1 जब को मोनलाम क्यासि खिमने थोनिन ताताता होतो, हतितुइना ख्युइ लोब्टुबे नाङने चिकि नाइसोङ, "तोइ, गुरुज्यु, टोउ छेले राङ खिम छोम्मुवा राङ खिम लेबोतेबा।"

2 येशुयि हतिला नाइसोङ, "खि धि खिम छोम्मुवातेबा थुइधोए?" ङिहा ता टोउ झिकि थोला स्यान टोउ मितोता किङगा पोरो तिपङान ना।

3 तेहि खो मोनलाम क्यासि खिमयि धुनला जैतुन रिला तोतितुइना पत्रुस, याकुब, युहान्ना राङ अन्‍द्रियासयि खोला फा:ला टिसोङ, 4 "ङेला नोइ, धि घटनाबा जब हुन? राङ धिबा पोरो होङयापयि चाला काङ ता हुन?"

5 येशुयि हतिबाला नाइसोङ, "च्याङबो क्याइरे त्योए, सुइ याङ खेला घो ख्यामदु माझ्यु। 6 मि लेइराङ ङाहि मिनला ‘ङा हति राङ ना’ नेनगा होङान ना, राङ हतिबे लेइराङला घो ख्यामदु झ्युङान ना। 7 जब खि ठुझि राङ क्याइरे चेचेबि ह:ल थोङ किन, हतितुइना माझि। धि च्वरा घटना होङकोइ राङ हुन। हिन्नाङ सिनि ङिन होङयाप तरह लाँमा राङ होतो। 8 चिचालानाना जति विरोधला मितेबे, राङ राज्ययि विरोधला राज्य लाँङान ना। कुरु-कुरु साला साघुल होङान ना, अनिकाल होङान ना। धिते पुमोला नाङान सुरु च्युच्युङा च्वरा तुरियि सुरुते ना।"

9 "खे रेँ भारेला च्याङबो क्याइरे त्योए। हतिबे खेला अदालतला टोएङान ना। खेला यहुदि झोमसि खिमला क्याङान ना। तेहि हाकिमतेबा राङ क्यालबोतेबे धुनला ङाहि चाला खेला साछि तेरतु खे लाँङान ना।✝ 10 राङ ताङला मितेबा पोरोला लोन ल टाइक्ये किकोइ हुन। 11 जब मितेबे खेला सुङदे खेरते मद्दा चलाइ किन, तेहि च्हि नायाप ना नाइरे ताङलाने राङ समतु माके। हिन्नाङ हति भेलाला राङ खेला च्हि पिन, हति राङ नोइ, चिचालानाना ताम नाङान खे माना, हिन्नाङ पवित्र आत्मा होङान ना।"

12 "भाइ झिकि भाइ झिला स्यियापयि चाला टोएङान ना, राङ हति च्वरा क्याइरे आकि पिजाला। पिजा पोमुतेबा आके आमायि विरोधला लाँ ङान ना, राङ हतिबाला सोतु झ्युङान ना। 13 तेहि ङाहि मिनयि चाला खे पोरो अल होङान ना, हिन्नाङ सु सिनसिन थु तहिया राङ तोकिन हति राङ थारथोनङान ना।" ✝

14 "जब खि मासि लोङान अल क्युतेबाला काङ होङकोइ मे हतिया राङ लाँलाँङा थोङान ना तेहि यहुदियाला होएतातेबा रि यहला टोइरे क्यु।✝ 15 खिमयि खानाला होएता हअला मापुप, नत रेँ खिमने चिगा धोनयापला नाङला मास्यु। 16 स्यिङला होएता रेँ कोट खेरयापला क्यापला मालो। 17 हिन्नाङ झिझिरा, हति ङिनला टुलुइमा राङ होमा लुइङान आमाला! 18 तेहि कुङघाला मायोङ नाइरे मोनलाम क्योप। 19 चिचालानाना हति ङिनला धि च्वरा दाशा उकायि ङिन होङान ना कि कजसुबायि क्याक्याइबि कालबाने राङ थाल्ला थु न त धि च्वरा च्युच्युङा होतो, न नामयाङ हुन। ✝ 20 तेम्बारे कजसुबे हति ङिन घटाइ माक्याइना ता मि सु याङ सोन्ङान माना ना, हिन्नाङ ख्युइ धाधामा मितेबे चाला हति ङिन घटाइ क्याक्याइबा ना।"

21 हति भेलाला सुइ याङ खेला तोइ, ख्रिष्ट ङिहा धु वा हतिया धु नाइना, खे हिछे माके। 22 चिचालानाना चुन ख्रिष्टतेबा राङ धाधामातेबाला घो ख्यामदु झ्युयापयि चाला हतिबे हा:लाइयापयि लाइतेबा किङान ना। 23 हिन्नाङ खे च्याङबो क्याइरे त्योए। तोइ, ङा खेला ताम पोरो ताङला लेइराङ नाइछारते।

24 हिन्नाङ हति ङिनला हति तुकायि च्येला ङिमा मुन्ना होङान ना, राङ धायि रेँ होए तेरङान मानाना। ✝ 25 कारमातेबा पान्नाङने छारङान ना, राङ पान्नाङला होएता शक्तितेबा घुलङान ना।✝ 26 तेहि हति भेलाला मितेबे मियि पिजाला शक्ति राङ छे धेयाप राङ ङ्याबो मुक्पाला लेलेबा थोङान ना। 27 तेहि ख्युइ तेङलायि लोन खेरङानतेबाला चोँङान ना, राङ पिरथिवियि सिनि छामने पान्नाङयि सिनि छाम थु छह स्यिने राङ रेँ धाधामातेबाला झोमदु झ्युङान ना।

28 "भेलडुयि तोङबोङने पाठ सिकि कि: हति ढाला भोला च्युङदे ङोलो थोनि पाल्ला यारका धुनलाराङ लेप्तु नाङान खि हा:कुन। 29 हति च्वरा क्याइरे राङ खि याङ जब धि घटनातेबा च्युच्युङा थोङिन, हतितुइना खो धुनला धु, कोला राङ होतो नाङान हा:कुवा कि। 30 तेम्बारे ङा खेला नाज्याइ, धि तामबा पोरो मा च्युङ थु धि पालि सिनङान माना ना। 31 तेङला राङ पिरथिवि सिन्दे ढोङान ना, हिन्नाङ ङाहि वचन नामयाङ सिन्दे मिढुवा।"

32 "हिन्नाङ हति ङिन राङ हति भेलायि भारेला आकि अर्थात स्यान सुलाङ छ्या मेता, न त तेङलाला होएता तेङलायि लोन खेरङानयि न पिजि।✝ 33 च्याङबो क्याइरे त्योए, लाँरे त्योए मोनलाम क्योप, चिचालानाना हति भेला जब होङयाप ना, सो खेला छ्या मेता। 34 धि ता ताक्पुइ रेँ यक्पुवाबाला खिमयि लाइ पोरो राङ दायित्वयि जिम्मा पिन्दे राङ कोराबाला लाँरे त्योए नाइरे आदेश पिन्दे प्रदेशला पुपुता च्वरा ना।" ✝ 35 "हतिचाला खे याङ लाँरे त्योए, चिचालानाना खिमयि ताक्पो कमु, कि छान फेला, कि च्याबो भोतितुइना, कि नामे, जब होङयाप ना, सो खेला छ्या मेता। 36 स्यान अर्थात खो हो:प्तामेला हुइतुइना ख्युइ खेला ङ्याङ्यला ला ठेहोङ। 37 काङ ङा खेला नेन हति ङा पोरोला नेन, ‘लाँरे त्योए।’"