1 सुरुत बचन लेऊ, बचन परमेस्वर सकाए लेऊ, ओटन बचन परमेस्वरज लेऊ। 2 ओ सुरुक परमेस्वर सकाए लेऊ। 3 सोगलै जन्तु ओलङन बनिऊ, ओटन सोगल जन्तु ओल बिना नैज माबनिदा। 4 ओसै जिबन* लेऊ, ओटन नकाई जिबन रुयाङल ज्योति लेऊ। 5 ना ज्योति चिऊन्याल चम्किऊ, तर चिऊन्या नकायर्त झ्योङस्यु माल्दी।

6 परमेस्वरले आपरिङन्या तोलोअ थाई पानन्या रु लेऊ, जोल मिन यहुन्ना लेऊ।✝ 7 नका ओ ज्योतिल बारेल बयन यांऔ नाल्ट बयन ताइस्यु रांऔ, कि सोगल रुयाङ ओलङन बिस्वास ग्याढोरत्या। 8 नका ओलजै ना ज्योति माङडी, तर ना ज्योतिल बयन याराऔ। 9 नका ज्योति सत्य लेऊ, ईका ज्योति सङ्सारलं रांज्याया ओटन सोगल रुयाङत चम्किया। 10 ओ सङ्सारलै लिज्याऔ, सङ्सार ओलङन्ज बनिऊ, ताहकन्बै सङ्सारले ओलजन माशैदा। 11 ओलं आरुयाङ ल्योङै रांऔ, तर ओलं आरुयाङै ओलजन ग्रहन माढोदुरा। 12 तर ज्वाएले ओलजन ग्रहन रांढोव, ओटन आ मिनतं बिस्वास रांढोव, ओले नकाङजन परमेस्वरलं सन्तान ताइन्या अढिकार आयोवाङ। 13 नकाङ जीङन, न बुलल इच्छ्याङन सनर काङ्काई रुल इच्छ्याङन माङडी तर परमेस्वरतन जर्मिन्याङ ताइरा।

14 ओटन बचन बुलत रंनन्या ताहौ, ओटन अनुग्रह सनर सत्यताले पुरा ताइस्यु गेखार्ल बाई चुङौ। गे ओलं महिमा गेरङयिउ, जो महिमा बौल ज़ाल मनताइन्या गे गेडोएयिउ। 15 यहुन्नाले ओलं बारेल बयन आयांज्याऔक घिन्या ग़ाले ऐलेऊ, "ओ नकाई रु ज्या, जोल बारेल ङा ङापान्ङु ‘ङाछिन्ट रांन्या ङातन हर्त लेया, दानाङभन्या ओ ङाजर्मिऊ हादेएजै लेऊ।’"

16 ओलं अनुग्रहल पुर्नताङन गे तोलोअ अनुग्रहल यर्त गे सोगलैले छुट्टै अनुग्रह डोएस्यु लेया। 17 दानाङभन्या ब्यबस्था मोशाङन यांसिऊ, अनुग्रह सनर सत्यता येशु ख्रीस्टङन रांऔ, 18 परमेस्वरजन काङ्काईले खकै रङस्यु मालरदी। दानाङभन्या तोलोअ याएज बौल घोनल चुङन्या ज़ाले ओलजन थनस्यु नाएवा।

19 जब ख्वाएयाए यरुशलेमला यहूदी अढिकारीयाङै पुजाउरोयाङ सनर लेबीयाङजन यहुन्ना ल्योङ "नङ काङ्का?" ऐलेस्यु गिनौ नाल्ट रापरिङवाङ, 20 नकाले ङा "ख्रीस्ट माङडी, ऐलेस्यु ओज्या ऐमाल्दा।" 21 तब नकाङै यहुन्नाजन रांगिनौ, "वन नैति नङ एलिया रों?" नकाले ऐलेऊ "ङा माङडी।" "नैति नङ ना अगमबक्ता रों?" नकाले जबाक आयोवाङ, "माङडी।"✝ 22 नकाङै यहुन्नाजन ऐराढोव, "फरि नङ काङ्का वन? गेजन पानस्यासिन्ते, ओटन गेजन परिङन्याङजन गे पानस्याऔ ग्याढुदुयित्या नङ नबारेल नैपानन्?" 23 यहुन्नाले जबाक आयोवाङ, "यशैया अगमबक्ताले आपानौमन, ‘परमप्रभुल यम सोझा जाएचिते’ ऐलेस्यु हरहर ताइन्या पोल कलिऊन्या तोलोअ रुल ग़ा ङाई ज्या।"✝ 24 नकाङजन फरिसीयाङै रापरिङवाङ। 25 ओटन नकाङै यहुन्नाजन रांगिनौ "नङ ख्रीस्ट बै माङडी, एलिया बै माङडी, ना अगमबक्ता बै माताहन्कन, दानाङ नङ रुयाङजन बप्तिस्मा योंनर वन?"

