1 ङिन रेन च्येला खो कफर्नहुमला लक्तेलो, तेहि मितेबे खो खिमला धु नाङान थोइदु। 2 तेहि झोम मि झोमसोङ कि हतिबा हतिया मास्योङालो, धि थु कि कोयि फिला याङ त्योएसा मेता च्युङदेलो, राङ खो हतिबाला कजसुबायि वचन टाइक्ये किन त्येतु। 3 तेहि मिरको स्यियि खुखुरि स्हु च्याङ मिघुलङानला ख्योँरे ख्युइ तेहा लेप्सोङ। 4 मिझोमयि क्याइरे येशुयि धुनला हति मिला खेर माङ्युबाति हतिबे खो होएते खिमयि खाना ते लाँरेलो, राङ हति खाना कोकोति साने हति स्हु च्याङ मिघुलङानयि मितेला हति ङ्याङ्यालि खाटा ङ्याबो राङ हअला पुतेलो। 5 येशुयि हतिबे हिछे थोङदे हति स्हु च्याङ मिघुलङानला नाइसोङ, "ए पिजा, ख्युइ तिक्पाबा पोरो माप च्युङदे।"

6 हिन्नाङ हतिया शास्त्रि रेन तेतु, राङने रेँ समला जु नाइरे टानकिन राङ त्येतु। 7 धि मि च्हि चाला धि च्वरा ताम नेन? धि कजसुबायि फाला ताम नानाइबा ना। च्हि मात्रा, अर्थात कजसुबायि अर्थात स्यान सुइ तिक्पा माप कि ङ्युइकिन।

8 तेहि हतिबा रेँ नाङला धि च्वरा विचार किन्दु नाङान येशुयि हतितुइना राङ रेँ आत्माला हा:कोरे हतिबाला नाइसोङ, "चिला खे रेँ समला धि च्वरा विचार किन। 9 स्हु च्याङ मिघुलङानला ‘ख्युइ तिक्पाबा पोरो माप च्युङसोङ’ नायाप, कि ‘ल्ह, ख्युइ खाटा खुरते खेर’ नायाप, काङते लाइ ला ना? 10 हिन्नाङ मियि पिजाला पिरथिविला तिक्पा माप कियापयि आङ होतो नाइरे खि हा:कुवा कि।" तेहि ख्युइ हति स्हु च्याङ मिघुलङानला नाइसोङ, 11 "ङा ख्योएला नाज्याइ, ल्हँ, ख्युइ खाटा थे, राङ खिमला क्यु।"

12 तेहि हति ल्हाँसोङ, राङ हतितुइना राङ खाटा तेक्ते पोरोयि धुन्ने पुइछारसोङ। धि थु कि, पोरो राङ हा:लाइसोङ, राङ "ङि धि च्वरा ता नामयाङ माथोङा" नेन राङ हतिबे कजसुबायि छे त्येसोङ।

13 खो याङ लाम्मा झि छो छोम्मुवायि नेमुला पुइसोङ। तेहि मितेबे तुम छोम्मुवा झि ख्युइ तेहा लेप्सोङ, राङ ख्युइ हतिबाला छोइ पिन्सोङ। 14 तेहि ढुन राङ ख्युइ अल्फायसयि पिजा लेवि कर तुइङानतेबे अड्डा ताताता थोङदु राङ हतिला नाइसोङ, "ङाहि च्येला स्ह।" हति लाँरे ख्युइ च्येला लेप्सोङ।

15 खो लेवियि खिमला ङ्योप्पा सेतुइना कर तुइङान लेइराङ राङ तिक्पा किङानतेबा येशु राङ ख्युइ लोब्टुतेबा ङ्याबो ताताता थोङदु। चिचालानाना ख्युइ च्येला होङान लेइराङ धु। 16 खो तिक्पा किङानतेबा राङ कर तुइङानतेबा ङ्याबो सेन ताताता थोङदे फरिसि तुमयि शास्त्रितेबे ख्युइ लोब्टुतेबाला नाइसोङ, "खो चिला करतुइङान राङ तिक्पा किङानतेबे ङ्याबो ताते सेन?" 17 धि थोइरे येशुयि हतिबाला नाइसोङ, "नाझा मेताबाला मान कोइबा मिहा, हिन्नाङ नाझा होएताबाला मात्रा कोइबा हुन। काङ केवाकिङानबाला, हिन्नाङ तिक्पा किङानबाला क्ये तोङदु लेलेबा ना।"

18 युहान्नायि लोब्टुतेबा राङ फरिसितेबा वर्तला तोकिनलो। मितेबा लेप्ते खोला नाइसोङ, "युहान्नायि लोब्टुतेबा राङ फरिसियि लोब्टुतेबा वर्त तोकिनदु, हिन्नाङ ख्युइ लोब्टुबा चिला वर्त मितोता।"

19 येशुयि हतिबाला नाइसोङ, "च्हि ख्योबो हतिबा ङ्याबो त्योए-त्योए थु जन्तितेबा वर्त तोकि नाइ? जब थु ख्योबो हतिबा ङ्याबो तोकिन हतिबा वर्त मितोता। 20 हिन्नाङ भेला होङान ना, जब ख्योबो खेने भेङान ना, तेहि हतितुइना खे हति ङिनला वर्त त्योएङान ना।"

21 "सुइ याङ ङिङबा कोहिलाला सारबा कोहिलायि लाम्बा मिक्याका, स्यान अर्थात लाम्बा क्याक्याबि कोहिला राल किन, अर्थात सारबा ङिङबाने रालदे थोन्किन, राङ रालयाप झन अल हुन। 22 तेहि सुइ याङ सारबा अंगुरयि खुवायि छ्याङ ङिङबा पाबुइ किउला मिझ्युका, स्यान अर्थात हति अंगुरयि खुवायि पाबुइ चुटि छ्याक्तु झ्युकिन, राङ अंगुरयि खुवा राङ चुटि याङ मास्यि हुन। हिन्नाङ अंगुरयि खुवायि छ्याङते सारबा सुनाला झ्युकिन।"

23 ङालसुइ ङिन झि खो साइयि स्यिङतेबाने ढुन त्येतु। तेहि हतिने ढुइतुइना ख्युइ लोब्टुतेबे ढुनढुन साइयि ङिमातेबा थुवाला छेलसोङ। 24 धि थोङदे फरिसिबे येशुला नाइसोङ, "तोइ, ङालसुइ ङिनला काङ कियाप ल माना हति च्हिला किन?"

25 येशुयी हतिबाला नाइसोङ "जब दाउद राङ हतिबा ङ्याबो होएता कोइबा होएता राङ टोपा ततबा होतो हतितुइना दाउदयि च्हि क्याइरे? च्हि खि जब याङ टटबा होतोइ?✝2:25 १ शमुएल २१:१-६ 26 घोबा पुजारि अबियाथार यि पालोला कजसुबायि खिमला खो स्युसोङ, राङ कजसुबाला पुपुलि लोटा साइसोङ, काङते पुजारिबे अर्थात स्यान मितेबे सायाप मिहा, राङ हति लोटा खो ङ्याबो होएतातेबाला याङ पिन्देलो।" 27 हतिबाला येशुयी नाइसोङ "ङालसुइ ङिन मियि चाला सोसोइबा हिना, मि ङालसुइ ङिनयि चाला माना। 28 हतिचाला मि पिजा ङालसुइ ङिनयि याङ प्रभु ना।"