1 जब हतिबा यरुश्लेमयि धुनला जैतुन रियि धुनला बेथफागे राङ बेथानिया नाङान साला क्योप छारसोङ। हतितुइना ख्युइ रेँ लोब्टुबे नाङने ङेला जु नाइरे चाँसोङ, 2 "खि धुनयि साला क्यु, राङ स्युयिन स्युयि हतिबे थाल्ला थु मि सु याङ मा स्योनि टेटु झि ठे ङान ना। हतिला टोलदे ङिहा ख्याला। 3 रेनयि ख्योएला ‘धि च्हि क्याक्याइबा ना?’ नाइना, ‘प्रभुला धि कोइबा धु, राङ ख्युइ घ्यबो राङ ल ङान ना’ नोइ।" 4 तेहि हतिबा पुइसोङ, राङ हति टेटु खुल्ला गालिलला को तेया तातामा ठेसोङ, राङ हतिला टोलसोङ। 5 हतियान लाँलाबातेबे नाङने रेन रेनयि खोला टिसोङ, "टेटुतेबाला टोल्दे खे च्यि किन?"

6 येशुयि हतिबाला कोकोइबा च्वरा हतिबे नाइसोङ, राङ हतिबे खोला ढोरु च्युसोङ। 7 हतिबे टेटु येशुयि तेहा ख्योसोङ, राङ रेँ कोहिलातेबा हति थोला पोरसोङ, राङ खो हति थोला स्योनसोङ। 8 लेइराङ रेँ कोहिला राङ स्यानतेबे थाङने ङोलोतेबा तुप्ते लामला तिङसोङ। 9 तेहि ख्युइ ताङताङला ढोङान राङ च्येच्येला होङान जु नेन राङ जय नाइरे क्ये तोन्सोङ, "होसन्ना! धन्य खो, सु कजसुबे मिनला हुन!✝ 10 धन्य खो, हुइ आके दाउदयि हति होङान राज्य, परमप्रभु!" होसन्ना✝

11 खो यरुश्लेमला लेप्ते मोनलाम क्यासि खिमयि नाङला स्युसोङ। तेहि ख्युइ रेँ फाला छुलुइ क्यु पोरोयि थोला मि ताइरे कमु च्युच्युङाति च्युनङि ङ्याबो खो बेथानियाला पुइसोङ।

12 ङाइटोतेला हतिबा बेथानियाने हुइतुइना खो टोपा तसोङ।

13 तेहि घ्याबोला ङोलुइ खाँखाँबा भेलडुयि तोङबोङ थोङदे तुइका चिगा ढेबु खुहोङ नाइरे खो पुइसोङ, हिन्नाङ हतिया क्योप छारते ख्युइ हतिला ङोलो अर्थात स्यान च्याङ माखुसोङ, चिचालानाना हति भेलाला भेलडुयि ढेबु छायापयि भेला च्युच्यु मिधु।

14 तेहि ख्युइ हति तोङबोङला नाइसोङ, "ता ख्युइ हतिने नामयाङ सुइ याङ ढेबु मासा।" तेहि धि नानाइबा ख्युइ लोब्टुबे थोइसोङ।

15 तेहि यरुश्लेमला क्योप छारते खो मोनलाम क्यासि खिमला ङ्योङान छोङानला फिला तोनसोङ राङ आलाइ च्येङानतेबाला फिला तेसोङ राङ आलाइ च्येङानयि च्यकचेतेबा राङ ङोम्मु छोङानयि त्योएसि सातेबा लला क्यापसोङ। 16 ख्युइ सुलाङ च्याङ क्यु हतिने मोनलाम क्यासि खिमने खेरतु मा च्युसोङ। 17 तेहि ख्युइ छोइ लोबिन राङ नाइसोङ, "च्हि धि च्वरा टिटिबा मि धुये, ‘ङाहि खिम मितेबा पोरो चाला मोनलामयि खिम नाङान ना?’" हिन्नाङ खि ता हतिला डाकुबे अड्डा सोसोइबा धु।✝

18 तेहि घोबा पुजारितेबा राङ शास्त्रितेबे धि थोइरे खो च्हिरु क्याइरे मासि लोङ ज्याइ नाइरे च्युइ फाताला छेलसोङ। चिचालानाना हतिबा खोला झिकिनलो, चिचालानाना मयि तुम पोरोयि ख्युइ छोइला हा:लालाइबा धुलो। 19 कमु हुइतुइना खो भजारयि फिला थोन्दे पुइसोङ।

20 नामे हतिने ताङलि लामला राङ ढुइतुइना ख्युइ हति भेलडुयि तोङबोङला प्हाराने राङ काकामा थोङसोङ।

21 तेहि पत्रुसला हति टाम्बा लेप्सोङ, कि ख्युइ हतिला नाइसोङ, "रब्बि, तोइ, ख्युइ छार चुचुबि भेलडुयि तोङबोङनि कामसोङ।"

22 येशुयि हतिबाला जवाक पिन्दे नाइसोङ, "कजसुबाला हिछे पोर। 23 ङा ख्योएला तेम्बारे नाज्याइ, तेम्बारे रेनयि रेँ समला संका मिकिता हिन्नाङ रेँ नानाइबि ताम पुरा हुन नाइरे हिछे क्याइरे धि रिला ‘क्कते ख्योए छो छोम्मुवाला ङिल’ नाइना, ख्युइ चाला हति होङान ना।"✝ 24 हतिचाला ङा खेला नाज्याइ, "कि मोनलामला च्हि लाँ सो खुँखुँबा होतो नाइरे हिछे कि, राङ हति खि होङान ना। 25 जब खे मोनलाम क्यक्तु लाँकिन, हतितुइना सुइ याङ विरोधला खि चिगा होएना हतिला माप कि, तेहि तेङला ला होएता खि आकि याङ खि अपराध माप किङान ना। 26 हिन्नाङ माप माक्याइना, तेङलाला होएतायि खि आकि याङ खि अपराध माप किङान मान्ना ना।"

27 हतिबा याङ यरुश्लेम मोनलाम क्यासि खिमला लेप्सोङ। तेहि येशु यरुश्लेमला फाला छुला हुइतुइना घोबा पुजारिबा राङ, शास्त्रिबा, केवाकिङान गुरुबा ख्युइ तेहा लेप्सोङ। 28 हतिबे खोला टिसोङ, "काङ आङयि खे धि लाइ किन? धि लाइबा कियापयि आङ खेला सुइ पिन्सुइ?" 29 येशुयि हतिबाला नाइसोङ, "ङ खेला ताम झि ढिज्याइ, राङ खे हति जवाक नाङ, राङ काङ आङयि ङा धि लाइ कि, सो खेला नाज्याइ। 30 युहान्नायि पिपिनि बप्तिस्मा तेङलाने ना कि मिने, ङाला जवाक नाङ।"

31 तेहि हतिबे जु ने राङ को रेँ नाङला नारे क्याइसोङ, "‘तेङलाने’ नाइना ता ‘खि खोला चिला हिछे माक्याइबा’ नाइरे ख्युइ नाङान ना। 32 ‘मिने’ नाइना" हिन्नाङ हचु नायाप हतिबा जनताने झिरे। चिचालानाना पोरो युहान्नाला तेम्बा ङोन्सेखिलङान मानि किन्लो। 33 तेहि हतिबे येशुला जवाक पिन्दे नाइसोङ, "ङेला छ्या मेता।" येशुयि हतिबाला नाइसोङ, "ङा याङ काङ आङयि लाम्ला धि लाइ किन, सो खेला मिना।"