देवोअहीं रोत सन्मान जोड़त्लू.