João 21

येशु साट जना सिइयाङ ल्योङ आरंनन्या

1 नकाल छिन्ट सिइयाङ ल्योङ तिबेरियास समुन्दरल लेऊल येशुले फरि आ सिइयाङ ल्योङ रंनौ। फिरि बै ओलझन्जै ऐलेस्यु आथनौ। 2 सिमोन पत्रुस, दिदुमस ऐढासिन्या थोमा, गालीलला काना सहरला नथानेल, ओटन जब्दियाल नेंलोअ ल्हेपाज़ानें सनर आसिइयाङ्‌ङन अपुर नेंलोअनें बोलोङ लेवाङ। 3 सिमोन पत्रुसले नकाङजन ऐआढोवाङ, "ङा ङा:स्या ङासएनाज्याङु।" सिइयाङै ओलजन ऐराढोव, "गे बै नङसं रांया।" नकाङ हिनस्यु डोङ्गाल चरीवाङ, तर ना रिउ नकाङै नैज माकोलोदुरा।✝21:3 लूका ५:५ 4 छकाल्या ताइङा आलिज्याऔक, येशु आवङल च्याङौ। तर सिइयाङै नका येशु जै ज्या ऐलेस्यु माशईदुरा। 5 येशुले नकाङजन ऐआढोवाङ, "बालअयाङ, जेसकाए ङा:स्या ख्वाए लेऊ?" नकाङै ओजन जबाक रांयोव, "माल्दी।"

6 ओले नकाङजन ऐआढोवाङ, "जाल डोङ्गाल दाइन्यादेए होरचिते, ओटन डोएचिरा।" तब नकाङै जाल राहोरौ, ओटन ङा:स्यायाङ वुरले गर्दा नकाङै जाल च्योङौ रांमाढुदुऊ।✝21:6 लूका ५:६ 7 येशुले मया आढान्या सिइले पत्रुसजन ऐआढोव, "नका ता प्रभुदी रैस।" "नका ता प्रभु रैस" ऐआलन्या थएस्यु सिमोन पत्रुसले आमि बाहेरङन्ता क्वा कम्बरत आमलिङौ, दानाङभन्या नकाले आक्वा फिरस्यु लेऊ, ओटन रील जोकौ। 8 अपुर सिइयाङ डोङ्गालै चुङस्यु ङा:स्या लेन्या जाल च्योङस्यु च्योङस्यु रांज्यावाङ। नकाङ आवङतन लोए मालेरदी, छ्योअ सय मिटर याए त लेवाङ। 9 जब नकाङ आवङल लाइवाङ, तब नकाङै फिलङ्गाल भुबराल ङा:स्या सनर भरेई हिप्सिज्यान्या रांरङौ। 10 येशुले नकाङजन ऐआढोवाङ, "जे भाबाअ जेकोलोअन्या ङा:स्यातन तचियाए होन्चिते।" 11 तब सिमोन पत्रुस डोङ्गाल चरिस्यु तसय तिरपन्न गोटा घिन्या-घिन्या ङा:स्याले फाङताइन्या जाल पाखाल च्योङस्यु आहोनौ, तर आवाए भ्याई लेस्यु बै जाल माचिइदा। 12 येशुले नकाङजन ऐआढोवाङ, "रा:स्यु कैचिते।" सिइयाङ मध्य काङ्काईले बै "नङ काङ्का?" ऐलेस्यु गिनन्या रामाआन्तिदुऊ, दानाङभन्या नकाङै ईका प्रभु ज्या ऐलेस्यु सनस्यु लेवाङ। 13 येशु रांऔ ओटन भरेई हिनस्यु नकाङजन आयोवाङ, ओटन नैलेस्युई ङा:स्या बै आयोवाङ। 14 सिन्यातन जिङदा ताइस्यु आच्याङौ छिन्ट येशु आ सिइयाङ ल्योङ आरंनन्या ईका तिस्रा पाला हो।