26 यहुन्नाले नकाङजन जबाक आयोवाङ, "ङा ता रीले याएज बप्तिस्मा योंङरा, तर जे खार्ल तोलोअ च्याङस्यु लेया, जोजन जे माशईचिदी। 27 ङा छिन्ट रांन्या ओइज ज्या। जोल ङा जुताल टना पलाअन्या लायकला मालेङदी।" 28 ईका छेन यर्दन भई हुदिन्त बेथानियाल ताइस्यु लेऊ, जोङ यहुन्नाले बप्तिस्मा यांज्याऔ।

29 तयोअका छिम्क यहुन्नाले येशुजन आलेऊदेए आरांज्यान्या रङस्यु ऐलेऊ "खिम्चिते सङ्सारला पाप सिमस्यु लाङन्या परमेस्वरलं थुमा!✝ 30 ईका ओइ ज्या, जोल बारेल ङापानस्याचिऊ, ‘ङाछिन्ट तोलोअ रु रांया, जो ङातन हर्त लेया दानाङभन्या ओ ङातन हादेएजै लेऊ।’ 31 ङा ङाईज ओजन शईस्यु ङामालेङु, तर ओलजन इस्राएलीयाङै ग्याशईरत्या ऐलेस्यु ङा रीले बप्तिस्मा यांस्यु-यांस्यु ङारांङु।" 32 यहुन्नाले ऐलेस्यु बयन आयोव, "ङा पबित्र आत्माजन कचिकुरल भेसतं स्वर्गङन लांइस्यु येशुल यर्त आचुङन्या ङारङ्ङु। 33 ङा ओजन शईस्यु ङामालेङु, तर जोले ङाजन रीले बप्तिस्मा योंवर लेस्यु आपरिङ्ङु ओलेईज ङाजन ऐआढाङु, ‘जोल यर्त नङ पबित्र आत्मा आलाइज्यान्या सनर आचुङज्यान्या रङन, पबित्र आत्माले बप्तिस्मा यांन्या ओइज ज्या।’ 34 ङा रङस्यु लेङा, ओटन बयन यांस्यु लेङा, कि परमेस्वरलं ज़ा ओइज ज्या।"✝

35 फरि छुट्टै दिन छिम्क यहुन्ना नेलोअ सिइने सकाए च्याङज्याऔ। 36 यहुन्नाले येशुजन आहिनज्यान्या रङस्यु ऐलेऊ, "खिम्चिन्ते, परमेस्वरलं थुमा!"

37 यहुन्नाले आछ्योङन्या छेन थएस्यु ना नेलोअ सिइने येशुल छिनछिन लागिऊने। 38 येशुले वलस्यु आब्याटौक, नकाने छिनछिन नेराज्यान्या रङस्यु नकानेजन आगिनौने, "झेन नैति झेनरोअचिनु?" नकानेले ओलजन ऐनेढोव, "रब्बी (जोल अर्थ गुरुज्यू), नङ काङ नचुङनु?" 39 ओले नकानेजन ऐआढोवने, "राचिन्ते ओटन झेन रङन्या लेचिना।" नकाने हिनौने, ओटन येशु आचुङन्या पो नेंरङौ, नकाने ना छिम्क ओलसंज बाए चुङौने, दानाङभन्या लगभग ओईका चार बजिस्यु लेऊ।

40 यहुन्नाले आपानन्या छेन थएस्यु येशुजन पछ्याइन्या ना नेंलोअ मध्य तोलोअ सिमोन पत्रुसलं आभाई अन्द्रियास लेऊ। 41 अन्द्रियास हादेए आभाई सिमोनसकाए डोएसिऊ, ओटन नकाजन ऐआढोव "घोन मसीहजन डोएस्यु लेच्या (जोल अर्थ, ख्रीस्ट) हो।"✝ 42 अन्द्रियासले सिमोनजन येशु ल्योङ आहोनौ। येशुले नकाजन आब्याटौ ओटन ऐआढोव, "नङ ईका यहुन्नाल ज़ा सिमोन ज्या, नङ केफास (जोल अर्थ, लुङ) ऐढासिया।"

43 छिन्का छिम्क येशुले गालील प्रदेसलं हिनन्या पक्का आजाटौ। ओटन फिलिपजन डोएस्यु येशुले ऐआढोव, "ङा छिन्ट बान्ते।" 44 अन्द्रियास सनर पत्रुस मनताइन्या फिलिप बै बेथसेदा बजारलाइज लेऊ। 45 फिलिपले नथानेलजन डोएस्यु ऐआढोव, जोल बारेल मोशाल ब्यबस्था सनर अगमबक्ताङै बै सरस्यु लेरा, योसेफल ज़ा नासरतला येशुजन घोन डोएस्यु लेच्या।✝ 46 नथानेलले नाजन आगिनौ, "नैति नासरतङन कोबाअ चान्या छेन रांऔ आढुदुऊ का?" फिलिपले नाजन जबाक आयोव, "रा:स्यु खिम्ते।" 47 येशुले नथानेलजन आल्योङ आरांज्यान्या रङस्यु नकाल बारेल आपानौ, "तोलोअ पक्का इस्राएलीजन खिम्चिते, जोसकाए नैज कैफट माल्दी?" 48 नथानेलले आगिनौ, "नङ ङाजन कैलेस्यु नशईनु?" येशुले नकाजन जबाक यांस्यु ऐआढोव "फिलिपले नङजन आखुलौ हादेए, ड्यूल टुङल ङा नङजन ङारङनु।" 49 नथानेलले येशुजन ऐआढोव, "रब्बी, नङ परमेस्वरलं ज़ाई ज्या, सनर नङ इस्राएलला रय ज्या।" 50 येशुले नकाजन जबाक यांस्यु ऐआढोव, "ङा नङजन ड्यूल टुङल ङारङनु ऐ नलेऊकाले, नङ बिस्वास नढोनु? नङ इकातन अझै घिन्या छेनयाङ रङना।"✝ 51 ओटन येशुले नकाङजन ऐआढोवाङ, "मछ्यु ङा जेजन ऐढाच्या, जे स्वर्ग आफएसिन्या सनर परमेस्वरलं दुतयाङ रुल ज़ाल फलाअङन हर्देए रांवूमज्यान्या सनर वान्देए रालाइज्यान्या रङच्या।"✝