Efésios 5

22 Mwangota akaahanu mwaajeketelange akaanalome bhinu handa chimwaajeketela Hangwana Ayesu. 23 Kwa kubhee mwanalome nga nachilongola kwa hanu bhabhe handa henela Akilisito chibhatekubhee nachilongola mu libhoga lya bhandu bhabhahobhalela, yakubhee nga mmele gwabhe, na jono Akilisito nga Akombohi jwa mmele gwabhe. 24 Handa henela libhoga lya bhandu bhabhahobhalela Akilisito chilitendakwaajeketela Akilisito, hela hela akaahanu bhabhaajeketelanga akanalome bhabhenji mu hikubho yoa.

25 Mwangota akaanalome, mwaapalange akahanu bhinu handa henela Akilisito chibhatekulipala libhoga lya bhandu bhabhahobhalela jonojwe kwa kuchibhoa mweene mmele gwabhe. 26 akatenda henela ili kwa lilobhe lyabhe, kwaatendanga kubhee bhandu bha jika mu libhoga lya bhandu bhabhahobhalela Akilisito kubhee lya kuhalala kwa kulijelejea lilobhe lyabhe kwa machi, 27 ili akombole kuchipatila lilubhalo lya bhandu bhabhahobhalela Akilisito lilibhekitwe ligongo lya Annoongo, lyanga kulemwa kohakola, na chilebhe choachela chichilandana na genago. 28 Bahi, akanalome bhabhapalange akahanu bhabhe handa chibhahipalanga mimele jabhenji akaachinabhene. Jaapala hanu bhabhe achipala mweene. 29 Kwa maana jwaakwa mundu joajola jwaatendakuguchimwa mmele gwabhe, nambo bhatendakugulia na kuguweka ngobho. Henela nga Akilisito chibhalitendela lilubhalo lya bhandu lilyaahobhalela jonojwe, 30 kwa kubhee twenga jika nga yeega ya mmele gwabhe, 31 Handa chiitekujandikwa mu Majandiko ga Annoongo, "Ligongo helyo mwanalome apakwaaleka atati mundu na anyongo mundu bhabhe, na jonojwe apakulondanika na hanu bhabhe, na bhena bhabhele bhapakubhee mmele gumo." 32 Gagatekuchiiya nga makolongwa, nambo nenga ndendakulongela kwa ngani ja Akilisito na libhoga lya bhandu lilyaahobhalela jonojwe. 33 Nambo ganga Majandiko nga ligongo linunji kabhele, kila mwanalome apalikwa kwaapala hanu bhabhe handa chibhatendakuchipala mweene, na jonojwe hanumundu apalikwa kwaajeketela hangwana bhabhe.