येशु सनर पत्रुस

15 जब नकाङै ङा:स्या सनर भरेई कैस्यु रांखेमौ, तब येशुले सिमोन पत्रुसजन ऐआढोव, "यहुन्नाल ज़ा सिमोन, नैति नङ ङाजन इकाङतन भ्याई प्रेम नढाङनु?" नकाले ओजन ऐआढोव, "औ प्रभु, नङ ऐसन्ना, ङा नङजन प्रेम ऐढाना लेस्यु।" येशुले नकाजन ऐआढोव, "ङा पाठाङजन यांहौरते।" 16 येशुले फरि छिन्का पाला नकाजन ऐआढोव, "यहुन्नाल ज़ा सिमोन, नैति नङ ङाजन प्रेम नढाङनु?" नकाले ओजन ऐआढोव, "औ प्रभु, नङ ऐसन्ना, ङा नङजन प्रेम ऐढाना लेस्यु।" ओले नकाजन ऐआढोव, "ङा भेडाङजन ब्याएबिई ढोवरते।" 17 येशुले नकाजन तिस्रा पाला ऐआढोव, "यहुन्नाल ज़ा सिमोन, नैति नङ ङाजन प्रेम नढाङनु।" पत्रुसले दुख आमानिउ, दानाङभन्या ओले तिस्रा पाला नकाजन "नैति नङ ङाजन प्रेम नढाङनु?" ऐआढोव। ओटन नकाले ओलजन ऐआढोव, "प्रभु नङ सोगलै छेन ऐसन्ना। ङा नङजन प्रेम ऐढाना ऐलेस्यु नङजन थाहै लेया।" येशुले नकाजन ऐआढोव, "ङा भेडाङजन यांहौरते। 18 मछ्यु, ङा नङजन ऐढाना, जब नङ धापा नल्‌नु नङ नङजै तेरछ्या नपोअनु, ओटन जोदेए नइच्छ्या लागि ओदेए नहिन्नु। तर जब नङ सेरन, तब नङ नकुई पसारन्या लेना, ओटन अपुऱ्याङै नतेरछ्या पोअस्यान्या लेरा, ओटन नङ जोङ हिनहिन माङप्सिन नङ लाङसिना।" 19 कैताइन्या किसिमला सिइकालङन नकाले परमेस्वरलं महिमा ढान्यालेऊ, नका सङ्केट ढास्यु ओले ईका आपानौ। आवाए पानस्यु येशुले पत्रुसजन ऐआढोव, "ङा छिन्ट लागिन्ते।"

येशु सनर छुट्टै आ सिइ

20 पत्रुसले छिन्देए वलस्यु आब्याटौक येशुले प्रेम आढान्या सिइ छिनछिन आरांज्यान्या आरङौ। इकाले जै ओईका ज्यान्या बेलाल ओलं छातिउल घेएसिस्यु, "प्रभु नङजन कोलोकौ परिङन्या काङ्का?" ऐलेस्यु गिन्स्युलेऊ।✝21:20 यहुन्ना १३:२५ 21 नकाजन रङस्यु पत्रुसले येशुजन ऐआढोव, "प्रभु इकाजन कै ताहौ होला?" 22 येशुले पत्रुसजन ऐआढोव, "ङा ङामाराऔ समन नकाले ग्यावुइज्यात्या, ऐलेन्या ङा इच्छ्या लेकन बै नङजन नैति कैताहौका? नङ ङा छिन्ट लागिन्ते।" 23 नैताइस्यु ना सिइ मासिदी ऐलेन्या छेन बिस्वासी भाईयाङ खार्ल फैलिऊ। येशुले नका मासिदी ऐढास्यु मालेऊ, तर "ङा ङामाराऔ समन नकाले ग्यावुइज्यात्या ऐलेन्या ङा इच्छ्या लेकन बै नङजन नैति?" ऐढास्यु लेऊ। 24 आका नाइज सिइ ज्या, जोले ईका छेनल बारेल बयन योंवरा, ओटन ईका छेन सरस्यु नाएवा, ओटन गे ऐसन्या कि नकाल गवाइ सत्य लेया।

आसाप

25 येशुले अपुर बै तबर काम आढोव, नकाङ मध्य सोगलैल बारेङन सरन्या ताहकन, ङाजन ऐटाइन्या लागिया कि, नकाल बारेल सरसिन्या किटापयाङ सङ्सारभरि बै सुनन्या माल्दी।